Уахътэм диштэу агъэпсы
Пэнэхэс къоджэ тхылъеджапIэр лъэпкъ проектэу «Культурэм» текIоныгъэр къыщыдэзыхыгъэмэ ащыщ.
2021-рэ илъэсым модельнэ шIыкIэм тетэу тхылъеджапIэм зэхъокIыныгъэхэр фашIыхэу рагъэжьагъ. ГъэцэкIэжьын Iофыгъохэм, тхылъеджапIэм изэтегъэпсыхьан апэIухьащт ахъщэр сомэ миллиони 5,63-рэ мэхъу. Ащ щыщэу федеральнэ бюджетым къыхахыгъэр сомэ миллиони 5. Къэнэгъэ ахъщэр республикэ, район бюджетхэм къатIупщы.
— ТхылъеджапIэр лъэхъаным диштэу зэтырагъэпсыхьащт, — къыIуагъ Тэхъутэмыкъое районым игупчэ тхылъеджэпIэ IофшIапIэ ипащэу ШэхэлI Саидэ. — Лъэпкъ проектэу «Культурэм» тхылъеджапIэр зэрэхэлажьэрэм ишIуагъэкIэ мурадэу яIэхэр нахьышIоу агъэцэкIэщтых. ТхылъеджапIэм итеплъэ, фэIо-фашIэхэм яхьылIэгъэ Iофыгъохэм, нэмыкIхэм зэхъокIыныгъэхэр афэхъущтых.
Лъэныкъуабэ къызэлъызыубытырэ тхылъеджапIэм ныбжь зэфэшъхьаф зиIэхэр къэкIощтых. КIэлэцIыкIухэм апае хэушъхьафыкIыгъэ чIыпIэр, зыгъэпсэфыпIэр, нэмыкIхэри ащ хэтыщтых.
Тэхъутэмыкъое районым иадминистрацие культурэмкIэ и ГъэIорышIапIэ ипащэу, Адыгэ Республикэм искусствэхэмкIэ изаслуженнэ IофышIэу Ацумыжъ Рустам тхылъеджапIэм изэхъокIыныгъэхэм мэхьэнэ ин яIэу елъытэ.
— Гъэсэныгъэм, культурэм, къэбар жъугъэм иамалхэм, фэшъхьафхэм яхьылIэгъэ Iофхэр тхылъеджапIэм ыгъэцэкIэщтых, — къытиIуагъ Ацумыжъ Рустам. — ЦIыфхэр ыгъэгъозэщтых. Ахэр къыдэтлъытэхэзэ, тхылъеджапIэм ифонд хэдгъэхъощт. Зипсауныгъэ къыщыкIагъэхэм тхылъеджапIэр алъыIэсыщт, цIыфхэм якIуапIэу, къуаджэр ыгъэдахэу щытыщт.
Пэнэхэс адыгэ къоджэшхомэ ащыщ. Зэлъэпкъэгъухэр, лъэпкъ зэфэшъхьафхэр щызэIокIэх, Сирием къикIыжьыгъэ тилъэпкъэгъухэм мыщ унэхэр щашIыгъэх, рэхьат щагъотыгъэу щэпсэух. Заом имашIо къыхэкIыжьыгъэ адыгэхэм ятарихъ чIыгу агъотыжьыгъ. Iоф ашIэ, еджэх. Культурэм, искусствэм, спортым апыщагъэхэр ахэтых.
ТизэIукIэгъухэр
Республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан Пэнэхэс щыкIорэ зэхъокIыныгъэхэм ащыгъуаз.
— ЕгъэжьэпIэшIухэр къуаджэм щашIыгъэх, — къеIуатэ ЛIымыщэкъо Рэмэзан. — Пэнэхэс къэзыгъэзэжьыгъэ тилъэпкъэгъухэм таIукIэн, тхылъеджапIэм тыкIон, зэхахьэ щызэхэтщэн тимурад. Къуаджэм тарихъ гъэшIэгъон иI, цIыф цIэрыIохэр къыдэкIыгъэх. Пэнэхэс щыщэу Чэмышъо Гъазый Адыгэ Хасэм иIофшIэн чанэу хэлажьэ. Пэнэхэс щызэхэтщэщт зэхахьэм зыфэтэгъэхьазыры.
ТхакIохэр, театрэм иартистхэр, орэдыIохэр, спортсменхэр, цIыф гъэшIэгъонхэр къуаджэм щызэIуагъэкIэщтых. Адыгэ Хасэм зыщызыгъэсэрэ кIэлэцIыкIу купэу «Щыгъыжъыер» Пэнэхэс дэсхэм дэгъоу ашIэ, художественнэ пащэу, Адыгэ Республикэм инароднэ артисткэу Уджыхъу Марыет иIофшIэгъухэр игъусэхэу Пэнэхэс зыкIокIэ, къуаджэм щыпсэурэ нэнэжъ-тэтэжъ лъапIэхэр, кIэлэцIыкIухэр лъэшэу агъэгушIощтхэу тэгугъэ. ТхылъеджапIэр къызызэIуахыжькIэ апэу фэгушIощтхэм «Щыгъыжъыер» ахэт.
Тхылъыр — шIэныгъэм иIункIыбз, шIэныгъэм икъэкIуапI. ЦIыфым шIэныгъэу зэригъэгъотырэр щыIэныгъэм къыщетэжьы, Пэнэхэс тхылъеджапIэм екIурэ лъагъор орэбагъо.
Сахьидэкъо Нурбый.