Адыгэ республикэ кIэлэцIыкIу тхылъеджапIэр загъэпсыгъэр илъэс 85-рэ зэрэхъугъэм ехъулIэу, чъэпыогъум и 27-м республикэ семинарэу «Джырэ кIэлэцIыкIу тхылъеджапIэр еджэным ыкIи зыгъэпсэфыным яшъолъыр» зыцIэр зэхащагъ.

МэфэкI Iофтхьабзэм хэлэжьагъэх АР-м культурэмкIэ иминистрэу Аулъэ Юрэ, культурэмкIэ Министерствэм иотдел ипащэу Ацумыжъ Лианэ, республикэ ыкIи муниципальнэ тхылъеджапIэхэу Адыгеим итхэм ялIыкIохэр, къэралыгъо ыкIи чIыпIэ гъэсэныгъэ учреждениехэм къарыкIыгъэхэр, журналистхэр.

Семинарым пшъэрылъэу иIагъэр тхылъеджэхэм IофшIэкIэ амалхэмкIэ адэгощэнхэр, еджэным кIэлэцIыкIухэр кIэгъэгушIугъэнхэмкIэ ыкIи къещэлIэгъэнхэмкIэ шIуагъэ зиIэ шIыкIэ- амалыкIэхэр къыхэхыгъэнхэр, тхылъеджапIэр зытегъэпсыхьагъэм елъытыгъэу, еджэным, творчествэм, гъэсэныгъэм ыкIи тхылъеджэ цIыкIу пэпчъ зыкъя­гъэIэтыгъэным зэрэфэлажьэрэр кIэгъэтхъыгъэныр ары.

Джырэ тхылъеджапIэм, тапэкIэ фэмыдэу, кIэлэцIыкIухэм Iоф зэрадишIэщт шIыкIэр нэ­мыкI шъыпкъэу зэрихъокIыгъ: еджэпIэ чIыпIэр зэтырагъэпсыхьагъ, зэдэгущыIэкIэ-зыгъэпсэфыкIэ амалыр нахь ыгъэлъэшыгъ, ащкIэ шъошакIэхэр IэубытыпIэу иIэхэу ыпэкIэ лъэкIуатэ.

Республикэ семинарыр мэфэкI нэшанэр къыхэщэу щы­тыгъ: тхылъеджэпIэ чIэхьапIэм хьа­кIэхэм ыкIи Iофтхьабзэм хэлажьэхэрэм литературнэ персо­нажхэу Буратинэрэ Мальвинэрэ къащыпэгъокIых, ахэр тхылъ­еджапIэм илэгъух (мы илъэсым А. Толстоим итхылъэу «Золотой ключик, или Приключения Буратино» къызыдэкIыгъэр илъэс 85-рэ мэхъу).

Семинарым хэлажьэрэ пэпчъ ишIошI къыIон, иеплъыкIэ, ащ изэшIохынкIэ шIэгъэн фаер къыушыхьатын амал иIагъ. КIэ­лэцIыкIу тхылъеджапIэм имурад иныр кIигъэтхъын фэягъ — тхы­лъым ичIыпIэ, имэхьанэ, ащ пIуныгъэ-гъэсэныгъэ уасэу е еджакIохэм гухахъо зыхагъуатэу алъытэрэр къыхагъэщыныр апэрагъ. АщкIэ семинарым хэлажьэхэрэм амал зэфэдэу аритыгъ, библиотекарьхэм ыкIи къекIолIэгъэ пстэуми ягумэкI-гулъытэхэр, зыдырагъаштэрэр, зыдырамыгъаштэрэр къаIон фитыгъэх, хэти иIофшIэн IэпэIэ­сэныгъэкIэ къадэгощэн ылъэ­кIынэу Iизын ратыгъагъ.

Республикэ семинарыр шIу­фэс пэублэ гущыIэкIэ къызэIуи­хыгъ АР-м культурэмкIэ иминистрэу Ю.Ш. Аулъэм. Ащ къы­кIэлъыкIуагъэх къиIотыкIынхэр. Iофтхьабзэм хэлажьэхэрэмкIэ анахь гъэшIэгъоныгъ культурэмкIэ Краснодар къэралыгъо институтым къикIыгъэхэу О.Н. Уржумовам ыкIи А.В. Штратниковам къашIыгъэ псалъэхэр, тхылъеджапIэм ибренд зэрэбгъэпсыщтым ыкIи цIыфхэр на­хьыбэу къепщэлIэнхэмкIэ шIыкIэ-амалхэм язэшIохынкIэ технологиякIэхэм яшIуагъэу къа­кIорэр ахэм къыраIотыкIыгъ.

Семинарым хэлажьэхэрэр яшъыпкъэу едэIугъэх купкI зиIэ къиIотыкIынэу къалэу Мыекъуа­пэ и ЦБС ипащэ библиотечнэ IофшIэнымкIэ игуадзэу Ксения Гордиенкэм къышIыгъэм, модельнэ кIэлэцIыкIу тхылъеджапIэм интерактивнэ Iэмэ-псымэу иIэ хъугъэхэр зэрэбгъэфедэщтхэм ар яхьылIэгъагъ.

Семинарым къыды­хэлъы­тагъэу республикэ зэнэ­къо­къум итворческэ IофшIагъэу «Сказки доброго волшебника» зыфиIоу зэлъашIэрэ урыс тха­кIоу, пшысэIуатэу, драматургэу Е.Л. Шварц къызыхъугъэр илъэ­си 125-рэ зэрэхъугъэм ехъулIэу зэхащэгъагъэм зэфэхьысыжьхэр фа­шIыгъэх ыкIи текIоныгъэр къыдэзыхыгъэхэр агъэшIуагъэх.

Республикэ семинарым къыгъэлъэгъуагъ кIэлэцIыкIу тхылъеджапIэхэм гуетыныгъэ ин хэ­лъэу яIоф зэрагъэцакIэрэр, зы чIыпIэ зэримытхэр, амал-шIыкIакIэхэр къагъотыхэзэ апэкIэ зэрэлъыкIуатэхэрэр.

Илъэс къэс тхылъеджапIэхэр нахь лъэпсэ пытэ ыкIи культурэ-гъэсэныгъэ-гъэпсэфыпIэ чIыпIэ зэрэхъухэрэр, яIофшIэн купкIи, шъуаши зэрэфашIырэр, а зэкIэ кIэлэеджакIохэр – щыIэ­кIакIэм игъэпсэкIощтхэр цIыфы хъунхэм зэрэфэлажьэрэр. МэфэкI Iофтхьабзэр лъэныкъуабэ­кIэ шIуагъэ къытэу зэхэлъыгъ, хэлэжьагъэхэми агу рихьыгъ.

Мамырыкъо Нуриет.