СтIашъу Юрэ итхылъ фэгъэхьыгъ
ЮНЕСКО-р къыфэраз
ЗэлъашIэрэ сурэтышI-модельерэу СтIашъу Юрэ ыныбжь илъэс 90-рэ зыщыхъурэм ехъулIэу Мыекъуапэ къыщыдагъэкIыгъэ тхылъыр ЮНЕСКО-м лъыIэсыгъ.
Адыгэ Республикэм и Правительствэ IэпыIэгъу къафэхъуи, Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет, КъокIыпIэм и Къэралыгъо музей, КъокIыпIэм щыпсэурэ лъэпкъхэм искусствэхэмкIэ я Къэралыгъо музей и Темыр-Кавказ къутамэ «Через дизайн к миру. В мире мифов и реальности» зыфиIорэ тхылъыр урысыбзэкIэ ыкIи инджылызыбзэкIэ къыдагъэкIыгъ.
СтIашъу Юрэ тхылъыр ЮНЕСКО-м ыгъэхьыгъ. Бэ темышIэу рэзэныгъэ зыхэлъ тхыгъэ юбилярым къыIукIэжьыгъ.
ЮНЕСКО-м ипащэ ыцIэкIэ Рикардо де Гемарес Пинто къытхыгъэм къыщеIо Ю. СтIашъум лъэшэу къызэрэфэразэхэр: «Шъуихэгъэгу ыкIи дунаим культурэ зэфэшъхьафыбэ яIэу зэрэщытыр искусствэм ипроизведениехэмкIэ игъэкIотыгъэу къэогъэлъагъо. Ащ фэдэ зэпхыныгъэ зиIэ IофшIагъэхэм цIыфхэр зэфащэх, гъунапкъэхэр зэIуахых. ЮНЕСКО-м имурад шъхьаIэхэм ар ащыщ».
СтIашъу Юрэ иIофшIагъэ, щыIэныгъэм еплъыкIэу фыриIэм афэгъэхьыгъэ тхылъыр шъо зэфэшъхьафхэмкIэ гъэкIэрэкIагъэ. Шъуашэу, тхыпхъэу, сурэтэу къыгъэлъагъохэрэр дахэх, узыIэпащэ. Адыгэ Республикэм и Къэралыгъо академическэ къэшъокIо ансамблэу «Налмэсым» иартистхэм СтIашъу Юрэ ышIыгъэ шъуашэхэр «къагъэгущыIэх».
Артистхэм шъуашэхэр ащыгъэу уяплъы зыхъукIэ, сурэтышI-модельерым игупшысэхэр нахь куоу къызэIухыгъэнхэм яIахьэу хэлъыр олъэгъу. Шъуашэхэу «Саер», «Адыифыр», «ТекIоныгъэр», «Гекатей ишъуашэ», Михаил Черкасскэм фэгъэхьыгъэ шъуашэр, «Тыргъэтаор», «Нэфылъ бзыур», къушъхьэу «Фыщтым» епхыгъэ шъуашэр, шъуашэхэу «Лащынэр», «Саусэрыкъор», гъобэкъое амазонкэу «Налкъутэр», фэшъхьафхэри гум къылъэIэсых.
СтIашъу Юрэ иIофшIагъэ къытегущыIэрэ тхылъым цIыфыбэ къыкIэупчIэ. Лъэпкъ зэфэшъхьафхэу Адыгэ Республикэм исхэр, адыгэу IэкIыб къэралхэм ащыпсэухэрэр тхылъым еджэхэ, гъэпсыкIэу иIэм еплъыхэ ашIоигъу.
Бэ темышIэу тхылъыр адыгабзэкIи, урысыбзэкIи къыдагъэкIынэу зэхэщакIохэм ямурад. Зэрэдунаеу алъыIэсыщт тхылъым Адыгэ Республикэм ищытхъу ыIэтыщт, СтIашъу Юрэ иIофшIагъэ нахь зэлъашIэщт.
Сахьидэкъо Нурбый.
