«АГУ-Адыиф» Мыекъуапэ — «Уфа-Алиса» Уфа — 26:23 (14:10). Чъэпыогъум и 24-м АР-м испорт Унэшхоу Кобл Якъубэ ыцIэ зыхьырэм щызэIукIагъэх. Зезыщагъэхэр: Станислав Александров, Евгений Синенко — тIури Москва.

«Адыиф»: къэлэпчъэIутхэр: Баскакова, Ламзина; ешIакIохэр: Клименко – 2, Никулина – 3, Кириллова – 1, Богданова – 5, Куцевалова – 2, Казиханова – 5, Казанджян – 3, Кобл – 5.

Урысыем гандболымкIэ изэнэкъокъоу суперлигэм щыкIорэм икупэу «Б-м» хэт командэхэр Мыекъуапэ щызэдешIагъэх. ЗэIукIэгъур заублэм, «Адыифым» текIоныгъэр къыдихыным нахь фэхьазырэу къэлъагъощтыгъ. ТиешIакIохэр апэкIэ зилъыхэкIэ псынкIэу къэлапчъэм екIущты­гъэх. УхъумакIохэр зэбгыращыхэзэ хъагъэм Iэгуаор радзэнымкIэ шIыкIабэ къагъотыщтыгъ.

Диана Казихановар джабгъу лъэныкъом ащыIэкIэкIи, жьым зэрэхэтэу къэлапчъэм дахэу Iэгуаор дидзагъ. Дианэ «Алисэм» дэгъоу а мафэм дешIагъ. ЕшIапIэм икъогъупэхэр «Адыифым» ыгъэфедэнхэмкIэ амалышIухэр къыгъотыгъэх. Анна Красновар, Дарина Никулинар, нэмыкIхэри къогъупэхэм ащешIэхэзэ щысэшIу къагъэлъэгъуагъ, «Адыифым» текIоныгъэр къыдихыным яIахь халъхьагъ.

Пчъагъэр зэнэкъокъум зэрэщылъыкIуатэрэм тигъэгушIощтыгъ: 2:0, 4:1, 7:2. Д. Богдановам метри 7 тазыр дзыгъор дэгъоу егъэцакIэ – 9:2. Я 26-рэ такъикъым Кобл Зурет ухъумакIохэм аIэкIэкIи, IапшъэкIэ ошIэ-дэмышIэу къэлапчъэм дэуагъ – 13:7. Д. Никулинам пчъагъэм хегъахъо – 14:8.

ЯтIонэрэ едзыгъом тигъэгумэкIэу къыхэкIыгъ. М. Тарасовам гъогогъуи 2 тикъэлапчъэ Iэгуаор къыдедзэ – 15:12. З. Коблыр гупчэм ащыпхырыкIызэ, хъагъэм зэкIэлъыкIоу Iэгуаор 2 редзэ – 16:12. «Алисэм» дэгъоу щешIэрэ П. Шатовам хэкIыпIэ гъэшIэгъонхэр къыгъотыхэзэ, хъагъэм Iэгуа­ор зэрэридзэщтыгъэм тигъэгумэкIыщтыгъ.

«Алисэм» метри 7 тазыр дзынхэмкIэ гъэхъагъэ ышIыщтыгъ. Гъогогъуи 8 тикъэлапчъэ къыдэ­уагъ, 6-р къыдидзагъ, зыр Л. Бас­каковам зэкIидзэжьыгъ, зэ къэлапчъэм блэугъ. «Адыифым» тазыр дзыгъохэр гъогогъуи 4 ыгъэцэкIагъэх, зэкIэри Д. Богдановам хъагъэм ридзагъэх.

Пчъагъэр – 19:17, зэIукIэгъур аухынымкIэ такъикъ 16 къэнагъ. П. Шаталовам тIогъогогъо хъа­гъэм Iэгуаор редзэ – 24:21. «Адыифыр» текIоныгъэм ишъыпкъэу фэбанэ. А. Куцеваловар, А. Казанджян, З. Коблыр, нэмыкIхэри мэгуIэх: 25:21, 25:22, 26:22, З. Коблым хъагъэм Iэгуаор ридзагъ. ЗэIукIэгъур зыщаухыщтым М. Тарасовам тикъэлапчъэ Iэгуаор къыдедзэ – 26:23. «Адыифыр» ыпэкIэ илъызэ зэнэкъокъур аухыгъ.

Полина Шаталовар «Алисэм», Людмила Баскаковар «Адыифым» анахь дэгъоу ащ ешIагъэхэу къы­хахыгъэх, нэпэеплъ шIухьафтынхэр афашIыгъэх.

«Адыифым» итренер шъхьаIэу Александр Реввэ тиешIакIохэм къащытхъугъ. «Алисэм» иешIакIэ зэрэхигъахъорэм мэхьэнэ хэхыгъэ ритыгъ.

ЗэIукIэгъухэр

«Ставрополье» Ставрополь – «Уфа-Алиса» Уфа – 24:26, «Динамо-Синара» Волгоград – «Луч» Москва – 24:16.

ЧIыпIэхэр

Купэу «Б»-р 1. «Динамо» – 12 2. «АГУ-Адыиф» – 7 3. «Университет» – 7 4. «Ставрополье» – 4 5. «Луч» – 4 6. «Уфа-Алиса» – 2.

Чъэпыогъум и 29-м «Адыифыр» Ставрополь щыIу­кIэщт «Ставропольем». ШэкIогъум и 11-м «Адыифыр» «Динамэм» Мые­къуапэ щыдешIэщт, и 14-м «Университетым» тикъалэ щы­IукIэщт.

Сурэтхэм арытхэр: Людмила Баскаковам фэгушIох; «Ады­­ифыр» «Уфам» дешIэ.