Урысыем волейболымкIэ изэнэкъокъу хэлэжьэрэ командэхэу апшъэрэ ку­пэу «Б-м» хэтхэм ящэ­нэрэ едзыгъом хэхьэрэ ешIэгъухэр шэкIогъум и 25 – 28-м Шытхьалэ (Белореченск) щыряIэщтых.

— 2021 — 2022-рэ илъэс ешIэгъур едгъэ­жьагъ, ящэнэрэ едзыгъом хэхьэрэ зэIукIэгъухэр Шытхьалэ щызэхащэщтых, — къытиIуагъ Мыекъопэ хъулъфыгъэ волейбол командэм итренер шъхьа­Iэу, Адыгэ Республикэм изаслуженнэ тренерэу Павел Зборовскэм. — Купым команди 10 хэт, я 5-рэ чIыпIэм тыщыI.

Шытхьалэ команди 4 щызэнэкъокъущт. «Динамо-МГТУ» Мыекъуапэ, «Дагъыстан» Махачкала, «Грозный-2» Грозный, ЦОП Краснодар край. «Динамо-МГТУ-р» «Да­гъыстан» ыкIи «Грозный-2-м» тIорытIо аде­шIэщт. Спорт Унэшхоу «Химик» зыфиIорэм зэнэ­къокъур щыкIощт. Адыгеим икомандэ финалым хэфэным фэбанэ.