Хэгъэгум футболымкIэ иапшъэрэ куп хэт фут­бол клубхэм чъэпыогъум и 16 — 17-м я 11-рэ зэIукIэгъухэр яIагъэх.

ЕшIэгъухэм яаужырэ такъи­къ­хэм къэлапчъэм Iэгуаор дэзыдза­гъэхэр нахь къахэтэгъэщых.

«Спартак» «Динамо» дешIэзэ Ордец ыкIи Тюкавиным зырызэ «Спартак» икъэлапчъэ Iэгуаор дадзагъ. Тюкавиныр изакъоу «Спартак» икъэлэпчъэIутэу Максименкэм зекIум, хъагъэм Iэгуаор ридзэн ылъэкIыгъэп. Пчъагъэр 3:0 зэрэмыхъугъэм къып­къырыкIыгъэр бэ.

Я 87-рэ такъикъым «Спартак» иухъумакIохэм ащыщэу Джикие шъхьэкIэ Iэгуаом еуи, къэлап-чъэм дидзагъ. ЕшIэгъу уахътэр аухыгъэу судьям къафыхигъэ­хъо­гъэ такъикъыр кIощтыгъэ. «Спартак» иухъумакIоу Жиго шъхьэкIэ зэогъэ Iэгуаор «Динамо» икъэлапчъэ дигъэфагъ — 2:2.

«Арсенал» «Зенит» дешIэзэ, я 53-рэ такъикъым Давиташвили «Зенит» икъэлапчъэ Iэгуаор дидзагъ. «Зенит» иешIэкIо цIэ­рыIоу Дзюбэ я 88-рэ такъикъым хъагъэм Iэгуаор ридзагъ — 1:1. Дзюбэ я 100-рэ Iэгуаор къэлапчъэм зэрэдидзагъэм фэшI ешIакIохэр фэгушIуагъэх. ЕшIэгъу уахътэр зыщаухыщтым Кангвэ «Зенит» икъэлапчъэ Iэгуаор дидзи, «Арсенал» Тула текIоныгъэр къыдихыгъ.

«Шъачэ» 3:0-у «Ростов» текIощтыгъ. Юсуповым, Нобоа, Кассьеррэ зырызэ хъагъэм Iэгуаор радзагъ. «Ростов» иешIакIохэу Баштуш я 53-рэ такъикъым, Соу я 90-рэ такъикъым ыуж «Шъачэ» икъэлапчъэ Iэгуаор зырызэ да­дзагъ.

«Локомотив», нэмыкI командэхэм аужырэ такъикъхэм хъа­гъэм Iэгуаор радзагъ. «Краснодар» гъогогъу 27-рэ «Уфа» икъэ­лапчъэ дэуагъ. ПенальтикIэ Кры­ховяк я 85-рэ такъикъым къэлапчъэм Iэгуаор дидзагъ — 1:1.

Футболыр спорт лъэпкъ гъэшIэ­гъон. Къэлапчъэм Iэгуаор зыщыдадзэщтыр, текIоныгъэр къыдэзыхыщтыр къэшIэгъуае. Аужырэ такъикъхэм гуетыныгъэ ахэлъэу апэкIэ лъыкIуатэхэрэм, текIоныгъэм фэбанэхэрэм гъэхъагъэу ашIырэр нахьыб.

Хэт тыдэ щыIа?

1. «Зенит» — 23 2. «Шъачэ» — 21 3. «Динамо» — 20 4. ЦСКА — 20 5. «Краснодар» — 18 6. «Локомотив» — 18 7. «Спартак» — 17 8. «Кр.Советов» — 16 9. «Рубин» — 16 10. «Н.Новгород» — 14 11. «Ахмат» — 12 12. «Арсенал» — 12 13. «Химки» — 11 14. «Урал» — 9 15. «Ростов» — 9 16. «Уфа» — 9. Я 12-рэ ешIэгъухэр 22.10 «Динамо» — «Химки» 23.10 «Н. Новгород» — «Краснодар» «Ростов» — «Арсенал» ЦСКА — «Кр.Советов» 24.10 «Уфа» — «Рубин» «Ахмат» — «Урал» «Зенит» — «Спартак» 25.10 «Локомотив» — «Шъачэ»