2021-рэ илъэсым чъэпыогъум и 20-м Оперативнэ штабым изэхэсыгъо Адыгэ Республикэм щыкIуагъ. Ащ иIофшIэн хэлэжьагъэх Адыгэ Республикэм и Премьер-министрэу Геннадий Митрофановыр, хэбзэухъумэкIо ыкIи уплъэкIун-лъыплъэн Iофхэм афэгъэзэгъэ къулыкъухэм япащэхэр.

Анахьэу анаIэ зытетыгъэр терактхэм къызыдахьын алъэкIыщт тхьамыкIагъохэм якIэуххэм амал зэриIэкIэ нахь къыкIягъэ­чыгъэныр, цIыфхэр жъугъэу зыщызэIукIэхэрэ чIыпIэхэм террористическэ нэшанэ зиIэ бзэджэшIагъэхэр ащызэрамыхьанхэмкIэ зигъо Iофыгъохэр зехьэгъэнхэр ары.

Адыгэ Республикэм и Премьер-министрэу Геннадий Митрофановым къы­зэриIуагъэмкIэ, терроризмэм пэшIуе­кIорэ Iофтхьабзэхэм язехьанкIэ шIуагъэ къэзыхьыщт IофшIэнхэр зэшIохыгъэнхэм пае республикэм Iофтхьэбзэ тедзэхэр щагъэнэфагъэх. Республикэ программэу «Хабзэр мыукъогъэныр ыкIи ощIэ-дэмышIагъэ зыхэлъ тхьамыкIагъохэр къэмыгъэхъугъэнхэр» зыфиIорэм ипрограммэ гуадзэу «Терроризмэм пэ­шIуекIогъэ­ныр» зыфиIорэм тегъэпсыхьагъэу Iофтхьэбзэ гъэнэфагъэхэр зэшIуа­хыщтых. Ащ пае 2022-рэ илъэсымкIэ республикэ бюджетым мылъку тедзэ къыщыдалъытагъ. Ащ нэмыкIэу ошIэ-дэмышIагъэ зыхэлъ тхьамыкIагъохэр зыгорэкIэ къэхъухэмэ, ахэм якIэуххэм ядэгъэзыжьын пэIухьащт мылъку гъэнэфагъи щыI.

Оперативнэ штабым изэхэсыгъоу щыIагъэм икIэуххэм атегъэпсыхьагъэу Адыгеим иминистерствэхэмрэ ыкIи иведомствэхэмрэ муниципалитетхэм япащэхэр ягъусэхэу пшъэрылъ афа­- шIыгъ джырэкIэ санитарнэ-эпидемиологическэ лъэныкъомкIэ Iофхэм язытет зыфэдэм къыпкъырыкIыхэзэ ошIэ-дэмышIагъэ зыхэлъ тхьамыкIагъохэр къэмыгъэхъугъэнхэм пае Iофтхьабзэу зэрахьан фаеу хъущтхэм яплан хэплъэ­жьынхэу.