Лъэпкъ зыкIыныгъэм епхыгъэу
Адыгеир сыдигъокIи шъолъыр анахь рэхьатхэм, мамырныгъэр зыщагъэлъапIэхэрэм ащыщ. Ащ фэдэу щытыным, тапэкIи укъуагъэ мыхъуным пае сыда шIэгъэн фаер? Дунэе глобализациекIэ заджэхэрэм илъэхъан сыдэущтэу лъэпкъ зэфыщытыкIэхэр, хабзэхэр къызэтенэщтха? Мы упчIэхэм ыкIи нэмыкIхэм афэгъэхьыгъагъ социологие шIэныгъэхэмкIэ докторэу, Адыгэ къэралыгъо университетым философиемрэ социологиемрэкIэ икафедрэ идоцентэу Нэхэе Вячеслав телерадиокомпаниеу «Адыгеим» радиомкIэ икъулыкъу ипащэу ХьакIэмыз Сусаннэ дыриIэгъэ зэдэгущыIэгъур.
— Сыдэу уеплъыра, лъэпкъ зэгурыIоныгъэр дунэе глобализациекIэ заджэхэрэм илъэхъан сыдэу ехъулIэщта?
— Къыхэгъэщыгъэн фае, интернациональнэ пIуныгъэмрэ лъэпкъ зэхашIэр ащ зэрехъулIэрэмрэ алъапсэхэр тарихъым чыжьэу къыщежьэх. Тикъэралыгъо игъэпсын зэтеуцо зэхъур ары джыри а Iофыгъор къызыуцугъагъэр — зы социокультурнэ чIыпIэм сыдэущтэу лъэпкъ зэфэшъхьафхэр щызэдэпсэущтха? Ащ изэхэфын сыдигъокIи шIуагъэ къытэу къекIуалIэщтыгъэх. Лъэпкъ нэшанэр цIыфым игушъхьэбаиныгъэ къыпкъырыкIыхэзэ «къагъэкIыщтыгъэмэ», лъэпкъ зэфэшъхьафхэм языкIыныгъэ тикъэралыгъо итарихъ Iудэнэ плъыжькIэ щыпхырыщыгъэ хъугъэ-шIагъэхэмкIэ псыхьагъэ. Къэралыгъо кIоцIым имызакъоу, ащ ыкIыб къикIэуи гумэкIыгъохэр къэуцущтыгъэх — Хэгъэгу зэошхор, ащ ыпэкIэ, 1917-рэ илъэсым щыIэгъэ революциер ушэтыпIэ иныгъэх. Ау ахэри къызэтынэкIыгъэх. ЫкIи дунаим къыщыдгъэлъэгъуагъ зы къэралыгъо кIоцIым, къыблэ хыхэм къащыублагъэу полярнэ краим нэсырэ къэралыгъошхом, щыпсэурэ лъэпкъхэм, этносхэм ыкIи субэтносхэм зы культурнэ «Iэмэ-псымэхэр» къызэрагъотыхэрэр, зэрэзэкъотхэр.
Уасэ зыфэтшIырэ къэкIуапIэхэу тызыгъэлъэшыхэрэр къэдгъотыщтыгъэх ыкIи тапыщытышъугъ тыкъэзыуфэнэу фэягъэхэм. Джащ пае, тиуахътэ тыкъыхэхьажьымэ, къыхэгъэщыгъэн фае зилъэпкъ ахэзыIэтыкIынэу фаехэм ягухэлъ къадэхъун зэрамылъэкIыщтыр. Къэхъух кIуачIэхэр тилъэпкъ мамырныгъэрэ тидин зэгурыIоныгъэрэ зэщызыгъакъохэ зышIоигъохэр, политизацием епхыгъэ Iофыгъохэри къэтэджых политическэ кIуачIэхэр ыкIи структурэхэр акIыб дэтхэу, яфедэ агъоты ашIоигъоу. Ау мэфэкIэу тиIэр лъэпкъыр, культурэр, этническэ нэшанэр арэп ныIа зыфэгъэхьыгъэр, лъэпкъхэм языкIыныгъ нахь! Ащ пшъэрылъэу иIэр тикъэралыгъо илъэпкъ зэкъогъэуцогъэныр, зы социокультурнэ щыIакIэм щызэубытылIэгъэныр ары. Культурнэ-тарихъ кодыр зэтегъэуцожьыгъэныр арэп, ар щыI, джыри нахь гъэпытэгъэныр, нахь кIуачIэ иIэ шIыгъэным къыфэкIогъэныр ары. Мыщ дэжьым лъэпкъхэм язэфыщытыкIэ хъугъэр, ахэр зэзыпхыхэрэр чIамынэнымкIэ Iэмэ-псымэу щыIэр интернационализмэу дгъэпсыгъагъэр ары. Ар советскэ лъэхъанхэм къащежьэ, советскэ цIыфым игъэпсыкIэ ар ылъапс. Зы бзэ къызэдэдгъотыным, тыухъумагъэу тызэрэщытыр къыдгурыIоным ыкIи тымыщынэнымкIэ ар тиIэпыIэгъу. Титарихъ, тилъэпкъ зэхашIэ зэрэпытэхэрэр къеушыхьаты Урысыем щыпсэухэрэм упчIэ зэрямыIэр зыфэдэхэмкIэ, зэхьыщырхэмкIэ.
Социологическэ къулыкъу зэфэшъхьафхэм ашIыгъэ кIэупчIэнхэм язэфэхьысыжьхэмкIэ, Урысыем щыпсэухэрэм языплIанэ иIахьищмэ ащ ицIыфхэу залъытэжьы. Мы пчъагъэм къегъэлъагъо зы идентификационнэ код зэрэщыIэр, ар тапэкIэ тыухъумэн фае. ТицIыфхэм тарихъым еплъыкIэ зыкI фыряI. Ары, къыхэкIы яшIошIхэр зэтемыфэхэуи, ар нахьыбэм хъугъэ-шIагъэхэм фыщытыкIэу афыряIэм къыпкъырэкIы, ау лъэпкъым, лъэпкъ зыкIыныгъэм, этническэм язэхэушъхьафыкIынкIэ цIыфхэм зэдэштэныгъэ ахэлъ.
Iоф шъхьафыр — шъхьадж иамал къызэрихьэу лъыплъэн фае лъэпкъ зэмылIэужыгъохэм мамырныгъэу азыфагу илъыр зыми зэщимыгъэкъоным. КъэкIуапIэхэр, бзыпхъэхэр тиIэх дгъэфедэхэзэ а зыкIыныгъэр къызэрэтыухъумэщтымкIэ, Урысыем тырицIыфэу, зы къэралыгъом тызэрэзэдыщыпсэурэмкIэ тизэхашIэ, тишIошъхъуныгъэ зэрэдгъэпытэщтымкIэ.
— Сыдым ишIуагъэкIэ тизэфэдэныгъэ непэ къэдгъэгъунэн тлъэкIыщта? Социологым, тарихълэжьым ишIошIкIэ, анахь шъхьаIэр сыда?
— Титарихъ шIэжь ухъумэгъэным Iоф дэтшIэн фае. Тарихъ бай тиI.
— Тарихъым ищысэ горэхэр ара IэубытыпIэнхэу щытыр?
— ТиблэкIыгъэ фэгъэхьыгъэ шIэныгъэ зафэхэр зылъэпсэ гъэсэныгъэ ягъэгъотыгъэнымкIэ IофшIэныр зэхэщэгъэ зэпытын фае. Хъугъэ-шIагъэхэр зэблэпхъунхэр, бгъэдэхэнхэр ищыкIагъэп. Зытетым тетэу щыIэныгъэм ухэплъэн фае. ЗэкIэ зэкъоуцон фае. Якъэралыгъо шIу алъэгъоу ныбжьыкIэхэр ппIунхэм мэхьанэшхо иI.
Общественнэ шIошIхэмкIэ фондым ригъэкIокIыгъэ кIэупчIэнхэу, нахь тэрэзэу къэпIон хъумэ, уплъэкIунхэу илъэс 15-м къакIоцI кIуагъэхэм къызэрагъэлъэгъуагъэмкIэ, тикъэралыгъо щыпсэухэу патриотэу зызылъытэжьхэрэм япчъагъэ хэхъуагъ — процент 57-м текIи 82-м нэсыгъ. Ар къэралыгъом исхэм янахьыб. Арэу зыхъукIэ, зыкIыныгъэр къызэрэтыухъумэщт ащ фэдэ «Iэмэ-псымэ», ащ фэдэ шIыкIэ щыI. Ары, пIуныгъэми зыфэбгъэзэн фае. Тызэщызыгъэкъон зылъэкIыщт къэбархэр зыщызэхэтхынхэ тлъэкIыщт лъэхъаным ахэм тапэуцужьын тлъэкIын, культурнэ-тарихъ кодэу тиIэр тэрэзэу зэхэтфын фае. ГущыIэжъ дэгъу щыI — лъэпкъэу зиблэкIыгъэ зымышIэрэм къэкIощтыр иIэп. УишIэныгъэ хэбгъахъоу, тарихъ хъугъэ-шIагъэхэр тэрэзэу, зафэу зэхэпфыхэ, ахэр тиеджапIэхэм ащагъэфедэрэ тхылъхэм къащыгъэлъэгъуагъэ зыхъукIэ, джы тиIэ мамырныгъэмрэ зэзэгъыныгъэмрэ къызэтедгъэнэнхэ тлъэкIыщт.
— Непэ, зэIухыгъэ Интернетымрэ мультимедийнэ шIыкIэ-амалхэмрэ ялъэхъан, узыхэдэн бэу щыIэ хъугъэ ыкIи ухэмыукъоныр зэкIэми анахь шъхьаI. О уишIошIкIэ, лIэужхэм япIуныгъэ сыдэущтэу зэшIопхыщта къэбар къэкIуапIэр бэдэдэ, ежьхэр хэдэнхэ амал яIэ зыщыхъугъэ уахътэм? Къэралыгъом Iофэу зэшIуихырэм, еджапIэхэм, унагъом аратырэ гъэсэныгъэм, пIуныгъэм ямылъытыгъэу… Сыд непэ хъурэр?
— ПIуныгъэ шIыкIэ-амалэу щыIэхэм якъыхэхынкIэ тэ шъхьафэу зи къэтыугупшысын тлъэкIыщтэп. Ар зэрэдунаеу аушэты. ТилIэуж иушэтыпI. Афэтымыдэми хъущтэп. Къыпфамыдэрэм нахь уфае мэхъу. Сэ къызэрэсшIошIырэмкIэ, гъэсэныгъэ институтэу гъэпсыгъахэу щыIэхэм якъэкIуапIэхэр икъоу гъэфедагъэ хъухэрэп. Общественнэ IофшIэныр нахь чанэу зэхэщэгъэн фае. ХъугъэшIэгъэ шъхьафхэр е мэфэкI мафэхэр арэп тыгу къызщыкIыжьынэу щытыр тизыкIыныгъэ, ащ ренэу тыдэлэжьэн фае. ЗэIухыгъэ Интернетэу этическэ гъунапкъэхэр зыщымыгъэнэфагъэхэу, пстэури зыукъон зылъэкIыщт къэбарым икъэкIуапIэ хъушъущтым илъэхъан тызхэтыр, ащ цIыфым ипсихологие ыукъошъущт. Непэ къэдгъотын фае шIыкIэ джа зэIухыгъэ къэбарлъыгъэIэс амалым къытырэмрэ гъэсэныгъэм иучреждениехэм ачIэлъ къэкIуапIэмрэ азыфагу зэпэщэчыныгъэ дэлъыным пае. Тикультурэ зэфэшъхьаф шъыпкъэ, зэмышъогъу мэхъу. ЫкIи ныбжьыкIэхэр уахътэм имызакъоу, чIыпIэми хэгъощыхьэх кIэлэегъэджэ къызэрыкIом лъытэныгъэу фашIыщтыгъэр кIоды зыхъукIэ. Аущтэу мыхъуным пае ицIыкIугъом къыщыублагъэу цIыфыр ппIун фае. АщкIэ мэхьанэшхо зиIэр унэгъо институтыр ары. Сабыим е цIыфым иапэрэ лъэбэкъоу ышIырэмкIэ пшъэдэкIыжьыр унагъом телъ. Тэрэз-мытэрэзыр къин зэхэпфыныр мыщ фэдэ уахътэу этическэ гъэшэхъуныгъэр жъугъэ зыщыхъугъэм. Ау хабзэ хъугъэу уасэ зыфэтшIыхэрэ нэшанэхэри щыIэхэба?! Джары джыдэдэм къызкIафэдгъэзэжьырэр этническэм, этнокультурнэм. Хабзэ хъугъэ обществэм хэлъ джа цIыфныгъэ-Iэдэбныгъэу, цIыфыгъэ намысэу лъэхъаным диштэрэ обществэм Iудэнэ плъыжьэу пхырыщыгъэр.
— Социокультурнэ глобализациекIэ заджэхэрэр сыдэущтэу тэ тиреспубликэ щыбгъэфедэн плъэкIыщта? Адыгэ субэтносыр тштэн, нэмыкIхэу Адыгеим щыпсэухэрэри ары. Сыд тызщыщынэнэу щытыр е сыда дэгъоу хэлъыр?
— УпчIэ гъэшIэгъонитIу къэбгъэуцугъ. АпэрэмкIэ къэпIон плъэкIыщтыр — анахь къызэрыкIор — хабзэмкIэ зэсагъэхэмрэ интернациональнэмрэ къызэтегъэнэгъэнхэр ары. Лъэпкъхэм хабзэу ахэлъхэм яшIуагъэкIэ тишъолъыр зэгурыIохэу щызэдэпсэух, ау, нэмыкI лъэныкъокIэ тыкъызеплъырэм, этническэ зэдэлэжьэныгъэр тэгъэфедэ. Культурнэ шIыкIэ амалэу зэдгъэгъотыгъэхэр дгъэфедэхэзэ къэкIощтым дыхэтхьанхэ фае лъэпкъ мамырныгъэр, зэдэпсэуныгъэр. Шъолъырыр зыщыIэм охътэшIу тешIагъ, илъэс 30-р макIэп. Адыгэ Республикэм а уахътэм зыкIи лъэпкъхэм азыфагу зэмызэгъыныгъэ къитэджагъэу щагъэунэфыгъэп, ар щытхъу зыхэлъ ыкIи бгъэлъэгъон зытефэрэ нэшан. Арышъ, зы социокультурнэ чIыпIэ зыкI тызэрэщыпсэурэр дэгъоу къызэрэдгурыIорэм, тапэкIи ар зэрэдгъэфедэщтым игугъапIэ ащ къеты. Нахь зэпэблагъэ тыхъу къэс культурэ зэфэшъхьафхэм язэдэлэжьэныгъэ мэхьанэу иIэ хъурэм зыкъеIэты. Щынагъо горэ къэхъу зыхъукIэ, дунаими едгъэлъэгъугъ, тэри тыушэтыгъахэ тызэкъоуцон зэрэтлъэкIырэр. Сэ сызэреплъырэмкIэ, шIыкIэр къызэрыкIу, ушэтыгъахэ ыкIи ащ тыфэкIон фае.
ЯтIонэрэ упчIэмкIэ. Бэрэ тегупшысэу къыхэкIы — сыд фэдэ субъекта интернационализмэм ифэгъэсэнкIэ пшъэдэкIыжь зыхьын зылъэкIыщтыр? Ары, советскэ лъэхъаным пионериер щыIагъ, ащ этническэ уасэ иIагъэп, ау ащ къикIырэп лъэпкъ нэшанэм мэхьанэ щырамытыщтыгъэу, амыгъэлъапIэщтыгъэу. Гурыт Азием илъэпкъ чIыналъэхэми пионериер ащызэхэщэгъагъ. Ау ащ запигъэуцужьы- щтыгъэп интернациональнэ пIуныгъэр зэрэзэрихьэрэм пае лъэпкъым ыгъэлъапIэщтыгъэхэм.
Джырэ уахътэм щыI юнармиер. Ащ уасэ сэ джыдэдэм къестышъущтэп, сыда зыпIокIэ аущтэу лъэш дэдэу бэмэ алъыIэсыгъэу сшIошIырэп. Бэ хахьэрэр, ау джыри ныбжьыкIэ, ищыкIэгъэ лъэныкъор ебгъэлъэгъун, тепщэн фае. ЗэкIэ зэлъытыгъэщтыр зэхэщакIохэмрэ юнармейскэ движениер жъугъэу зэлъягъэшIэгъэным пылъыщтхэмрэ. Джыри мэхьанэ зиIэ зы лъэныкъу — пионерием иIэгъэ кIуачIэр ащ ыгъотыным пае политикэм епхыгъэнэу щытэп. Пстэуми къякIоу, цIыфхэм аштэу хъун фае. Обществэм мы гукъэкIым къыдыригъаштэмэ, дэгъу хъущт. «Партие» гущыIэр, мэхьанэр сшIэзэ къыхэзгъахьэрэп. ЗэкIэми ашIэ «Единэ Россием» къызэрэпкъырыкIыгъэри, IэпыIэгъу ащ зэрэригъэгъотыгъэри, ау хэлажьэхэрэм зягъэушъомбгъугъэн фае. Джащыгъум шIуагъэ къытыщт. Джащыгъум лъэхъаным диштэрэ пионериер тиIэ хъущт. Ау ар къэкIощт уахът.
— ТизэдэгущыIэгъу икIэухым сыд цIыфхэм къяпIо пшIоигъор?
— ЦIыфхэм, республикэм ихьакIэхэми, зэкIэми шIу къадэхъунэу, мамырныгъэмрэ зэгурыIоныгъэмрэ ащымыкIэнхэу къясIо сшIоигъу. Джырэ фэдэ охътэ къиным псауныгъэкIи сафэлъаIо.