ЦIыфхэм аготэу щыIагъ, тхагъэ
Тиадыгэ литературэ нэмыкI лъэпкъ литературэхэм бэкIэ анахьыкI, джыри илъэси 100 хъугъэп зыщыIэр. Ауми, титхакIохэм, усакIохэм гуетыныгъэ фыряIэу тилитературэ ипэIухъо къызэIуахыгъ, нэмыкI цIыф лъэпкъхэм ялитературэхэм ауж къинэхэрэп.
Непэ зыцIэ къесIомэ, шъугу къэзгъэкIыжьымэ сшIоигъор зэлъашIэрэ тхакIоу, цIыф жъугъэхэм зитхыгъэхэмкIэ анахь апэблагъэу ыкIи якIасэу Пэнэшъу Сэфэр Иляс ыкъор ары. Ар Теуцожь районым итыгъэ къуаджэу Къэзэныкъоежъым (хычIэгъ хъугъэ) чъэпыогъум и 29-м, 1930-рэ илъэсым къыщыхъугъ. 1957-рэ илъэсым Пшызэ мэкъумэщ институтыр къыухыгъ агрономэу. Ау исэнэхьаткIэ колхозым илъэситIу Iоф зэрэщишIагъэр. 1959-рэ илъэсым къыщегъэжьагъэу 1998-рэ илъэсым нэс гъэзетэу «Социалистическэ Адыгеим», нэужым «Адыгэ макъэм» корреспондентэу, отделым ипащэу, редактор шъхьаIэм игуадзэу Iоф щишIагъ. 1998-рэ илъэсым къыщегъэжьагъэу кIэлэцIыкIу журналэу «Жъогъобыным» илъэс 20 Iэпэ-цыпэм иредактор шъхьэIагъ.
Пэнэшъу Сэфэр ытхыхэрэр къыхиутыхэу 1965-рэ илъэсым ригъажьи, илъэс 50-м ехъурэм къэлэмыр зэ ыгъэтIылъыгъэп, IофшIэкIошхуагъ. Ащ фэдиз илъэсхэм Сэфэр сэмэркъэу ыкIи лакъырд тхыгъэхэмкIэ ыубли, рассказхэмкIэ, повестхэмкIэ, романхэмкIэ кIэкIыжьэу тхылъыбэ адыгабзэкIэ ытхыгъ, къыдигъэкIыгъ. Ахэр адыгэ щыIэкIэ-псэукIэм ыкIи цIыфхэм ягъашIэ ащ зэрэщыкIащырэм яхьылIагъэх. Сэфэр лъэшэу цIыф нэжгъурэу щытыгъ, ылъэгъуи, зэхихи, къаIуи, къашIи, къэралыгъо Iофыгъохэр пащэхэм зэрэзэшIуахыхэрэри, хьилэгъэ- къончагъэ зезыхьэхэрэри, уехъопсэнэу цIыфышIухэр зэрэмымакIэри, тикъэралыгъо гъэпсыкIэ шIоу хэлъыри, мытэрэзэу хэплъагъорэри итхылъхэм гъэшIэгъонэу, лъэныкъуабэр къызэдиубытэу къащыриIотыкIыгъ.
ТхакIом илитературнэ образхэр тхылъеджэхэм агу нэсых, сыда пIомэ ахэм яшIыкIэ-IуакIи, ягъэпсыкIи ежь ылъэгъурэ пстэумэ атыришIыкIыгъ. Сэфэр ирассказхэм, исэмэркъэу тхыгъэ зэфэшъхьафхэм («Пшэсэн», «Зэмыжэгъэхэ хьакIэхэр», «Къэцпэнэ Iэрам») щыIэныгъэ хъугъэ- шIагъэхэр алъапс. Иапэрэ повестэу «УшэтыпI» зыфиIорэм, «ШIулъэгъур нахь лъэш», «Псы къаргъом ычIэгъ», «Шъоу дыдж», нэмыкIхэми цIыфым, адыгэ лъэпкъым пэкIэкIыгъэ охътэ пычыгъор, ар зыфэдагъэр; ежь цIыфым ышъхьэ къырыкIуагъэр – къыдэхъугъэр е зымыгъэхъугъэу илъэгъо зэныбжь тезыщыгъэр сурэтышхоу тынэ къыкIагъэуцо; гъашIэ бгъэшIэныр тхъагъоми, уфэмысакъымэ, а щыIэныгъэ дэдэм уекIодылIэжьын зэрилъэкIырэр ироманэу «Бэджэхъ» цIэу зыфишIыгъэм узIэпищэу, сюжетыр фэкъулаеу ыгъэпсызэ, Пэнэшъу Сэфэр къыщыриIотыкIыгъ.
Тхэн-гупшысэн лъагъор гъашIэ зыфэхъугъэгъэ тхэкIуагъ Сэфэр. ЩыIэныгъэр кIэзыгъэнчъэу зэпиплъыхьэмэ, ыпщыжьымэ, ызыжьызэ произведение гъэшIэгъонхэр, образ чъэпхъыгъэхэр къытыгъэх. Сэфэр итхылъхэр цIыфхэм афыриIэ гуфэбагъэр къахэщэу еджэгъошIух, уасэ ахэм нахь афэозыгъэшIырэр ухэтми, зыгорэущтэу — уишэнкIэ, уиIокIэ-шIыкIэкIэ, уикъэраркIэ узыфэдэ геройхэр бэу ахэм зэрахэбгъуатэхэу, узэрэзэрагъэплъыжьырэр ары.
Пэнэшъу Сэфэр тхэкIо къодыягъэп, ар ижьыкъэщэ гупсэфыгъ, мытхэуи щысыни щыIэни ылъэкIыщтыгъэп. Итхылъ пэпчъ зы лъэпкъ тхыд: «Хым ишъхьал мэхьаджэ» «Хьилагъ», «УIэгъэжъхэр», «Шъоу дыдж», «Бэджэхъ».
ТхакIом тарихъ лъапсэ ыкIи мэхьанэ зыкIоцIылъ тхылъхэм афэшъхьафэу шIулъэгъум фэгъэхьыгъэхэри, ар зыфэдэр ыкIи зэрэчэгъошIур, уфэмысакъмэ, зэрэщэнаут шъыпкъэр, шIомыкIым зэрэфэдэр щыкIигъэтхъыгъ ироманэу «ШIулъэгъумрэ шIомыкIымрэ» зыфиIорэм. ШIулъэгъу мыгощыгъэм ехьылIэгъэ рассказэу бэ иIэри.
КIэзгъэтхъымэ, къыхэзгъэщымэ сшIоигъу джыри зэ Пэнэшъу Сэфэр тхэн-гупшысэным лъэш дэдэу зэрэпылъыгъэр. УрысыбзэкIэ къыдэкIыгъэ тхылъхэри иIэх: «Букет колючек» зыфиIорэр Москва 1981-рэ илъэсым къыщытырадзагъ, «Братья Шеваековы» — 1981-рэ, «Сыновний долг» зышъхьэри Москва къыщыдэкIыгъэх.
Пэнэшъу Сэфэр ытхыгъэхэм ащыщхэр журналхэу «Зэкъошныгъ», «Кубань», «Дон», «Крокодил» ыкIи «Литературная Россия» зыфиIохэрэм къыхаутыгъэх.
Повестэу «Псы къаргъом ычIэгъ» зыфиIорэм пае Теуцожь Цыгъо ыцIэкIэ агъэнэфэгъэ премием 1990-рэ илъэсым тхакIор илауреат хъугъэ. Литературнэ-творческэ лъэгъо зэныбжь дахэ тиадыгэ литературэ щыпхырищыгъ, игъэхъагъэхэм яфэшъошэ уасэ къафашIыгъ. Сэфэр «Адыгэ Республикэм инароднэ тхакIу» ыкIи «Адыгэ Республикэм культурэмкIэ изаслуженнэ IофышI» зыфиIорэ щытхъуцIэхэри къыфагъэшъошагъэх.
Пэнэшъу Сэфэр УФ-м итхакIохэм я Союз 1977-рэ илъэсым къыщегъэжьагъэу хэтыгъ. ТхэкIо нахьыжъыр къызытхэмытыжьыр джыри илъэс хъугъэп, ежь идунай ыхъожьыгъэми, игушъхьэлэжьыгъэкIэ къытхэтыщт. ЦIыфхэр лъэшэу икIэсагъ, илъэпIагъ, аготэу щыIагъ ыкIи тхагъэ.
Мамырыкъо Нуриет.