Ясэнаущыгъэ гъунапкъэ иIэп
Сэкъатныгъэ зиIэ кIэлэцIыкIухэм ятворчествэ къызыщагъэлъэгъорэ республикэ фестивалэу «Шаг навстречу» зыфиIорэр джырэблагъэ АР-м и Къэралыгъо филармоние щыкIуагъ.
Мыр лъэпкъ проектхэу «Демография» ыкIи «Десятилетия детства» зыфиIохэрэм къадыхэлъытагъ. Республикэм икъалэ ыкIи ирайонхэм къарыкIыгъэ кIэлэцIыкIу 43-рэ (илъэси 6-м къыщегъэжьагъэу 18-м нэс зыныбжьхэр) хэлэжьагъэх.
Хабзэ зэрэхъугъэу, илъэс къэс мы Iофтхьабзэр Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ зэхещэ. Ащ имурадыр — зипсауныгъэ амалхэр зэщыкъогъэ кIэлэцIыкIухэм ятворческэ амалхэр къагъэлъэгъонхэр, джырэ щыIакIэм зыкъыхагъотэныр.
Мы фестивалыр мэфэкI шъыпкъэу хэлажьэхэрэм алъытэ ыкIи яшъыпкъэу зыфагъэхьазыры. Ащ ишыхьатыгъ зипсауныгъэ пыч фэхъугъэ кIэлэцIыкIухэм ядунэееплъыкIэ къизыIотыкIырэ Iэпэщысэхэр къызэрахьылIэгъэ къэгъэлъэгъон гъэшIэгъонэу фестивалыр рамыгъажьэзэ филармонием къыщызэIуахыгъэр. Сурэтхэр, дышъэидэхэр, щыгъыжъыехэм, хъэдэн шъабэм ахэшIыкIыгъэ пкъыгъохэр, пхъонтэжъые цIыкIухэр къэзэрэугъоигъэхэм алъэгъун амал яIагъ.
Красногвардейскэ районым Iэпэщысэ гъэшIэгъонхэр къыращыгъэх. Дарина Андрющенкэм дапIэм зыщегъасэ, щайкIэтхэр зытырагъэуцорэ IэплъэкIхэр ыдыгъэх. Хы шхъуантIэм итеплъэ дахэу сурэтымкIэ къыриIотыкIыгъ Даша Демьяновам.
Нэужым фестивалым имэфэкI Iахь аублагъ. АР-м IофшIэнымкIэ ыкIи социальнэ хэхъоныгъэмкIэ иминистрэ игуадзэу Ирина Ширинам Iофтхьабзэр къызэIуихызэ, кIэлэцIыкIухэм ягухэлъ чыжьэхэр къадэхъунхэмкIэ фестивалым мэхьанэшхо зэриIэр къыхигъэщыгъ. Сэнаущыгъэу ахэлъым осэшIу къыфишIызэ, чанэу зыкъагъэлъэгъонэу, творческэ гъэхъагъэхэр ашIынхэу кIэлэцIыкIухэм ар къафэлъэIуагъ.
— Ахэм зыфагъэуцужьырэ мурадым къиныгъохэр зэпачызэ зэрэфакIохэрэм лъытэныгъэ афыуегъэшIы, — еIо ащ. — Япсауныгъэ амалхэр зэщыкъуагъэхэми, мы зэнэкъокъум къызекIуалIэхэкIэ афэлъэкIырэм гъунапкъэ иIэп. Творческэ IэпэIэсэныгъэ куоу ахэлъыр къызэIуахы.
Концерт программэр едзыгъуищэу зэтеутыгъагъ: орэд къэIоныр, музыкальнэ Iэмэ- псымэхэм къарагъэIоныр ыкIи къэшъоныр. Ащ уасэ фэзышIыгъэ жюрим Iоф ышIагъ.
Республикэ зэнэкъокъум орэд къэIонымкIэ апэрэ чIыпIэр къыдихыгъ Жэнэ Тамерлан (Адыгэкъалэ). Музыкальнэ Iэмэ- псымэхэмкIэ апэрэ хъугъэ Мыекъуапэ икупэу «Вдохновение» зыфиIорэр. КъэшъонымкIэ анахь дэгъоу хахыгъ Шэуджэн районым къикIыгъэ Виктория Корчак. Нэбгырищэу зисэнаущыгъэкIэ къахэщыгъэхэр джы 2022-рэ илъэсым Санкт-Петербург щыкIощт Дунэе фестивалэу «Шаг навстречу» зыфиIорэм Адыгеир къыщагъэлъэгъощт.
ТекIоныгъэ къыдэзыхыгъэхэм щытхъу тхылъхэмрэ шIухьафтын лъапIэхэмрэ аратыгъэх. Хэлэжьагъэхэу текIоныгъэ къыдэзымыхыгъэхэри щытхъу тхылъхэмкIэ ыкIи нэпэеплъ шIухьафтынхэмкIэ агъэгушIуагъэх.
Iэшъынэ Сусан.
Сурэтхэр Iэшъынэ Аслъан тырихыгъэх.