ЗекIоныр зикIасэу Адыгеим, Краснодар ыкIи Ставрополь край­хэм, нэмыкI шъолъырхэми къакIохэрэмрэ ащыпсэухэрэмрэ языгъэпсэ­фы­гъо уахътэ щынэгъончъэу зэхэщэгъэным ыкIи япсауныгъэ къызэтегъэ­нэгъэным апае шэпхъэ гъэнэфагъэхэу зишIуагъэ къэкIощтхэр къыхи­хынхэу Урысые Федерацием и Правительствэ Ростуризмэм унашъо фишIыгъ.

Правительствэм ипресс-къулыкъу къызэриIорэмкIэ, шап­хъэхэр тызхэт мазэм ыкIэм нэс агъэхьазырынхэ фае. Шап­хъэу агъэнэфэщтхэр лъэпкъ стандартизацием и Программэу 2022-рэ илъэсым аштэщтым хагъэхьащтых. Ахэр зекIоныр шIуагъэ къыхьэу зыщызэхэщэгъэ къэралыгъохэм агъэфедэрэ шIыкIэ-шапхъэхэм атехыгъэ­хэу, чIыпIэхэм атегъэпсыхьа­гъэхэу щытынхэ фае.

Мы Iофыгъом фэгъэхьыгъэу вице-премьерэу Дмитрий Чернышенкэм ишIошIхэр къыIуа­гъэх. «ЗыгъэпсэфакIохэм япчъа­гъэ илъэс къэс къызэрэхахъо-­рэр къыдэтлъытэзэ, узщызе­кIонкIэ щынэгъо чIыпIэхэр защыбгъэпсэфыным тегъэпсыхьагъэхэу гъэпсыгъэныр Правительствэм мэхьэнэ ин зиIэ Iофыгъохэм ахелъытэ».

Адыгеим зекIо къакIохэрэм япсауныгъэ къамыухъумэу щы­тэп. КъакIохэрэр сыд фэдэ чIыпIэ щыIэхэми къэсымэджагъэхэмэ, IэпыIэгъу ящыкIагъэмэ, псынкIэу алъэIэсых. Адыге­им илъыхъокIо-къэгъэнэжьэкIо купхэм зэпымыоу чэщи мафи Iоф ашIэ.

Ростуризмэм итхьаматэу Зарина Догузовам Адыгэ Рес­публикэм зекIон IофхэмкIэ илъэс къэс хэхъоныгъэ зэришIырэм уигъэрэзэнэу зэрэщытыр, зекIохэм япсауныгъэ къызэрэзэтырагъэнэщтым ренэу зэрэлъыплъэхэрэр къыхигъэщыгъ.

ТапэкIэ Кавказым щыIэ шъо­лъырхэм зекIоным зырагъэу­шъомбгъуным хабзэм ынаIэ нахь зэрэтыригъэтыщтыр З. Догузовам къыIуагъ. Ежь зипэщэ ведомствэр мы Iофыгъом игъэ­цэкIэн хэлэжьэщтхэм апэ зэритыщтыри къыхигъэщыгъ.

Адыгэ Республикэм зекIонымрэ зыгъэпсэфыпIэхэмрэкIэ и Комитет IэпыIэгъу къыфэ­хъущт чIыпIэ ведомствэхэм япчъагъи къыхэхъощт.