«Луч» Москва – «АГУ-Адыиф» Мыекъуапэ — 26:27 (13:19). Чъэпыогъум и 14-м Москва щызэIукIагъэх.

«АГУ-Адыиф»: къэлэпчъэIутыр: Баскакова; къэлапчъэм Iэгуаор дэзыдзагъэхэр: Клименко – 8, Куцевалова – 8, Кобл – 3, Богданова – 3, Казанджян – 2, Казиханова – 1, Краснова – 1, Колодяжная – 1.

Урысыем и Кубок къыдэхыгъэ­нымкIэ финалым и 1/16-м хэхьэрэ ешIэгъум командэхэр щызэнэ­къокъугъэх.

ЗэIукIэгъум иапэрэ кIэлъэныкъо «Адыифым» текIоныгъэр къыщи­хьыгъ – 19:13. Типшъашъэхэр псынкIэу ешIэщтыгъэх, апэкIэ зилъыхэкIэ къэлапчъэм Iэгуаор дадзэнымкIэ шIыкIабэ къагъотыщтыгъ.

Я 40-рэ такъикъым ыуж «Лу­чым» къэлапчъэм Iэгуаор нахьыбэрэ дидзэу ригъэжьагъ: 19:23, 21:23, 22:24. Я 50-рэ такъикъым 23:25-рэ пчъагъэр хъугъэ. Ащ ыуж «Адыифым» игумэкIыгъохэм къа­хэхъуагъ: 24:25, 25:25-рэ.

ЕшIэгъур аухынымкIэ такъи­къитIу къэнагъэу «Лучым» ти­къэлапчъэ Iэгуаор къыдидзагъ – 26:25-рэ. Я 59-рэ такъикъым Дарья Богдановам «Лучым» икъэлапчъэ Iэгуаор дидзагъ – 26:26-рэ.

«Адыифыр» гуIэм хэтэу ыпэкIэ илъыгъ. Тикомандэ икапитанэу Ирина Клименкэм Iэгуаор Дарья Богдановам ритыгъ. Уахътэр ыгъэ­лъапIэзэ Д. Богдановар къэлап­чъэм екIуи, хъагъэм Iэгуаор ридзагъ – 26:27-рэ. ЗэIукIэгъур аухынымкIэ нэгъэупIэпIэгъуи 3 къэнагъэр. «Лучым» гъэхъагъэ ышIынэу уахътэ иIэжьыгъэп.

Мыекъуапэ ибзылъфыгъэ гандбол клубэу «Адыифым» 27:26-у текIоныгъэр къыдихыгъ, финалым и 1/8-м хэхьагъ. Мос­ква икомандэу «Дворец» зыфиIорэм IукIэщт.

Урысыем изэнэкъокъу

Хэгъэгум гандболымкIэ изэнэ­къокъу суперлигэм щэкIо. «Адыифым» итренер шъхьаIэу Александр Реввэ къытиIуагъ тиклуб изичэзыу ешIэгъу Москва зэрэщыкIощтыр. «Адыифыр» «Луч» Москва чъэпыогъум и 16-м Iу­кIэщт.