«Динамо-Синара» Волгоград — «АГУ-Адыиф» Мыекъуапэ — 23:19 (13:11). ШэкIогъум и 20-м Волгоград щызэIукIагъэх.

«Адыиф»: къэлэпчъэIутхэр: Баскакова, Ламзина; ешIакIохэр: Кобл — 5, Клименко — 1, Краснокутская — 1, Никулина — 1, Кириллова — 1, Колодяжная, Мещерякова, А. Морозова — 3, Куцевалова — 2, Казиханова — 3, Дмитриева.

Урысыем гандболымкIэ изэнэ­къокъоу суперлигэм икупэу «Б-м» щыкIорэм апэрэ чIыпIэр щызы­Iыгъэу «Динамэм» «Адыифыр» IукIагъ. Бысымхэм якомандэ те­кIоныгъэр къыдихыным нахь фэ­хьазырыгъ. Арэу щытми, ятIонэрэ едзыгъом «Адыифым» къэлапчъэм Iэгуаор дидзэнымкIэ амалышIухэр къыгъотыщтыгъэх.

Пчъагъэр 17:17 зэхъум, «Адыи­фым» тигъэгугъэщтыгъ, ау «Динамэм» зэкIэлъыкIоу тикомандэ икъэлапчъэ гъогогъуи 4 Iэгуаор къыдидзагъ, ешIэгъум къырыкIощтыр зыIэкIигъэкIыгъэп.

Мыекъуапэ щапIугъэ Дувакинар «Динамэм» икъэлэпчъэIутэу ешIагъ, IэпэIэсэныгъэ дэгъу къыгъэлъэгъуагъ. «Динамэм» текIоныгъэр къызэрэдихыгъэм Дувакинам иIахьышIу хэлъ.

— Дарья Богдановар, Анна Красновар зэрэсымаджэхэм къы­хэкIэу зэIукIэгъум хэлэжьагъэхэп, — къытиIуагъ клубэу «Адыифым» итренер шъхьаIэу, Урысыем иза­служеннэ тренерэу Александр Реввэ. — Кобл Зурет, Диана Ка­зихановар, Людмила Баскаковар, фэшъхьафхэри дэгъоу ешIагъэх. Нахь ныбжьыкIаIохэм опыт зэрямыIэм къыхэкIэу зыпкъ итэу, чанэу ешIэнхэ алъэкIыгъэп.

Ангелина Куцеваловам, Дарья Гильфановам, нэмыкIхэм ясэнаущыгъэ шIэхыIоу къызэIуахы тшIоигъу.

ЕшIэгъухэр

«Ростов-Дон» — «Лада» — 28:23, «Астраханочка» — «Звезда» — 27:25, «Луч» — «Ставрополье» — 20:23, «Университет» — «Уфа» — 27:24.

Зэтэгъапшэх

Купэу «А-р» 1. «Ростов-Дон» — 18 2. ЦСКА — 14 3. «Лада» — 13 4. «Астраханочка» — 6 5. «Звезда» — 4 6. «Кубань» — 3 Купэу «Б-р» 1. «Динамо» — 18 2. «Университет» — 13 3. «Ставрополье» — 10 4. «АГУ-Адыиф» — 9 5. «Луч» — 6 6. «Уфа-Алиса» — 2. ШэкIогъум и 30-м «Адыифыр» «Ставрополье» Ставрополь Мые­къуапэ щыIукIэщт.