Адыгэ Республикэм ит къуаджэмэ янахьыбэм орэдхэр афаусыгъэх. МэфэкI мафэхэр хагъэунэфыкIы зыхъурэм а орэдхэр къаIох, рыгушхохэзэ ячылэхэм ягугъу ашIы.

Ар IофыгъошIоу щыт ыкIи лъэпкъым зиужьыжьынымкIэ мэхьанэшхо зиIэхэм ащыщ. Тэри, Джэджэхьаблэ дэсхэми, ащ къыдэкIыгъэхэми, тиIэнэу тыфэягъ къоджэ орэд, гимным фэдэу, гур къыIэтэу, тыкъызщыхъугъэ ыкIи тызыщапIугъэ чIыпIэм тыригъэгушхонэу! Бэрэ игугъу тшIыгъэ, охътаби тедгъэшIагъ, ау Iофым кIэухышIу фэхъугъ: Джэджэхьаблэ фэгъэхьыгъэ орэдыр щыIэ хъугъэ. ГущыIэхэр сэ стхыгъэх, орэдышъом дэлэжьагъ зэлъашIэрэ композиторэу ЛIыбзыу Аслъан. Орэдыр къэзыIорэр Дзыбэ Руслъан.

Тикъуаджэ щыщхэу орэдыр зэхэзыхыгъабэ телефонымкIэ къытфытеуагъ, рэзэныгъэ гущыIэхэр къыта­Iуагъ. Тэри тичылэ гупсэ шIухьафтын зэрэфэтшIышъугъэр, ар тикъоджэгъухэм агу зэрэрихьыгъэр лъэшэу гуапэ зэрэтщыхъугъэр, тапэкIи Джэджэхьаблэ ищытхъу тиамал къызэрихьэу лъагэу зэрэтIэтыщтыр ятIожьыгъ.

Орэдыр щыI, тамэ къыгокIэ, Джэджэхьаблэ фэгъэ­хьыгъэ къэтынэу зэлъашIэрэ журналистэу Беданэкъо Замирэ мы мафэхэм Iоф зыдишIэрэм ащ имэкъамэхэр кIигъэхьащтых, къуаджэм итеплъи ицIыфхэри хэтхэу клип дахи къытфигъэхьазырыщт.

Дэрбэ Тимур.

Джэджэхьаблэ иорэд

ЛIакъом къыщежьэ лъэпкъым ылъапсэ, Лъэпкъым ылъапсэр адыгэ къуаджи, ей. Хъишъэм зэу щыщэу къехьы игъашIэ Ти Джэджэхьаблэу щытхъур зыдэжьыр, ей. Жъыу: Гур къэзгъэфабэу тикъоджэ шIагъор, Къэогъэнафэ тинасып лъагъор! ЩыIэба ренэу, ти Джэджэхьабл, Адыгэ лъэпкъым жъуагъоу къыфабл!

Нышъо шъоупсэу о тэ утиIи, Чыжьэу тыщыIэу тыкъыпфэзэщи, ей. ТыкъызыкIожьрэм фабэ уиIаплIи, УиIуплъэ дахи тегъэгушхожьи, ей.

Типсыхъоу Мартэ ичъэн къыщэкIэ, Мэзэу щыIагъэр уахътэм хэкIуадэ, ей. Ащ пай къэмынэу о окIэракIэ, Уигугъэ баи, шIум уфэкIуатэ, ей.

УикIали пшъашъи ренэу уигъусэх, Сыд фэдэ къини зэдаIэтыгъи, ей. Адыгэ хабзэм цIыкIухэр фагъасэх, АшIэ тарихъыр, ашIэ нартыгъор, ей.