ХэшыпыкIыгъэ командэм аштагъэх
Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ибэнэкIуи 3 хэгъэгум ихэшыпыкIыгъэ командэ хагъэхьагъ.
2021-рэ илъэсым Урысыем изэнэкъокъухэм ахэлажьэхэзэ, медальхэр тибэнакIохэм къахьыгъэх.
— ЦIыкIушъо Асхьад, Анна Лодневар, Къуижъ Бислъан Урысыем дзюдомкIэ ихэшыпыкIыгъэ командэ аштагъэх, зэнэкъокъухэм зафагъэхьазыры, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим изаслуженнэ тренерэу Бастэ Сэлым. — Урысыем дзюдомкIэ ихэшыпыкIыгъэ командэ итренер шъхьаIэу Тао Хьасанбый тыщигъэгъозагъ тибэнэкIо ныбжьыкIэхэм зэралъыплъэрэм, цыхьэ зэрафишIырэм.
Екатеринбург щыбэнэщтых
Хэгъэгум дзюдомкIэ изэнэкъокъу шэкIогъум и 20 — 26-м Екатеринбург щыкIощт. Илъэс 21-м нэс зыныбжь кIалэхэр, пшъашъэхэр алырэгъум щыбэнэщтых.
Республикэм испорт еджапIэ зыщызыгъасэхэу Татьяна Шаталовар, ХьакIэко Данэ, Анна Лодневар, Мыгу Миланэ, Анастасия Коржовар, Екатерина Соловьевар, Тыгъужъ ТIахьир, Ваган Григорян, Бэгъ Аслъан Адыгэ Республикэм дзюдомкIэ ихэшыпыкIыгъэ командэ хэтхэу Екатеринбург яIэпэIэсэныгъэ къыщагъэлъэгъощт.
Адыгэ Республикэм изаслуженнэ тренерэу Хьакурынэ Дамир, тренерэу Мерэм Саидэ тибэнакIохэм япащэх, тиреспубликэ щапIугъэ ШъэоцIыкIу Рустам хэгъэгу зэнэкъокъум судьяу хэлэжьэщт.
Хэгъэгум изэнэкъокъу зэрэкIорэм, гъэхъагъэ зышIыгъэхэм шъуащыдгъэгъозэщт.