ЗэхэщакIохэр IофшIагъэхэм къяжэх
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэу Адыгеим икинематографистхэм я Союз зэнэкъокъу зэхещэ.
Урысыем икинематографистхэм я Союз икъутамэу Адыгэ Республикэм щыIэр кIэщакIо фэхъуи, «Мыекъуап, сэ шIу усэлъэгъу!» зыфиIорэ зэнэкъокъур зэхащагъ.
Адыгэ Республикэм культурэмкIэ и Министерствэ, республикэ
м гъэсэныгъэмрэ шIэныгъэмрэкIэ и Министерствэ, Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет, Мыекъуапэ иадминистрацие культурэмкIэ и ГъэIорышIапIэ зэхэщакIохэм IэпыIэгъу афэхъух.
ЕгъэжьапIэр
— Тыркуем, Францием, Израиль, Германием фильмхэр ащытетхыгъэх, бысымхэр дэ
гъоу къытпэгъокIыгъэх, — къеIуатэ Урысыем икинематографистхэм я Союз икъутамэу Адыгэ Республикэм щыIэм ипащэу, режиссерэу, продюсерэу, сценаристэу, Адыгэ Республикэм, Къэбэртэе-Бэлъкъарым искусствэхэмкIэ язаслуженнэ IофышIэшхоу Нэгъаплъэ Аскэрбый. — Тыдэ сыщыIэми Адыгеир, ащ икъэлэ гупчэу Мыекъуапэ сыгу илъых. Тикъалэ сшIодах, рэхьат. Урамхэр занкIэх, кIэракIэх. Зыгорэм сызыкIокIэ, Мыекъуапэ шIэхэу сыфэзэщы.— Тикъалэ ехьылIэгъэ фильмхэр сыд фэдэу гъэпсыгъэщтха? Сыда анахьэу къащыжъугъэлъэгъощтыр?
— Фильмым иамалхэмкIэ тарихъыр, Мыекъуапэ ихъугъэшIагъэхэр, урамхэм ащалъэгъурэр, Мыекъуапэ щыпсэурэ лъэпкъхэм ящыIакIэ, цIыфыгъэ шапхъэхэр, нэмыкIхэри тшIогъэшIэгъоных, къагъэлъагъохэ тшIоигъу.
— IофшIапIэхэм, культурэм, гъэсэныгъэм, спортым, нэмыкIхэм яхьылIэгъэ фильмхэр цIыфхэм агу рихьыщтых.
— Хэбзэ къулыкъушIэхэм, тхэкIо цIэрыIохэм, зэлъашIэрэ артистхэм, спортсменхэм, фэшъхьафхэм афэгъэхьыгъэхэр зэнэкъокъум къырахьылIэщтхэу тэгугъэ.
— Фильмыр зы сыхьата зэрэкIощтыр?
— Хьау, такъикъ 20. Мыекъуапэ дэт музейхэр, еджапIэхэр, спорт псэуалъэхэр, нэмыкIхэри фильмхэм ащытлъэгъухэ тшIоигъу. Ахэр хъугъэ-шIагъэм техыгъэхэу, авторхэм ягупшысэхэм къапкъырыкIыхэу агъэпсынхэ алъэкIыщт. ЗэкIэ фаехэр зэнэкъокъум хэлэжьэнхэу къетэгъэблагъэх.
— Мыекъуапэ ехьылIагъэу фильмхэр зэрэщытыщтхэм сыда лъапсэ фэхъугъэр?
— КъызэрэсIуагъэу, тикъалэ лъэшэу сыгу рехьы. Ащ дакIоу Мыекъуапэ итарихъ, ицIыфхэр, къалэм ищыIакIэ ныбжьыкIэхэм нахьышIоу ядгъашIэ тшIоигъу. Кином пIуныгъэ мэхьанэу иIэр къэтIэтызэ, Мыекъуапэ нахь дахэ зэрэхъущтым тыпылъыщт.
— Зэнэкъокъур сыдигъуа зежъугъажьэрэр?
— 2021-рэ илъэсым чъэпыогъум и 15-м щегъэжьагъэу тыгъэгъазэм и 15-м нэс зэнэкъокъур кIощт.
— Зэфэхьысыжьхэр зэхэщэкIо купым ышIыщтха?
— Ары, хагъэунэфыкIырэ чIыпIэхэр къыдэзыхыхэрэм шIухьафтынхэр афэтшIыщтых. Апэрэ чIыпIэр къыдэзыхырэм сомэ мин 50, ятIонэрэр зыхьырэм сомэ мин 30, ящэнэрэр зыубытырэм сомэ мини 10 яттыщт.
— Адыгэ хабзэм, адыгэ пшъашъэм, адыгэ шым, шIушIагъэм, нэмыкIхэм яхьылIэгъэ фильмхэр цIыфхэм ашIэх. Мыекъуапэ фэгъэхьыгъэмэ сыда кIэух афэхъущтыр?
— Ащи тегупшысэ. Зэфэхьысыжьхэр тшIыщтых, анахь дэгъухэр къыхэтхыщтых. Зэгъэпшэнхэм ауж фильмым инеущрэ мафэ къырыкIощтым, щыIэныгъэм епхыгъэу зэрэгъэпсыгъэщтым гъэзетеджэхэр, кинор зыгу рихьыхэрэр ащыдгъэгъозэщтых.
— Шъуигухэлъхэр къыжъудэхъунхэу шъуфэтэIо.
— Тхьауегъэпсэу.
ШъунаIэ тешъудз: зэнэкъокъум хэлажьэ зышIоигъохэм ялъэIу тхылъхэмрэ яIофшIагъэхэмрэ мы электрон почтэм агъахьынхэ фае: lera.osyka@bk.ru Телефоныр: 8-952-857-91-33.
ЕмтIылъ Нурбый.