Нартхэм яхэсэ гупч
Нарт пщыналъэхэр аугъоихэ зэхъум, лIыжъхэм къызэраIотагъэмкIэ, Пщыщэ иджабгъурэ бгышъхьэ лъагэ, Дэнджыу бжъапэ, чыжьэкIэ къэлъагъоу, нарт Iалэдж иунэшхо тетыщтыгъэ.
[caption id="attachment_100909" align="aligncenter" width="800"] Гъобэкъуае (Теуцожьхьаблэ) икъокIыпIэкIэ тарихъ гупчэр километритIу фэдизкIэ пэчыжь.[/caption]ТишIэныгъэлэжь цIэрыIоу ХьадэгъэлIэ Аскэр итхылъиблэу «Нартхэм» язырэм чIыпIалъэм щыхъугъэ-щышIагъэхэр игъэкIотыгъэу дэтых. Ахэм сяджагъ, Iалэджыпщым икъэбар дэхэкIаеу сыщыгъуаз. Iалэдж ихапIэ зыдэщыIэ чIыпIэр сшIэщтыгъэ, ау зыпарэкIи ащ сихьэгъагъэп. Пэмычыжьэу асфальт гъогушхоу ебгъукIорэмкIэ бэрэ ащ сыблэкIэу хъугъэ.
Адыгэ Республикэм и Къэралыгъо телерадиокомпаниеу «Адыгеим» тилъэпкъ ишэн-хабзэхэм афэгъэхьыгъэ фильмиплI тырихынэу 2014-рэ илъэсым Москва ихэбзэ къулыкъушIэхэм унашъо къыфашIыгъагъ. Купэу тезыхыщтым сэри сыхагъэхьэгъагъ. Тятэжъ пIашъэмэ агъэпсыщтыгъэ бгъагъэхэм афэгъэхьыгъэ апэрэ фильмыр Даур Хъусен тырихынэу фагъэзагъэти, тызэгъусэу Iалэджыпщым иунэ зыдэщытыгъэ чIыпIэм тызэдылъыхъугъ ыкIи чылэ пытэпIэжъыр Пщыщэ иджабгъурэ нэпкъ лъагэ тетэу къыхэдгъэщыжьыгъ. Къутыржъыеу Гливенкэм итемыркIэ къыпыщыт шъыпкъ. А чIыпIэм къохьапIэмкIэ Гъобэкъуае зэрэпэчыжьэр километритIу.
Нарт Iалэджырэ ягуащэрэ
Iалэджыпщым ихапIэ фэгъэхьыгъэу тхыдэIуатэмэ къаIуагъэхэр «Нартхэм» къахэттхыкIыгъэх ыкIи ащыгъуазэ шъутшIынэу тхылъмэ зэрадэтхагъэм фэдэу, ау хьарыф IужъухэмкIэ хэтыутыгъэх. ГущыIэм пае, я V-рэ томым зи № 415-рэ бжъэдыгъу текстэу «Нарт Iалэджы- рэ ягуащэрэ» зыфиIорэм мырэущтэу къыщеIо: «Iалэдж яунэжъышко лъэгу хэпшIыкIынэу, къазщыр уц къытекIэжьыгъэу, тянэжъы ылъэгъугъагъ.
Унэшкомрэ хьакIэщымрэ зэпэчыжьагъэх.
Сэ 1947-рэ илъэсым ащ сыкIогъагъ, ау зи хэпшIы-кIыжь щытыгъэп: урыс къутыр тетIысхьагъ; псэупIэхэр тырашIахьыгъ.
Iалэдж япсынэкIэчъ слъэгъугъэ; бгъапэм фэдиз илъэгагъэу псыр къефэхымэ чIым къытефэтыгъ.
Iалэджыпщым дэжь, Нарт Хасэр щызэIукIэу хэбзагъэ.
Iалэджыпщ лIы Iушыгъ, шъхьэкIэфэ ин иIагъ. Ежь имызакъоу игуащи бзылъфыгъэ акъылэу, Нарт ябын иIофхэм игурышэ ахэлъэу щытыгъ».
Мы тхылъ дэдэм бжъэдыгъу текстэу зи № 417-у «Нарт Iалэдж иунэжъ» зыцIэм итхагъ:
«КъызэраIотэжьырэмджэ, Iалэдж яунэжъ Рязанскэмрэ Бжъэдыгъу станицэмрэ азыфагоу, Къургъу тамэ тетыгъэу ары. Сэ унэжъ чIапIэу зыфаIорэр слъэгъугъэ. Лъэшэу инэу тIахьыгъэу щыт. Къыблэм ылъэныкъокIэ дэхьапIэ иI, ащкIэ уздахьэрэм ин дэдэу зы пхъэшхо горэ къыхэщы. Темырым ылъэныкъокIэ ащ фэшъхьаф еплъэгъулIэрэп. А пхъэшхор Iалэджы иунэ пэIулъэшъуагъэр арэу аIо.
[caption id="attachment_100908" align="aligncenter" width="800"] Нарт чIыпIэхэр: 1. Iалэджыпщым ихапI. Ижъырэ Черкесием игупчэу нартхэм яхэсэ зэфэсыпIагъэр. 2. Къошко дэкIыгъор. 3. Лъэпшъ икIыщ лъачI. 4. Бгъэбзыу зыкъосыгъэр. 5. Нарт Лъэгуц-ЖакIэм ыкъуибл яIуашъхьэхэр. 6. НэкушIой иIуашъхь. 7. Хъудымыжъ иуджыпI. 8. Дзэгъащтэ зытесыгъэр. 9. ШыкIэкI иIуашъхь. 10. БэукI иIуашъхь. 11. Лъэгуц-ЖакIэм ичылэ зыдэщысыгъэр. 12. Асран иIуашъхь. I3. Хъудымыжъ игъукIэпIэ чIыпI.[/caption]Iалэдж яунэ гъэпсыкIэу иIагъэр гъэшIэгъонэу щытыгъ. Унэ фыжь кIахьы дэдэу, «Тхьэ щэкI икIахьыгъагъ (зы «тхьэр» джабгъу блыпкъым щыублагъэу сэмэгу Iэхъомбэ цIэрамыIом нэсэу ары). Унэм кIэсэнэу кIэтхэр зыфэдагъэр: зэр цуиимэ ащэ икъутыгъ. ПэIулъашъоу Iулъыр шы бгъэлыбэм къэсытыгъ. Ипхъэцу Iунэхэр пчэгъум фэдизыгъ. Иунапчъэ гъоплъагъ, нэбгырэ тIокIымэ Iуахытыгъ — рагъэсэжьытыгъ. Iакуандэм иплъэпIэ ищэндакъэу унашъхьэм хэшIыкIыгъэр куогъуиблы щыплъэгъутыгъ».
ЗэIукIапIэу яIагъ
Къургъо тамэ, Дэнджыу бжъапэр, адыгэ чIыгужъым итарихъ гупчэ шъыпкъ (исторический центр Древней Черкесии). Хабзэм къыдигъэкIыгъэ джырэ географие картым узеплъыкIэ, Кавказым итемыр-къохьапIэ ыгузэгу шъыпкъ. Координатхэр тетых: темырымкIэ ишъомбгъуагъэр — 39°37/03/, къокIыпIэмкIэ икIыхьагъэр — 44°55/-рэ. Нартмэ ягупчагъэр ащ икъыблэ-къокIыпIэкIэ метрэ шъитф фэдиз ныIэп зэрэпэчыжьэр. Ижъырэ зэманхэм адыгэмэ а чIыпIэр къызэрэхагъэщышъугъагъэр гъэшIэгъон шъыпкъ. Адыгэ чIыгужъым игъунапкъэмэ къарыкIыхэу хасэмэ къякIуалIэщтыгъэхэм зэфэдиз чIыналъэ къакIущтыгъэ.
Нарт пщыналъэмэ зэрахэтымкIэ, Iалэдж иунэ, Iалэджыпщым ихапIэ, Нарт Хасэри, Ны Хасэри щызэфэсыщтыгъэх, ЖъыукI хасэри щызэрэугъоищтыгъэ. Нарт Жъэмадыу тхьамыкIэжъэу лъэпкъыр пчъагъэрэ хэзыщыжьыгъэр аужырэу жъыукIым ращэлIэжьыгъагъ. Зыдадзэжьыгъэщтыр мы пытэпIэжъым икъохьапIэкIэ бгы зэндэ куоу иIэр арынкIи мэхъу.
Ны Хасэр Бжъэдыгъу текстэу зи № 419-рэ «Ны Хасэм» итхагъ: «Ипэум нартхэм ныхасэ яIэтыгъ. А Ны Хасэм ныо Iушхэр екIуалIэтыгъэх. ЩыIакIэу якIалэмэ яIэн фаем, хабзэу бзыпхъэу яIэн фаем тегущыIэтыгъэх, кIо ежь къаныбжьым къалъэгъугъэм, аушэтыгъэм, зэхахыжьыгъэм тетэу. Ащ фэдэ хасэм ныжъыхэм Iушыгъэу щаIуагъэмэ ащыщэу бэ цIыфхэмэ къахэнэжьыгъэу ахэлъыр. Ны Хасэм унашъо ышIыгъагъ аIуагъ: имые хэти емынэцIынэу, мыупчIэу ымыштэнэу, ныбэм илажьэ IотэжьыгъошIу — щэIэгъэ пытэ ащыджэ ахэлъынэу аштэгъагъ. Ны Хасэм итхьамэтагъэр Iалэдж ягуащ ары».
Бжъэдыгъу текстэу зи № 420-у «Нарт я Ны Хас» зышъхьэм къыщеIо:
«Нарт бзылъфыгъэмэ ежь ягъом Ны Хасэ Iалэдж яунэжъ, Iалэдж ягуащэ ифэIо-фашIэ хэлъэу щашIытыгъэу аIо. Ащ фэдэ Ны Хасэм зигугъу щашIыхэрэр, цIыфхэмэ къэхъуткъэшIэт щысэхэу къапыщылъхэр аухэсхэу щытыгъэу тижъымэ къаIотэжьытыгъ.
Нарт бзылъфыгъэмэ, Сэтэнэе-гуащэм фэдэу, Iуш блэкIыгъэхэр ахэтыгъэх. Ахэмэ аIуагъэу адыгэ орэдыжъым къыхэнэжьыгъэр бэн фае, ау тэ къытлъыIэсыжьыгъэ шIагъо щыIэп.
Ны Хасэм Iуагъэу ышIыхэрэр… нартмэ язэманым, цIыфхэр щэIэфэ адыщыIэнэу, мыкIодыжьынэу орэдым халъхьэти, орэдыIо Iазэмэ къарагъэIожьыти, ай тетэу цIыфмэ къахахьэтыгъ» …
Аужырэ нартэу Уачэ Пакокъо Тэтэршъао къелъэIужьыгъагъ ихьадэ ригъэгъэтIылъыжьынэу, ау чIыпIэу зыдэкIощтым щымыгъуазэу зеупчIым, «… о Пщыщэ нэпкъы тет унэшкор ары, — ыIуи къыригъэлъэгъугъ. Къыригъэлъэгъугъэ унэр зыдэщытыгъэр джы Рэзанскэмрэ ГЭС-мрэ азыфагу Iошъхьэ хъурэешхоу иIэр ары». «Нартхэр», я VI-рэ т. н. 256. ЗэрэхъурэмкIэ, ар Iалэджыпщым ихэпIагъэр ары.
ПсэупIэкIэ хахыгъ
Къургъо тамэ, Пщыщэ иджабгъурэ нэпкъ лъэгэ тешъор мыжъо лIэшIэгъум икIэухым цIыфхэм псэупIэкIэ хахыгъагъ. Археологие саугъэтыбэ тет: чылэжъхэр, Iошъхьэ купхэр, къэхэлъэжъхэр, пытэпIэжъыр, тхьэлъэIупIэр, нэмыкIхэр. Iалэджыпщыр зыщыпсэущтыгъэр ыкIи пэблэгъэ археологие саугъэтхэр Адыгеим иижъырэ тарихъ епхыгъэ шъыпкъэх.
Джыдэдэм бгышъхьэр губгъошху, жъокIупIэ хъоо-пщау, Пщыщэ икъокIыпIэкIэ гъэзэгъэ нэпкъ лъагэр кIыхьэ, гъуй шъхьэндэ IужъухэмкIэ зэхэкIыхьагъэхэу хъотэшхохэм зэпабзы. Лъэгуанэм Пщыщэ къыхэчъырэ псыдэчъэхэу Дэнджыу ихьалыгъуанэ бгышъхьэ лъапшъэм къеуцуалIэщтыгъэ. Ащ зыIуищэити, зиIуантIэмэ, зищантIэзэ кIэир зэлъикIухьэти, темэн зэхэкIыхьэгъэ Iужъум хэкIодэжьыщтыгъэ.
Псыхъожъыем Дэнджыу ыцIагъэми къашIэжьырэп, чIыпIацIэмэ афэгъэхьыгъэу къыхаутыгъэмэ къахафэрэп. Псыдэчъэхым ыцIэкIэ бгышъхьэм Дэнджыу бжъап фаусыгъ. Пщыщэ иджабгъукIэ кIэй зэныбжьыр темэнылъагъ, ары псы дэнджэур зыхэкIодэжьыщтыгъэр. Темэныр я XX-рэ лIэшIэгъум ия 60-рэ илъэсхэм агъэгъушъыгъагъ ыкIи пындж щалэжьыщтыгъэ.
Пщыщэ инэпкъитIу лъэгуанэр Къургъо мэз щыщэу къинагъэм зэлъеубыты. Чъыгышхохэр хэтых, кIыры. Гъобэкъое нэжъ-Iужъхэм къызэраIотэжьырэмкIэ, темэныр агъэгъушъы зэхъум хъуатэ горэу ратIыкIырэм иныжъ къупшъхьэхэр къыщычIагъэщыгъагъэх. Ащ шъхьэкъупшъхьэу пытыгъэр цIыфым илъэгагъэ фэдизыгъ. Ащыгъум тхьаматэм къупшъхьэхэр елбэтэу чIаригъэухъумэжьыгъагъэх — шIэныгъэлэжьхэр етIэнхэу къэкIонхэшъ, яIофшIэнхэр зэпагъэуным тещыныхьи. Къупшъхьэхэр зычIэлъхэр непэ зыми ышIэжьхэрэп.
ЧIыпIэр
Iалэдж ичылэжъ зыдэщытыгъэр Белореченскэ районым къохьапIэмкIэ ыгъун. Адыгеимрэ краимрэ ягъунапкъэу Пщыщэ ипсыхьалыгъуанэкIэ рыкIорэм зэрэпэчыжьэр метрэ 500 фэдиз ныIэп. Нарт чылэжъыр, ыпэкIэ къызэрэтIуагъэу, Гъобэкъуае зэрэпэчыжьэр километритIу фэдиз ныIэп. Мыщ дэжьым къэIогъэн фае темэнылъэгъэ лъэгуанэр гъобэкъое колхозым зэричIыгугъэхэр. Нартхэм яятфэнэрэ том Iалэджыпщым ихэпIагъэм урыс къутыр джы кIэрысэу, лIыжъхэм къаIотагъэу, зэрэдэтхагъэр шъыпкъэ. Зы урам нахь мыхъурэ къутыржъыеу Гливенкэр икъыблэкIэ къыпэIус шъыпкъ. Ащ дэсхэм тызяупчIым, нартмэ ягупчагъэр тыркумэ япытэпIагъэу къытаIуагъ. Ау ар шъыпкъэм пэчыжь. Унагъохэр мыщ зытIысыгъэхэр Кавказ заом ыуж, арышъ, мыщ имысыгъэхэм чIыналъэм итарихъи икъэбари сыдэущтэу ашIэщта?
Къутырым икъыблэкIэ Белореченскэ электростанциер пэблагъ. Шъхьэгуащэ къыхащыгъэ псыIэрыщэу, чыжьэу шъофымкIэ къащагъэу, зипсыхэр Пщыщэ хэлъэдэжьхэрэм генераторхэм Iоф арагъашIэ, ток къарагъэты.
Тарихъ саугъэт
Iалэджыпщым ихэпIагъэр археологие ыкIи тарихъ саугъэт.
Iалэджыпщым иунэ зыдэтыгъэ хапIэр Iошъхьэшхо плIэмыяшъоу шыгуитIоу лъагэу чIыопсым ыгъэпсыгъ. Пщыщэ иджабгъурэ бгышъхьэ хэушъхьафыкIыгъэу къыхэщы: ыбгъухэр зандэх, хъоу куушхокIэ къэгъэгъунагъ, ышъхьашъо бгышъхьитIумэ агузэгу иуфэнагъэу зэныбжь; къокIыпIэмкIэ гъэзагъэр нахь шъуамбгъу ыкIи нахь лъаг; къохьапIэмкIэ — нахь лъхъанч. Къургъо мэзы щыщэу къинэгъэ чъыгхэм псэупIэжъыр къаухъурэи. ХьамышхунтIэу къахэкIагъэхэр ягъумагъэкIэ шъхьэндэ къызэрыкIохэп, ныбжьышхо яIэу, чъыг гъумых. Бгым икъокIыпIэ зэндэрыкъ, мэкъупIэ, уц дэгъухэр къытекIэх, шъхьэндэ Iужъу куашэхэр тетых.
ХапIэм ытхыцIэ чIыпIитIоу къутырым щыщхэм хэтитIу щалэжьэу дэлъ. Ахэм къащычIажъукIыгъэхэу мыутIэ ыкIи лIэшIэгъу гурыт культурэхэм ахэхьэрэ къошын къутафэхэр хъоеу ахэлъых. ИжъыкIэ иIэгъэ дэхьэпIэ закъор ары джыри къыфэнагъэр, ащ кукIэ удэкIоеныр къин хьазыр, дысэу гъэпсыгъэ. Тыдэрэ лъэныкъокIэ укъикIыгъэми, нэмыкI дэхьапIэ фэбгъотыщтэп. Мыр пытэпIэ-ухъумапIэу агъэпсыгъагъ. ДэхьапIэм ылъапсэ GPS-мкIэ координатэу иIэхэр: къокIыпIэмкIэ икIыхьагъэр — 44°54/32,8/, темырымкIэ ишъомбгъуагъэр — 39°38/04,1/. Узэрэдахьэу: къокIыпIэмкIэ икIыхьагъэр — 44°54/34,0/, темырымкIэ ишъомбгъуагъэр — 39°38/03,8/. ПытэпIэжъыр къэзыуцухьэрэ чIыопсыр джыри Тхьэм къызэригъэшIыгъ. ИдэхагъэкIэ чIыопсым исаугъэт шъыпкъ. Чъыгхэр цызэмэ къачъыхьэх. ЕтIани гъэшIэгъоныр — къэхалъэмрэ хэтитIумрэ анэмыкI пытапIэм ыкIоцI зы уни, зы пкъэуи рагъэуцуагъэп. ИжъыкIэ изытетыгъэр Тхьэм къызэтыригъэнагъ.
Iакуандэ-Дахэм псэлъыхъуабэ иIагъ
Хъишъэм зэрэхэтымкIэ, мы чIыпIалъэм хъугъэ-шIэгъабэ щыхъугъ. Iалэджыпщымрэ ишъхьэгъусэу БэтIынэрэ хасэмэ ятхьэматэщтыгъэх. Апхъу закъоу Iакуандэ-Дахэр нарт эпосым къыхэфэрэ анахь пшъэшъэ дахэмэ ащыщ, псэлъыхъуабэ къыфакIощтыгъэ: якъэлэпчъэ дэхьэгъу, шыхэр хэнэнкIэ щынагъоу, псынжъ куоу зэхаутыхьэгъагъ. Пшъашъэм епсэлъыхъогъагъэхэ Шэбатныкъорэ Саусэрыкъорэ Iалэджыпщым шъхьакIо зарехым, пщым ичылэ дэсхэр къыдамыгъэкIыхэу даубытэгъагъэх.
Саусэрыкъо бгышъхьэм теуцуи, Шэбатныкъо лъэгуанэм иуцогъагъ. Iалэджыпщыр шъэфэу Лъэпшъ дэжь кIуи щэмыохъуитIу къыригъэшIыгъагъ, ау къэкIожьызэ шым къыридзыхи, щэбзащэмэ язырэр зэпикIыгъагъ. КъэнагъэмкIэ кIэй лъапэм щытыгъэ Шэбатныкъо ыукIыгъагъ. Джыдэдэм пытапIэм узэрэдахьэу сэмэгубгъумкIэ чъыгышхомэ ачIэгъ Iошъхьэ закъо ачIэт, арынкIи хъун Шэбатныкъо лIыхъужъым икъэ. Къутырым дэсхэм ащ ышъхьашъо зэлъибгъэу якъэхалъэ ашIыгъ. Хьадэхэр зычIалъхьажьынхэ ащ къыфэнагъэпышъ, джы Iалэджыпщым ихэпIагъэр къэхалъэ ашIын ягухэлъ. Тятэжъ пIашъэмэ яхэсищ зыщызэфэсыщтыгъэр, тилъэпкъ исаугъэт шъхьаIэ къутырым дэсхэм хьэдэ гъэтIылъыпIэ зашIыкIэ, адыгэу дунаим тетхэмкIэ сыд тыосэжь?!
Тилъэпкъ ылэжьыгъэу тиIэр зэкIэ пхъэтэпэмыхь тшIызэ, нэмыкI лъэпкъхэм ащыщхэм тичIыгуи, тишъуаши, тиIаши, нарт хъишъэри, шхыныгъоу тиIэмэ анэсыжьэу мышъхьахыхэу зыпатхагъэх, тиIуашъхьэхэм узэнэцIыжьын къачIамынэу ахъункIагъэх. Зэгорэм титарихъ тытежъугъэгущыI! Икъунба тызэрэзэрапхъуагъэр?!
Лъэпшъ икIыщ лъачI
ПытэпIэжъым щебгъажьэу Пщыщэ икIэй уитэу къохьапIэмкIэ километритIо узыкIокIэ, Гъобэкъуае пэчIынатIэу нэпкъ джабгъум чырбыщ-гъэжъэпIэ заводыжъ тет. Мы чIыпIэм Лъэпшъ икIыщ щытыгъэу къаIотэжьы. Джырэ Гъобэкъуае пэчIынэтIэ псырыкI нэпкъыр ары кIыщыр зыдэщытыгъэр. «Лъэпшъ икIыщ лъачI» аIозэ а чIыпIэм еджэх. НэмыкIхэуи кIыщыр зыдэщытыщтыгъэу къэбархэм тихэку ичIыпIэ зытIущы ацIэ къащараIо: Едэпсыкъуай, Пэнэжьыкъуай.
ЗэрэхъурэмкIэ, Iалэджыпщыр кIыщэу зыдэкIогъагъэр чыжьагъэп, ау Къургъо мэзэу зыхэкIыгъагъэр джырэм елъытыгъэмэ, лъэшэу кIырышхощтыгъэ.
Нарт пщыналъэхэр апэ зэхэзылъхьагъэхэр адыгэх
Темыр Кавказым ис лъэпкъхэм Нарт эпосыр яунаеу, апэ зэхалъхьагъэу алъытэ, ау ар къагъэшъыпкъэнэу IэубытыпIэ ашIын зэрямыIэзэ, зыпатхэ. Фэшъхьаф лъэпкъмэ ялъытыгъэмэ, тэ нарт чIыпIэхэр зыдэщыIэхэмрэ лIыхъужъхэм ацIэхэмрэ гъэнэфагъэу тэшIэх. Типщыналъэмэ ахэт нарт лIыхъужъхэм зэряджэхэрэр адыгацIэх, ямэхьанэхэмкIэ адыгэ гущыIэх. Эпосыр лъэныкъуабэкIэ тилъэпкъ зэрепхыгъэр пщыналъэхэм дэгъу шъыпкъэу къахэщы. КъэбарIуатэмэ хъугъэ-шIагъэхэр зыщыхъугъэхэр гъэнэфагъэу къагъэлъэгъуагъ, чIыпIэмэ ацIэхэр къараIуагъэх, лIыхъужъхэр зычIэлъ Iуашъхьэхэр зыдэщытхэр тагъэшIэжьыгъэх.
Нартхэм япхыгъэ археологие саугъэтхэр адыгэ чIыгужъым илъэныкъуабэмэ ащыIэх. Пщыщэ инэпкъитIу атетхэр пчъагъэ мэхъу. Ахэм ащыщхэр картым тедгъэуцуагъэх.
ИжъыкIэ адыгэмэ чIынэлъэшхо аубытыщтыгъэ. Джырэ Адыгеим къыгъэгъунэрэр, ащ елъытыгъэмэ, мэкIэжъый. Кавказ заом ыпэкIэ, я XVIII-рэ лIэшIэгъум, Черкесием игъунапкъэхэр Темэн хыгъэхъунэныкъо (Таманский полуостров) къыщегъэжьагъэу Къалмыкъым, Дагъыстан, Чэчэным, Ингушетием, Осетием анэсыщтыгъэх, къыблэмкIэ Абхъазым еолIэжьыщтыгъэх. Зэо мэхъаджэм тилъэпкъ ыужъгъэйи, заштэм, тичIыгоу аунэкIыгъэхэм нэмыкI лъэпкъхэр къарытIысхьагъэх. Ащ ыпкъ къикIэу нартхэм ячIыпIагъэхэр, саугъэтхэр тиреспубликэ къыгъэгъунэрэ чIыгухэм арымытыжьы хъугъэх. Ахэм ащыщхэр джырэ Краснодар краим къинагъэх. ТилъэпкъкIэ анахь мэхьанэ шъхьаIэ зиIэу ахэм къахэбгъэщын фаехэр Iалэджыпщым икъуаджэрэ пытэпIэжъымрэ. Мыхэр Адыгеим иижъырэ тарихъ гупчэ шъыпкъэх, хэсищыр щызэфэсыщтыгъэх. Адыгэхэм ахэм якъэбархэр ядгъашIэмэ тшIоигъу.
Лъэпкъ зэфэсыпIэщтыгъэу дгъэунэфыжьыгъэм нарт цIэрыIохэр щыпсэущтыгъэх, хъугъэ-шIэгъабэ епхыгъ, арышъ, ар зыдэщыIэм хэушъхьафыкIыгъэу, игъэкIотыгъэу утегущыIэн ыкIи цIыфхэм ядгъэшIэн фае.
Тэу Аслъан.
Адыгэ Республикэм и Лъэпкъ музей инаучнэ IофышIэ шъхьаI, археолог, Адыгеим культурэмкIэ изаслуженнэ IофышI, Урысыем ижурналистхэм я Союз хэт.