Урысыем иныбжьыкIэхэм сам­бэмкIэ язэнэкъокъу къалэу Вла­димир чъэпыогъум и 18 — 22-м щызэхащагъ.

Илъэс 24-м нэс зыныбжьхэм язэIукIэгъу­хэм Нэчэрэзые щапIугъэ Гъомлэшк Анзор ахэлэжьагъ. Урысыем и Къыблэ шъолъыр ихэшыпыкIыгъэ командэ Адыгэ Республикэм ибэнакIо хэтыгъ.

Килограмм 58-рэ къэзыщэчыхэрэм нарт шъаор янэкъокъугъ, финалныкъом хэхьагъ, ау дышъэм фэбэнэнэу инасып къыхьыгъэп.

Урысыем ишъолъыр 45-мэ ябэнэкIо 300 фэдиз зыхэлэжьэгъэ зэнэкъокъум Гъомлэшк Анзор я 3-рэ чIыпIэр къыщыдихи, джэрзыр къыфагъэшъошагъ.

Адыгэ къэралыгъо университетым и Мыекъопэ къэралыгъо гуманитарнэ-техническэ колледж А. Гъомлэшкыр щеджэ, тренерхэу Делэкъо Адамрэ Гъомлэшк Алыйрэ агъасэ.

Республикэм самбэмкIэ испорт еджапIэ ибатырэу Гъомлэшк Анзор, тренерхэм тафэгушIо.

Сурэтым итхэр: (джабгъумкIэ къебгъэжьэнышъ) Гъомлэшк Анзор ятIонэрэу щыт.