КIэлэегъаджэхэм язэнэкъокъу
Краснодар культурэмкIэ и Къэралыгъо апшъэрэ еджапIэ чъэпыогъум и 15 — 17-м Урысыем изэнэкъокъу щыкIощт.
«ИскусствэхэмкIэ кIэлэцIыкIу еджапIэм икIэлэегъэджэ анахь дэгъу» зыфиIорэ зэнэкъокъум апэрэ къекIокIыгъом текIоныгъэр къыщыдэзыхыгъэхэр хэлажьэх. Волгоград ыкIи Ростов хэкухэм, Къырым, Адыгэ Республикэм, Краснодар краим якIэлэегъаджэхэм яшIэныгъэ къагъэлъэгъощт. Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм икIэлэегъаджэу, лъэпкъ IэпэIасэу Абрэдж Гощэфыжь тишъолъыр ыцIэкIэ зэнэкъокъум хэлажьэ.
— Абрэдж Гощэфыжь бгъэфедэн плъэкIыщт искусствэр, лъэпкъ IэпэIасэу зэрэщытыр зэнэкъокъум къыщигъэлъэгъощт. Iэнэ хъураем, еплъыкIэ зэфэшъхьаф зиIэхэм язэIукIэ, нэмыкIхэм ахэлэжьэщт, — къытиIуагъ Адыгэ Республикэм икусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм ипащэу Анзорыкъо Марзыет. — КIэлэегъаджэхэм язэIукIэ мэхьэнэ ин етэты. ЯшIэныгъэ къызэрагъэлъэгъощтым дакIоу, упчIэжьэгъу зэфэхъущтых. ЗэIухыгъэ егъэджэн сыхьатхэр, IэпэIасэхэм яхэхыгъэ къэгъэлъэгъонхэр щыIэныгъэм дештэх. Агъэсэрэ кIэлэеджакIохэм яIофшIэнкIэ алъэIэсых.
Адыгэ лъэпкъ искусствэр Абрэдж Гощэфыжь дахэу зэнэкъокъум къыщегъэлъагъо. Чъэпыогъум и 17-м зэфэхьысыжьхэр зэхэщакIохэм ашIыщтых.
Сурэтым итыр: Абрэдж Гощэфыжь.