ШIэныгъэлэжь-физикэу А. Д. Сахаровым фэгъэхьыгъагъ
А. Д. Сахаровыр къызыхъугъэр илъэси 100 зэрэхъугъэм ипэгъокIэу Адыгеим и ЛIышъхьэ иунашъокIэ Iофтхьэбзэ зэфэшъхьафхэр республикэм щызэхащагъэх ыкIи щырагъэкIокIых.
Чъэпыогъум и 21-м гуманитар ушэтынхэмкIэ Адыгэ республикэ институтэу Т. М. КIэращэм ыцIэ зыхьырэм зичэзыу Iэнэ хъурае шIэныгъэлэжь-физикэу, Нобелевскэ премием мамырныгъэмкIэ илауреатэу, фитныгъэухъумакIом ишIэжь фэгъэхьыгъэу щыIагъ.
МэфэкI Iофтхьабзэр пэублэ гущыIэкIэ къызэIуихыгъ филологие шIэныгъэхэмкIэ докторэу, институтым идиректор игуадзэу Биданэкъо Марзият. Апэрэ Iэнэ хъураер бэдзэогъум и 29-м зэхащэгъагъ. Ащ А. Д. Сахаровым ишIэныгъэ ыкIи иобщественнэ IофшIагъэ зынэсыхэрэр къыщыраIотыкIыгъ.
Мы мафэхэм щыIэгъэ Iэнэ хъураем академикэу А. Д. Сахаровым Iофышхоу ылэжьыгъэу, зэшIуихыгъэхэм ямэхьанэ зынэсырэр ыкIи яшIуагъэу къэкIуагъэр щагъэунэфыгъ.
ГущыIэ шъхьаIэу «А. Д. Сахаров — один из организаторов правозащитной организации «Московская Хельсинская группа» и ее деятельность в СССР» зыфиIорэр къышIыгъ тарихъ шIэныгъэхэмкIэ кандидатэу, АКъУ-м идоцентэу С. Хь. Нэджыкъом. А. Д. Сахаровым СССР-м фитныгъэр къыщыухъумэгъэнымкIэ Iофышхоу зэшIуихыгъэм игугъу къышIыгъ, щысэхэр къыхьыгъэх, дунэе общественностым ахэм уасэ зэраритыгъэр къыIуагъ. Къыщыуцугъ анахьэу экологие Iофыгъо инэу цIыфхэр а илъэсхэм зыгъэгумэкIыгъэхэу, чIыопс псыугъоипIэу, хыкъумэу «Байкал» къэухъумэгъэным, лIэужхэмкIэ мэхьанэшхо зиIэу щытыгъэм зэрэдэлэжьагъэм.
Iэнэ хъураем хэлажьэхэрэр яшъыпкъэу ядэIугъэх тарихъ шIэныгъэлэжьэу, гуманитар ушэтынхэмкIэ Адыгэ республикэ институтым инаучнэ IофышIэ шъхьаIэу ЕмтIылъ Разыет икъиIотыкIынэу «А. Д. Сахаров и его работа в Верховном Совете СССР» зыфиIоу къышIыгъэм ыкIи техническэ шIэныгъэхэмкIэ кандидатэу, МКъТУ-м идоцентэу Н. Н. Старковым гупшысэ гъэшIэгъонхэу академикэу А. Д. Сахаровым иIофшIэкIагъэм яхьылIагъэу къыIотагъэхэм.
Хэдзынхэм апэкIэ СССР-м и Апшъэрэ Совет ихэдзынхэмкIэ программэр 1989-рэ илъэсым А. Д. Сахаровым ытхыгъагъ. Ащ шIэгъэн-зэшIохыгъэн фэе Iофыгъуабэр — политическэ ыкIи социальнэ-экономическэ зэхъокIыныгъэхэр, системэжъыр узэнкIыгъэным тегъэпсыхьагъэхэр, хэгъэгур гъогукIэ тещэгъэным фэлажьэхэрэр, цIыфым ифитыныгъэхэр зэрэапэрэхэр, политическэ шъхьафитныгъэр, бэдзэр экономикэр, социальнэ ыкIи экологие пшъэдэкIыжьэу хъурэ-шIэрэмкIэ къэралыгъом иIэр щыгъэунэфыгъагъэх. Программэр журналэу «Огонек» ыкIи гъэзетэу «Московские новости» зыфиIохэу цIыфхэм нахь агъэфедэхэрэм къащыхаутыгъагъ ыкIи зэIэпахызэ яджэщтыгъэх.
Щылэ мазэм 1989-рэ илъэсым СССР-м шIэныгъэхэмкIэ и Академие ишIэныгъэ-ушэтэкIо институт 60-м нахьыбэм яколлективхэр къыкIэлъэIугъэх академикэу А. Д. Сахаровыр Академием ыцIэкIэ лъэпкъ депутатхэм якандидатхэм япчъагъэ ахэтхэгъэным. Ар иIофшIакIэкIэ, игупшысэ къиIотыкIэкIэ академическэ институтхэм яIофышIэхэм нахь къахэщыщтыгъэми, щылэ мазэм и 18-м шIэныгъэхэмкIэ Академием и Президиум изэIухыгъэ Пленумэу щыIагъэм идемократическэ еплъыкIэхэмкIи ар зэлъашIэщтыгъэми, лъэпкъ депутатхэм ахэтхэгъэнымкIэ кандидатэу ыштагъэп.
Ащ джэуап ратыжьэу, А. Д. Сахаровыр депутатынэу ежь-ежьырэу къащагъэлъэгъуагъ хэгъэгум ичIыпIэ округ 30-м нахьыбэмэ, Москва къыщежьэу Камчаткэ нэсыжьэу.
Хэгъэгум тыдэкIи митингхэр икандидатурэ дырагъаштэу щыкIуагъэх. Анахьэу мэхьанэ зиIагъэр хэдзакIохэм язэIукIэу щылэ мазэм и 22-м Москва кинематографистхэм я Гупчэ Унэ щыкIуагъэу ежь А. Д. Сахаровыр зыхэлэжьагъэр ары.
А. Д. Сахаровым мурад пытэ зыфегъэуцужьы шIэныгъэхэмкIэ Академием бэнэныгъэу щыкIорэм пэшIуекIонэу. Гъэзетэу «Московские новости» къыхиутыгъэ итхыгъэу «В Академии или нигде» зыфиIорэм къыщеIо ау тыдэми баллотироваться зэрэщимышIыщтыр. Ащ фэдэ пытагъэу къыхэфагъэм ишIуагъэ къэкIуагъ, икIэрыкIэу лъэпкъ депутатынхэмкIэ кандидатхэр къыкIаIотыкIыжьыгъэх ыкIи Академием ыцIэкIэ мэлылъфэгъум и 20-м Андрей Сахаровыр СССР-м илъэпкъ депутатэу а организацием ыцIэкIэ хадзыгъ. Ащ имызакъоу, щыIэкIакIэм игъэпсэкIощтхэу щыIэщт зэфэсым хэлэжьэщтхэм ацIэхэр къыраIуагъэх, ахэм демократическэ зэхъокIыныгъабэ ашIынэу къапыщылъыгъ.
Партийнэ ыкIи советскэ пэщэ IэнатIэхэм ялIыкIохэр къызэхэтIысхьагъэх, лъэпкъ депутатхэу хадзыгъэхэм етIупщыгъэу зэхъокIыныгъэхэр ашIыщтыгъэх. Хэгъэгум итарихъыкIэкIэ мы зэфэсыр апэрэ демократическэ хэдзынхэу хъугъагъэ.
МэфэкI Iэнэ хъураем хэлэжьагъэх ыкIи къыщыгущыIагъэх гуманитар ушэтынхэмкIэ Адыгэ республикэ институтым ишIэныгъэлэжьхэр ыкIи къырагъэблэгъагъэхэр: О. И. Кускаровар — социологие шIэныгъэхэмкIэ кандидат, институтым иIофышIэ шъхьаI; Н. И. Старковыр — техническэ шIэныгъэхэмкIэ кандидат, МКъТУ-м идоцент;
Щ. Е. ЩашIэр — филологие шIэныгъэхэмкIэ доктор, гуманитар ушэтынхэмкIэ Адыгэ республикэ институтым литературэмкIэ иотдел ипащ; К. Н. Мэрэтыкъор — отставкэм щыIэ полковник, нэмыкIхэри, мыхэр яшIошI-еплъыкIэхэмкIэ зэхъожьыгъэх, къэгущыIагъэхэм язэфэхьысыжьхэм адырагъэштагъ.
КъыхэкIыгъэх дыс хьазырэу къэгущыIагъэхэри, анахьэу СССР-м и Конституцие ипроект шъхьаIэкIэ, хэгъэгум икъэралыгъо гъэпсыкIэкIэ зымыгъэрэзагъэхэр къэзыIуагъэхэр.
Арэу щытми, зэлъашIэрэ шIэныгъэлэжь-физикэу, академикэу А. Д. Сахаровыр зэрэгупшысэкIошхуагъэр ыкIи укIытэпхэ-нэхъоеу зэрэщытыгъэр, Пушкиным ыкIи Блок япоэзие зэрикIэсагъэр кIагъэтхъыгъ. Социологие ушэтынхэу 2000-рэ илъэсым щыIагъэхэм къызэратыгъэмкIэ, А. Д. Сахаровыр УрысыемкIэ я XX-рэ лIэшIэгъум ианахь цIыфышхо дэдэ нэбгыри 10-мэ ахалъытагъ (Лениным, Сталиным, Горбачевым, Брежневым, Жуковым, Гагариным, Королевым, Солженициным агуагъэуцуагъ). Ар ипкIыкIын умылъэкIыщтэу, щэIэгъэшхо зиIэу цIыфхэм къахэнагъ, зэлъашIэрэ фитныгъэухъумэкIуагъ ыкIи шIэныгъэлэжьыгъ, щэгъогогъо Социалистическэ IофшIакIэм и ЛIыхъужъыгъ, Нобелевскэ премием илауреатыгъ.
Iэнэ хъураер зэрищагъ тарихъ шIэныгъэхэмкIэ докторэу, институтым тарихъымкIэ иотдел (мы отделым ар ыгъэхьазырыгъ) ипащэу, республикэ организациеу «ШIэныгъ» зыфиIорэм ипащэу Ацумыжъ Казбек.
Мамырыкъо Нуриет. Сурэтхэр Iофтхьабзэм Iэшъынэ Аслъан къыщытырихыгъэх.