Адыгэ Республикэм и Къэралыгъо Камернэ музыкальнэ театрэу Хьанэхъу Адам ыцIэ зыхьырэм икъэгъэлъэгъонхэр Химки щыкIуагъэх.

Москва хэкум икъалэу Химки идраматическэ театрэу «Тэ тиун» зыфиIорэмрэ Адыгэ Республикэм и Къэралыгъо Камернэ музыкальнэ театрэу А. Хьанэхъум ыцIэ зыхьырэмрэ творческэ зэпхыныгъэхэр зэдыряIэх.

— Химки итеатрэ иартистхэр Адыгеим щыIагъэх, къэгъэлъэгъонхэр щызэхащагъэх. Ныб­джэгъуныгъэу зэдэтшIыгъэм ты­къыпкъырыкIи, Москва хэкум тыкIуагъ, Химки къэгъэлъэгъонхэр щызэхэтщагъэх, — къы­тиIуагъ АР-м и Къэралыгъо Камернэ музыкальнэ театрэу А. Хьанэхъум ыцIэ зыхьырэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу, искусствоведениемкIэ кандидатэу Сулейманов Юныс. — Титеатрэ бысымхэр дахэу къы­пэгъокIыгъэх, тизэпхыныгъэхэр дгъэпытагъэх.

В. Старчевскэм илибретто техыгъэ мюзиклэу «Ослепленные» зыфиIорэ къэгъэлъэгъоныр режиссерэу Сулейманов Юныс ыгъэуцугъ. Композиторэу Андрей Семеновым орэдышъор ыусыгъ. Адыгэ Республикэм инароднэ артистхэу Ирина Кириченкэм, Михаил Арзумановым, Адыгэ Республикэм изаслуженнэ артистхэу Давид Ма­накьян, Виктор Марковым, фэшъхьафхэм роль хэхыгъэхэр къашIыгъэх.

Тыкъэзыуцухьэрэ дунаим идэхагъэ, тыгъэм инэбзыйхэр цIыфхэм амылъэгъужьыхэ зэ­рэхъугъэм, шIур ем зэрэте­кIорэм афэгъэхьыгъэ къэгъэ­лъэгъоным искусствэм пыща­гъэхэр ашIогъэшIэгъонэу еплъы­гъэх, тиартистхэм бэрэ Iэгу къафытеуагъэх.

Пшысэхэр

КIэлэцIыкIухэм афэгъэхьыгъэ пшысэхэм атехыгъэ къэ­гъэлъэгъонхэри узыIэпащэу артистхэм къашIыгъэх. Къуекъо Налбый ипшысэу шъынэ гъэшIэгъоным ехьылIагъэр гум къегущыIыкIы. Орэдышъор Тхьабысымэ Умарэ ыусыгъ, къэгъэлъэгъоныр режиссерэу Виктор Серебрянскэм ыгъэу­цугъ.

Адыгэ Республикэм изаслуженнэ артисткэу Надежда Мак­симовам, артистхэу ЛIый Бэлэ, Светлана Корневам, Сергей Старусиным, нэмыкIхэм рольхэр къашIыгъэх.

Урыс пшысэхэм яхьылIэгъэ къэгъэлъэгъоныр щыIэныгъэм дештэ. Спектаклэр Ю. Сулеймановым ыгъэуцугъ, орэды­шъор А. Семеновым ытхыгъ.

Адыгеим инароднэ артисткэу Ирина Кириченкэм, респуб­ли­кэм изаслуженнэ артистэу Владислав Верещако, артистхэу ЛIый Бэлэ, Марина Синяевам, Елизавета Салинцевам, опытышхо зиIэ артистэу Виктор Серебрянскэм рольхэр къа­шIыхэзэ, пьесэм псэ къыпа­гъэкIагъ.

КIэщакIом узылъещэ

Урысыем культурэмкIэ и Министерствэ имурадхэм къадилъытэу «Гастроль инхэр» зыфиIорэ Iофтхьабзэр зэхащагъ. Культурэм ифедеральнэ IофшIапIэу «Росконцертым» иунашъохэм адиштэу гаст­роль-концертхэр 2020-рэ илъэсым къыщыублагъэу зэхащэх. Урысыем культурэмкIэ иминистрэу Ольга Любимовам изэфэхьысыжьхэм къащыхигъэщыгъэм уегъэгушхо. Гастроль-концерт Iофыгъохэм ахэлажьэхэ ашIоигъоу хэгъэгум икъэралыгъо организацие 500-м нахьыбэ «Росконцертым» лъэIу тхылъ- хэр къыфагъэхьыгъэх.

Хэгъэгум игастроль-концерт Iофыгъоу «Гастроль инхэм» Урысыем ишъолъырхэм культурэмкIэ язэпхыныгъэхэр егъэ­пытэх, егъэжьэпIэшIоу ашIы­гъэхэр лъегъэкIуатэх. Театрэхэм Iоф зэдашIэзэ, къэгъэлъэгъонхэм яплъы зышIоигъохэр на­хьыбэ ашIы.

Зеушъомбгъу

Искусствэм ифестивальхэр, культурэм имафэхэр, нэмыкIхэр «Росконцертым» зэхищэхэзэ, дунэе зэнэкъокъухэм ахэлажьэхэрэм япчъагъэ хэхъо. Лъэпкъ къэшъокIо ансамблэхэм, орэдыIохэм, театрэхэм, лъэпкъ музыкальнэ Iэмэ-псы­мэхэмкIэ оркестрэхэм Урысыем культурэмкIэ и Министерствэ IэпыIэгъу афэхъу, искусствэм зиушъомбгъуным фэшI амалхэр къагъотых.

ЕплъыкIэхэр

— Москва хэкум тызэрэщы­Iагъэм шIуагъэу къытфихьыгъэр гущыIэкIэ къэIотэжьыгъуае ­хъущт, — къытиIуагъ Сулейманов Юныс. — Лъэпкъ зэфэшъхьаф­хэр, ныбжьыкIэхэр, зыныбжь хэкIотагъэхэр тикъэгъэлъэгъонхэм ягуапэу яплъыгъэх.

— ГущыIэгъу шъуафэ­хъунэу игъо шъуифагъа?

— Спектаклэр къызэрэтыухэу упчIабэ къытатыщтыгъ. Ис­кусствэм зэлъыIэсыкIэ амалэу иIэхэм псэ зыпыт зэдэгущыIэгъухэр къахагъэщыщтыгъ. Тиартистхэм ярольхэр дэгъоу къа­шIыгъэхэу алъытэщтыгъ, къэгъэ­лъэгъоным пIуныгъэ мэхьанэу хэлъым анаIэ тырадзэщтыгъ.

— Искусствэм ныбджэгъукIэхэр щыжъугъотыгъэхэу къытэпIуагъ.

— Химки итеатрэ тапэкIи Iоф дэтшIэщт, тызэлъыкIощт. Адыгэ Республикэм икультурэ лъэшэу ашIогъэшIэгъоныгъ. Мыекъуапэ уикIыгъэу Урысыем икъэлэшхоу Москва узыкIокIэ, еплъыкIэу къыпфыряIэм уегъэгумэкIы.

— Сыда къышъуаIуа­гъэр?

— Тхьаегъэпсэух, лъэшэу къытщытхъугъэх, культурэ ин ти­Iэу алъытагъ.

— Москва хэкум шъу­кIоныр къин къышъущыхъугъа?

— Тафэраз Урысыем культурэмкIэ и Министерствэ, «Гастроль инхэм» язэхэщакIохэм. Адыгэ Республикэм и ЛIышъхьэу КъумпIыл Мурат республикэм культурэмкIэ иIоф­шIапIэхэм язэ­тегъэпсыхьажьын, унакIэхэр ашIынхэм зэрапы­лъым тегъэгушхо. Москва хэкум тыкIоным фэшI Адыгеим культурэмкIэ иминистрэу Аулъэ Юрэ IэпыIэгъу къызэрэтфэхъугъэр къыхэзгъэщы, гъэзетымкIи «тхьауегъэпсэу» есIожьы сшIоигъу.

— Къэралыгъо гъэпсыкIэ иIэу Адыгеир зыпсэу­рэр илъэси 100 шIэхэу хъущт.

— Москва хэкум мэфи 4 тыщыIагъ. Адыгеим ыцIэ дахэкIэ дгъэIугъэ. Республикэр на­хьышIоу бэмэ ашIагъ. Москва экскурсиеу щытагъэшIыгъэр тщыгъупшэжьыщтэп. Кремлым ыпашъхьэ тыщытэу къэбархэр къызэфэтIотагъэх. Адыгеим имэ­фэкI фэгъэхьыгъэ къэгъэ­лъэгъонхэр зэхэтщэщтых, хьа­кIэхэр Москва хэкум къикIыщтхэу тэгугъэ. Титеатрэ иныбджэгъушIоу, Къэбэртэе-Бэлъкъарым изаслуженнэ артистэу Абанэкъо Руслъан тигъусагъ. Ащ къызэриIуагъэу, егъэжьэпIэшIухэр тшIыгъэх.

— Лъэпкъ шIэжьым гумрэ псэмрэ зэрепхых. Мыекъуапэ шъукъызэ­кIожьым уиIофшIэн кIэу хаплъхьэ пшIоигъоу сыда узэгупшысагъэр?

— Искусствэр бай дэдэу щыт. Дунаим нахьышIоу тирес­публикэ щашIэным нахь куоу сыфэлажьэ, фольклорыр IэубытыпIэ сшIы сшIоигъу. ЦIыф Iушхэр, цIыф гъэшIэгъонхэр Адыгэ Респуб­ликэм щэпсэух. СыгукIэ салъы­Iэсыныр симурад шъхьаIэхэм ащыщ.

— Уигухэлъхэр къыб­дэ­хъунхэу пфэтэIо.

— Тхьауегъэпсэу.

ЕмтIылъ Нурбый.