Темыр Кавказым ия III-рэ зэIухыгъэ ныбжьыкIэ кинофестивалэу «Кино­Кавказым» хэлажьэ зышIоигъохэм шэкIогъум и 24-м нэс ялъэIу тхылъхэр зэхэщакIохэм афагъэхьын фае.

Зэнэкъокъум джэгукIэхэм афэгъэхьыгъэ метраж кIэкI фильмхэр, телевизионнэ до­кументальнэ фильмэ кIэкIхэр, социальнэ Iофыгъохэм яхьы­лIагъэхэр, нэмыкIхэри щызэ­рагъэпшэщтых.

Адыгэ Республикэм культурэмкIэ и Министерствэ икъу­лыкъушIэу, тарихъ шIэныгъ­эхэм­кIэ кандидатэу Теуцожь Нурыет зэхэщэкIо купым иIофыгъохэр зэрэлъыкIуатэхэрэм та­­щигъэгъозагъ.

ИскусствэхэмкIэ Темыр-Кавказ къэралыгъо институтыр Налщык дэт, Темыр Кавказым ащ фэдэ институтэу итыр зыцIэ къетIуагъэр ары. Рагъэжьэгъэ проектыр щыIэныгъэм щыпхыращызэ, Темыр Кавказым икинематографистхэм ямыза­къоу, Урысыем ишъолъырхэм искусствэхэмкIэ яIофышIэхэр зэфещэх.

Кинор зышIогъэшIэгъон ныбжьыкIэхэр фестивалым хагъэлажьэхэзэ, лъэпкъхэр, лIэужхэр зэфащэх, кинематографием зырагъэушъомбгъу.

Кинофестиваль-зэнэкъокъум иосэшI куп ипащэр Урысыем кинематографиемкIэ икъэра­лыгъо университет киномкIэ ыкIи телевидениемкIэ курсым икIэлэегъаджэу С. А. Герасимовар ары.

Зыфэгъэхьыгъэр

ДжэгукIэхэм афэгъэхьыгъэ метраж кIэкI фильмэ анахь дэгъур осэшIхэм къыхахыщт. Телевизионнэ документальнэ фильмэу шъыпкъэр анахь дэгъоу къэзыгъэлъагъорэр, социальнэ видеоролик анахь дэгъур, метраж кIэкI анимационнэ фильмэ анахь дэгъоу алъытэрэр зэхэщакIохэм къыхахыщтых.

Искусствэр зышIогъэшIэгъонхэр, шъуеужьыр, зэнэкъокъум шъухэлэжьэнэу зяжъугъэтх. Илъэс 16-м щегъэжьагъэу 35-м нэс зыныбжьхэр зэнэкъокъум хэлэжьэнхэ алъэкIыщт. Хэт сыд фэдэ фильмэ тырихыгъэми, иIофшIагъэ кIодыщтэп, ищыIэныгъэ шIукIэ къыхэнэщт, гукъэ­кIыжь лъапIэу иIэщт. Искусствэм цIыфыр епIу, щыIэныгъэм фегъасэ. ЗэхэщакIохэм ащ мэхьэнэ ин раты.

ЗэлъыIэсыкIэ амалхэр

Артем Челикиныр продюсер, телефоныр: +7(928)914-17-84; Ажъой Зарин — продюсер, +7(928)078-17-81; Ирина Богачевар пресс-гупчэм ипащ, +7(905)437-30-00.

ЕмтIылъ Нурбый.