Дахэу агъэкIэжьы
Джэджэ районым искусствэхэмкIэ икIэлэцIыкIу еджапIэ гъэцэкIэжьын IофшIэнхэр щэкIох.
Лъэпкъ проектэу «Культурэм» хэхьэрэ Iофтхьабзэу 2021-рэ илъэсым зэшIуахын фаехэм ащыщхэр псэолъэшIхэм шIэхэу аухыщтых. Унашъхьэр, шъхьаныгъупчъэхэр зэблахъугъэх. Апэрэ ыкIи ятIонэрэ къатхэм язэпхыпIэхэр агъэпытагъэх. Псыр, фабэр зэрыкIощтхэр, фэшъхьафхэри агъэцэкIэжьыгъэх, дэпкъхэр агъэлагъэх.
Адыгэ Республикэм культурэмкIэ иминистрэу Аулъэ Юрэ къызэриIуагъэу, лъэхъаным диштэу искусствэхэмкIэ еджапIэр зэтырагъэпсыхьажьы.
ЕджапIэм ыкIоцI щыIурэ макъэхэр зэфэшъхьаф шIыгъэнхэм фэшI дэпкъхэм ящыкIэгъэ Iофыгъохэр арашIылIагъэх, нэмыкI IофшIэнхэри зэшIуахыгъэх.
— Лъэпкъ проектэу «Культурэм» ишIуагъэкIэ искусствэхэмкIэ кIэлэцIыкIу еджапIэр лъэхъаным диштэу агъэцэкIэжьы, — къыIуагъ Джэджэ районым иадминистрацие культурэмкIэ и ГъэIорышIапIэ ипащэ иIэнатIэ зыгъэцэкIэрэ Наталья Авгеринам. — Сэнаущыгъэ зыхэлъ кIэлэцIыкIухэм искусствэр зышIогъэшIэгъонхэм ягъэсэн фытегъэпсыхьэгъэ еджапIэр гупчэ афэхъущт. Художественнэ шIэныгъэ зэрагъэгъотынымкIэ амалышIухэр яIэщтых.
Итеплъэ егъэгушIох
ИскусствэхэмкIэ районым икIэлэцIыкIу еджапIэ итеплъэ зэхъокIыныгъэ инхэр фашIых. ЕджапIэм ыкIоцI гуIэтыпIэ хъугъэ. Джэджэ районым игупчэ искусствэхэмкIэ еджапIэм къыгъэдэхэщт.
Лъэпкъхэр искусствэм зэфещэх. Урысхэр, адыгэхэр, къэзэкъхэр, ермэлхэр, нэмыкIхэри районым щэпсэух. КIэлэцIыкIухэм ялъэпкъ искусствэ зэрагъэшIэнымкIэ фольклорым ехьылIэгъэ къэбархэр кIэлэегъаджэхэм аугъоих, цIыф гъэшIэгъонхэм еджакIохэр аIуагъэкIэщтых.
ГъэцэкIэжьын IофшIэнхэм сомэ миллион 14-м ехъу апэIухьащт. Къашъохэр, орэдхэр, музыкальнэ произведениехэр кIэлэцIыкIухэм зэрагъашIэзэ, культурэм хэхьэрэ лъэпкъ шэн-хабзэхэм нахьышIоу защагъэгъозэщт, шIэныгъэу зэрагъэгъотырэр щыIэныгъэм щагъэфедэщт.
Сахьидэкъо Нурбый.