Ригъэджагъэхэм агъэлъапIэ
Лъэпкъ искусствэм щызэлъашIэрэ Ацумыжъ Щамсэт ишIушIагъэ сэнэхьатэу къыхихыгъэм гуетыныгъэу фыриIэм къыщежьэ.
Музыкальнэ училищэу Н. А. Римский-Корсаковым ыцIэ зыхьырэр 1962-рэ илъэсым Краснодар къыщиухыгъ. Урыс лъэпкъ музыкальнэ Iэмэ-псымэхэм якъутамэу еджапIэм иIэм ыгу етыгъэу щеджагъ, ар къызеухым, Iоф ышIэнэу Приморскэ-Ахтарскэ икIэлэцIыкIу музыкальнэ еджапIэ агъэкIуагъ. Лъэпкъ музыкальнэ Iэмэ-псымэхэмкIэ оркестрэ ащ щызэхищагъ, кIэлэцIыкIухэр музыкальнэ Iэмэ-псымэхэм афигъэсэнхэм пылъыгъ.
Къуаджэу Тэхъутэмыкъуае къызегъэзэжьым, пионерхэм я Унэ фортепианэмкIэ кружокэу иIэм пэщэныгъэ дызэрихьэу ыублагъ. 1965-рэ илъэсым къыщыублагъэу кIэлэцIыкIу музыкальнэ еджапIэм икIэлэегъаджэу, оркестрэм ипащэу щытыгъ.
Лъэпкъ Iэмэ-псымэхэм, анахьэу пщынэм, кIэлэцIыкIухэр афигъасэхэу зырегъажьэм, исэнэхьат нахь лъэшэу ыгу рихьы хъугъэ. ПщынэмкIэ цIыфхэм адэгущыIэу ылъытэщтыгъ.
Апэрэ еджакIохэр
КIэлэегъаджэм иIофшIагъэ уасэ фэпшIыным фэшI ригъэджагъэхэм щыIэныгъэм чIыпIэу щаубытыгъэм улъыплъэн фае. 1966 — 1969-рэ илъэсхэм кIэлэцIыкIу еджапIэр къэзыухыгъэхэм ащыщых Ацумыжъ Минсурэ, Ацумыжъ Симэ, Еутых Адам, Ацумыжъ Сулыет, ХьакIэгъогъу Светланэ, Хьатэгъу Светланэ, Джастэ Мэлайчэт, Ацумыжъ Разиет, Натхъо Мэлайчэт, нэмыкIхэри.
ЕджапIэм нэбгыри 106-рэ къычIатIупщыгъ, а пчъагъэм щыщэу 17-р музыкант хъугъэ.
Еутых Мирэ культурэм иинститутэу Гнесинхэм ацIэ зыхьырэр Москва къыщиухыгъ, кIэлэегъаджэу Мыекъуапэ Iоф щишIагъ, домрэм фигъэсагъэр макIэп.
Къэлэкъутэкъо Инвер Ростов-на-Дону консерваториер къыщиухыгъ, пщынаоу зигъэсагъ. Адыгэ Республикэм изаслуже- нэ артист, Урысыем лауреат щыхъугъэ ансамблэу «Уджым» ихудожественнэ пащ. Тэчахъо Алый, Тыгъужъ Нурбый, Мышъэ Андзаур, Цэй Аскэр Адыгэ къэралыгъо университетым искусствэхэмкIэ и Институт яшIэныгъэ щыхагъэхъуагъ.
Ацумыжъ Сулиет Лъэустэнхьаблэ культурэмкIэ и Унэшхо ипащ. Тыгъужъ Нурбый Тэхъутэмыкъуае искусствэхэмкIэ икIэлэцIыкIу еджапIэ ипащ.
Мышъэ Андзаур Адыгэ Республикэм и Къэралыгъо орэдыIо-къэшъокIо ансамблэу «Ислъамыем» иоркестрэ хэт, орэдхэр еусых, композитор сэнэхьатыр шIогъэшIэгъон. Адыгэ Республикэм инароднэ артист 2016-рэ илъэсым хъугъэ.
Гъужъыекъо Налбый, Мызэгъ Мухьдин Адыгэ Республикэм культурэмкIэ и Министерствэ истипендие къаратызэ еджагъэх. Къэлэкъутэкъо Инвер Урысыем культурэмкIэ и Министерствэ истипендие къыратызэ исэнэхьат феджагъ.
Фестиваль-зэнэкъокъухэм Ацумыжъ Щамсэт ригъэджагъэхэм щытхъуцIэхэр къащахьыгъэх. Нэбгырэ 83-рэ ахэр мэхъух.
Щытхъур къахьы
Адыгэ Республикэм культурэмкIэ и Мафэхэр 1996-рэ илъэсым Москва щыкIуагъэх. Ацумыжъ Щамсэт зипэщэ ансамблыр зэхэхьэшхом хэлэжьагъ.
1999-рэ илъэсым Урысыем иапэрэ Дельфийскэ джэгунхэр Саратов щыкIуагъэх. «Лъэпкъ Iэмэ-псымэхэр» зыфиIорэ зэнэкъокъум ансамблэу «Нартым» тыжьыныр къыщыдихыгъ.
Гъатхэм фэгъэхьыгъэ зэнэкъокъоу Налщык 2001-рэ илъэсым щыкIуагъэм Москва, Санкт-Петербург, Новосибирскэ, фэшъхьафхэм къарыкIыгъэхэр щызэIукIагъэх. Ацумыжъ Щамсэтрэ Къэлэкъутэкъо Инверрэ дипломхэр къафагъэшъошагъэх.
АгъэлъапIэ
Ацумыжъ Щамсэт ишIушIагъэкIэ къытхэт, культурэм иIофышIэхэм агъэлъапIэ, упчIэжьэгъу ашIы.
Адыгэ Республикэм итын анахь лъапIэу медалэу «Адыгеим и Щытхъузехьэр» 2014-рэ илъэсым къыфагъэшъошагъ. Адыгэ Республикэм культурэмкIэ изаслуженнэ IофышI, IофшIэным иветеран, щытхъу тхылъхэр иIэх.
— Угу рихьырэ сэнэхьатым урылажьэзэ щыIэныгъэм щыхэпхыгъэ лъагъом урыкIоныр насыпыгъэм щыщ, — еIо Ацумыжъ Щамсэт.
— Щамсэт ыпхъоу Сулиет сурэтышI, — къеIуатэ культурэм иIофышIэу СтIашъу Сафыет. — Къэгъэлъэгъонхэр зэхещэх, янэ щысэ тырехы.
Пенсием Щамсэт кIуагъэу зегъэпсэфы. Ыгъэсагъэхэм ящытхъу къаIуатэу зэхихмэ мэгушIо. Гум хихыгъэ сэнэхьатыр щыIэныгъэм къыщетэжьыгъэу елъытэ.
ЖэнэлI Сулиет.