АР-м икомиссиеу терроризмэм пэшIуекIорэм изэхэсы­гъоу тыгъуасэ щыIагъэм гъэсэныгъэ языгъэгъотырэ организациехэр террористическэ актхэм ащыухъу­мэгъэнхэм, терроризмэм пэуцужьыгъэнымкIэ хабзэм игъэцэкIэкIо, имуниципальнэ къулыкъухэм яIофышIэхэм яIэпэIэсэныгъэ зыкъегъэIэтыгъэным япхыгъэ Iофыгъохэм ыкIи нэмыкIхэм щатегущыIагъэх. Видеозэпхыныгъэ шIыкIэм тетэу кIогъэ зэхэсыгъор Адыгеим и ЛIышъхьэу КъумпIыл Мурат зэрищагъ.

Зэхэсыгъом хэлэжьагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Урысые Федерацием и Президент и Полномочнэ лIыкIоу ЮФО-м щыIэм иаппарат Адыгэ Респуб­ликэмкIэ ифедеральнэ инспектор шъхьаIэу Сергей Дрокиныр, Адыгэ Республикэм и Премьер- министрэу Геннадий Митрофановыр, Адыгэ Республикэм и МВД, Адыгэ Республикэм ипрокуратурэ, щынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ, Росгвардием Адыгэ Республи­кэмкIэ и ГъэIорышIапIэ, муниципальнэ образованиехэм япащэхэр.

ЩынэгъончъэнымкIэ Федеральнэ къулыкъум Адыгэ Респуб­ликэмкIэ и ГъэIорышIапIэ ипащэу Сергей Каштановым зэхэсыгъом къызэрэщиIуагъэмкIэ, республи­кэм щыпсэурэ нэбгыри 10-мэ зэщыгъэкъон Iофхэр зэрамыхьан­хэу афагъэпытагъ. Хабзэм димыштэрэ Iофтхьабзэхэр социальнэ хъытыухэм зэращызэрихьагъэм фэшI зы кIэлэеджакIо горэм пшъэдэкIыжь рагъэхьыгъ.

Адыгэ Республикэм гъэсэны­гъэм­рэ шIэныгъэмрэкIэ иминистрэу КIэрэщэ Анзаур зэхэсыгъом зэрэщыхигъэунэфыкIыгъэм­кIэ, псэолъэ 291-рэ яминистерствэ къепхыгъ. ТхьамыкIагъо къызыхъукIэ макъэ зэрарагъэIу­рэ амалхэр ахэм ахагъэуцуа­гъэх, щынэгъончъэнымкIэ паспортхэр къыдахыгъэх. Террористическэ актхэм апэшIуекIорэ Iофтхьабзэхэр зэрахьанхэм пае Министерствэм къыфэIорышIэрэ учреж­дениехэм сомэ миллион 12 къафыхагъэкIыгъ.

Республикэм и ЛIышъхьэ зэрэхигъэунэфыкIыгъэмкIэ, терроризмэм пэшIуекIорэ комиссием ыштэрэ унашъохэм лъапсэ афэхъурэр Урысые Федерацием и Правительствэ иунашъохэр ары ыкIи 2021-рэ илъэсым ыкIэ нэс ахэр агъэцэкIэнхэ фае.

«Комиссием иунашъо ди­штэу ведомствэхэм Iофтхьабзэхэр зэкIэ аухын фае. Гъэсэ­ныгъэ языгъэгъотырэ учреждениехэр мылъкукIи, техникэкIи нахьышIоу зэтегъэпсыхьэгъэн­хэ зэрэфаеми, щынагъо къызыпыкIын зылъэкIыщтхэр къы­зэрэхагъэщыщт амалхэм язэхэщэни ар афэгъэхьыгъ», — къыIуагъ КъумпIыл Мурат.

Зэхэсыгъом хэлэжьагъэхэр хэбзэ къулыкъухэм яIофышIэхэу терроризмэм пэуцужьыгъэным фэгъэзагъэхэм яIэпэIэсэныгъэ зыкъегъэIэтыгъэн зэрэфаеми тегущыIагъэх. Мы IофыгъомкIэ къэгущыIагъэх АР-м и ЛIышъхьэрэ АР-м иминистрэхэм я Кабинетрэ къэралыгъо къулы­къум­кIэ ыкIи кадрэ политикэмкIэ я ГъэIорышIапIэ ипащэу Шъхьабэ Налбый, Адыгэ Республикэм и Комитетэу чIыпIэ зыгъэIоры­шIэжьынымкIэ къулыкъухэм адэ­лажьэрэм итхьаматэу КIэдыкIое Руслъан, Мыекъопэ къэралыгъо технологическэ университетым иректорэу Къуижъ Саидэ. Зэхэсыгъом зэрэщыхагъэунэфыкIыгъэмкIэ, Адыгэ Республикэм икъэралыгъо граждан къулыкъушIэхэр сэнэхьат гъэсэныгъэ тедзэ зэрарагъэгъо­тырэ программэмкIэ егъэджэгъэнхэм тегъэпсыхьэгъэ программэм фашIыгъэ зэхъокIыныгъэхэм адиштэу мыгъэ гъэцэ­кIэкIо хабзэм икъулыкъухэм яIо­фышIи 10 МКъТУ-м щеджагъ. 2021 — 2025-рэ илъэсхэм программэу «Адыгэ Республикэм имуниципальнэ къулыкъу зегъэу­шъомбгъугъэныр» зыфиIорэм диштэу муниципальнэ къулыкъу­шIэ 40 «Лъэпкъ, дин зэфыщытыкIэхэмкIэ Iофыгъохэр, экстремизмэм пэуцужьыгъэныр» зыфиIорэ курсымкIэ рагъэджагъ.

Республикэм и ЛIышъхьэ зэхэсыгъом хэлэжьагъэхэм анаIэ тыраригъэдзагъ терроризмэм пэуцужьыгъэным тегъэпсыхьэгъэ программэмкIэ къэралыгъо, му­ниципальнэ къулыкъушIэхэр ра­гъаджэхэ зыхъукIэ гугъуемы­лIыныгъэ къызхагъафэ зэрэмыхъущтым.

Урысые Федерацием и Правительствэ иунашъоу дин организациехэр терроризмэм щыухъумэгъэнхэм, щынэгъончъэнымкIэ паспортхэр ахэм къыдахынхэм афэгъэхьыгъэр зэрагъэцакIэрэми зэхэсыгъом щытегущыIагъэх. Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр Iофэу ашIагъэм къытегущыIагъ. Ащ къызэрэ­хигъэщыгъэмкIэ, дин организацие 89-рэ республикэм щызэхэщагъ, ахэр Урысыем юстициемкIэ и Министерствэ щатхыгъэх. Ахэм ащыщэу 62-мэ щынэгъончъэнымкIэ паспортхэр къыдахыгъэх, Росгвардием организации 4-р, унэе фирмэхэм организации 6-р къаухъумэ, организацие 52-мэ къэрэгъулхэр яIэхэп.

КъумпIыл Мурат пшъэрылъ афишIыгъ дин организациехэр терроризмэм щыухъумэгъэнхэмкIэ инженер-техническэ ыкIи нэмыкI Iофтхьабзэхэр псынкIэу зэрахьанхэу.

Адыгэ Республикэм и ЛIышъхьэ ипресс-къулыкъу