Лъэпкъ зыкIыныгъэм и Мафэ ыпэгъокIэу мэфэкI зэхахьэ Мыекъуапэ икIэлэцIыкIу IыгъыпIэу N 5-м щыкIуагъ.

Мыекъуапэ икъэзэкъ отдел ипащэу Александр Даниловыр, Мыекъопэ районым щыпсэурэ къэзэкъэу общественнэ Iофхэм чанэу ахэлэжьэрэ Василий Марковичыр кIэлэцIыкIухэм афэгушIуагъэх.

Къэзэкъхэм ятарихъ, шэн-хабзэхэм кIэлэцIыкIухэр нахьышIоу ащыгъэгъозэгъэнхэм сабый IыгъыпIэу «Дельфинен­кэм» ипащэхэр пылъых. КIэлэпIоу Светлана Сандаковам къэзэкъхэм яшъуашэ, яIашэ, шэн-зэхэтыкIэхэм, нэмыкIхэм афэгъэхьыгъэ къэбархэр къыIотагъэх.

УпчIэхэм яджэуапхэр къятыжьыгъэнхэм ехьылIэгъэ зэнэкъокъоу зэхаща­гъэм кIэлэцIыкIухэр ягуапэу хэлэжьагъэх. Джэуапхэр зэгъэкIугъэхэу, кIэкIэу сабыйхэм къатыжьхэзэ, зэхахьэр гъэшIэгъонэу кIуагъэ.

Наталья Уваровам ыцIэ зыхьырэ творческэ IофшIапIэу «Звонницэм» зыщызыгъасэхэрэм, пащэр Дина Новикова, орэдхэр къаIуагъэх, уджыгъэх, кIэлэцIыкIухэр агъэгушIуагъэх.

КIэлэцIыкIу IыгъыпIэм икуп хэтхэр дахэу къэшъуагъэх, шэн-хабзэхэр зэрахьэхэзэ искусствэм ибаиныгъэ къагъэлъэгъуагъ.

Шэн-хабзэхэр

— Адыгэ Республикэм икIэлэцIыкIу IыгъыпIэхэм лъэпкъ культурэм фэгъэ­хьыгъэ чIыпIэхэр къащызэIухыгъэнхэм кIэщакIо ыкIи зэхэщакIо фэхъугъ Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъу­хэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, — къыщиIуагъ зэхахьэм Мыекъопэ къэзэкъ отделым ипащэу Александр Даниловым. — Хэгъэгум ипатриот шъыпкъэхэр дгъэсэнхэмкIэ мурадэу тиIэхэр къызэрэддэ­хъущтхэм тицыхьэ телъ.

Сэнаущыгъэ зыхэлъ кIэлэцIыкIухэр «Дельфиненкэм», нэмыкIхэм ащагъасэх. Ясабыигъом шэн-хабзэу ахалъхьэрэр щыIэныгъэм щыпхыращызэ, лIэужхэм язэпхыныгъэ агъэпытэ.

Нэрылъэгъу IэпыIэгъухэр агъэфедэхэзэ кIэлэцIыкIу IыгъыпIэхэм лъэпкъ шэн-хабзэхэм афэгъэхьыгъэ чIыпIэхэр къащызэIуахыгъэх. Урысхэм, адыгэхэм, къэзэкъхэм, къэндзалхэм, нэмыкI лъэпкъ­хэу Адыгэ Республикэм щыпсэухэрэм ятарихъ, якультурэ сурэтхэмкIэ къагъэ­лъагъо.

Непэ кIэлэцIыкIухэм алъэгъурэр, зэха­хырэр агу раубытэ. ЩыIэныгъэм дэхагъэу хэлъыр апкъынэ-лынэхэм ахэхьанхэмкIэ псэ зыпыт зэIукIэгъухэр зыгъэсапIэ афэхъух.

Екатерина Загорулько.