Лъэпкъ театрэм иIофыгъохэр
Апэрэу къагъэлъэгъощт
Республикэм и Лъэпкъ театрэу Цэй Ибрахьимэ ыцIэ зыхьырэм ия 85-рэ илъэс IофшIэгъу чъэпыогъум и 29-м ригъэжьэщт.
Режиссерэу Нэгъой Инвер ытхыгъэм техыгъэу «Къэзгъэзэжьырэр Тхьэм ештэжьы» зыфиIорэ спектаклэр апэрэу къагъэлъэгъощт.
ЦIыфым ищыIэныгъэ хъугъэ-шIагъэу къыхэхъухьэрэр макIэп. Зы нэбгырэм рихъухьэрэ унашъом ифэмэ-бжьымэхэр лIэуж пчъагъэхэм алъыIэсын ылъэкIыщт. ЦIыфхэм япсэукIэ, зэлъыIэсыкIэ амалхэм къапкъырыкIырэ гупшысэхэм узыIэпащэ.
Къэгъэлъэгъоныр адыгабзэкIэ къашIыщт. Артистхэу Хьакъуй Андзаур, КIэмэщ Разыет, Болэкъо Аминэт, Ахъмэт Артур, Болэкъо Адам, Тхьаркъохъо Мэрджанэт, нэмыкIхэр спектаклэм хэлажьэх.
Республикэм и Лъэпкъ театрэ ихудожественнэ пащэ иIэнатIэ зыгъэцэкIэрэ Хьакъуй Аслъан къытиIуагъ спектаклэ зэфэшъхьафхэр 2021 — 2022-рэ илъэс IофшIэгъум къызэрагъэлъэгъощтхэр.
Театрэр зычIэт унэм гъэцэкIэжьын Iофхэр зэрэщыкIохэрэм къыхэкIэу «Налмэсым» иконцерт къэтыпIэ къэгъэлъэгъонхэр щыкIощтых. Билетхэр чIэхьапIэм щащэщтых, театрэм исайт инэкIубгъохэм шъуиупчIэхэм яджэуапхэр ащыжъугъотыщтых.
ЕмтIылъ Нурбый.