Дунаим щэрэIу
Урысыем ишъолъырхэм академическэ музыкэмкIэ яфестивалэу «Музыкальнэ Адыгеир» чъэпыогъум и 11 — 12-м яплIэнэрэу Мыекъуапэ щыкIуагъ.
Адыгэ Республикэм и Къэралыгъо филармоние, республикэм культурэмкIэ и Министерствэ кIэщакIо зыфэхъугъэхэ фестивалым Москва, Санкт-Петербург, Къыблэм, Темыр Кавказым къарыкIыгъэхэр хэлэжьагъэх.
ЗэхэщэкIо купыр
Республикэм культурэмкIэ иминистрэу Аулъэ Юрэ фестивалым изэхэщэкIо куп итхьамэтагъ. Адыгэ Республикэм икомпозиторхэм я Союз ипащэу Нэхэе Аслъан Ю. Аулъэм тхьамэтагъор дызэрихьагъ. ЗэхэщэкIо купым хэтыгъэх республикэм культурэмкIэ иминистрэ иапэрэ гуадзэу О. Гавшинар, культурэмкIэ Министерствэм иотдел ипащэу Б. Шэуджэныр, АР-м и Къэралыгъо филармоние ипащэу М. Къулэр, республикэм искусствэхэмкIэ иколледжэу У. Тхьабысымэм ыцIэ зыхьырэм ипащэу Щ. Куфанэр, АР-м и Къэралыгъо филармоние и Къэралыгъо симфоническэ оркестрэ ихудожественнэ пащэу П. Темыркъанэр, филармонием ипащэ игуадзэу Э. Хьаджымэр.
— КультурэмкIэ Министерствэм, АР-м икомпозиторхэм я Союз, республикэм и Къэралыгъо филармоние зэхащэгъэ фестивалым зеушъомбгъу, — къыщиIуагъ министрэу Аулъэ Юрэ зэфэхьысыжь зэхахьэм. — Урысые Федерацием икомпозиторхэм я Союз и ГъэIорышIапIэ итхьаматэу Рэщыд Калимуллиным тизэхахьэ къыщиIуагъ шъолъырхэм яфестиваль къэралыгъо фестиваль хъуным зэрэфэхьазырыр. Фестивалыр Мыекъуапэ зэрэщыкIуагъэм музыкальнэ искусствэм хэшIыкI фызиIэхэм уасэ фашIыщт. Тэ къыхэдгъэщырэр фестивалым Мыекъуапэ лъапсэ зэрэщишIыгъэр, Урысыем иIофтхьабзэхэм ащыщ хъуным тызэрэпылъыщтыр ары.
— Академическэ музыкэр шэпхъэ лъагэхэм алъыIэсыгъ, — къыщиIуагъ зэIукIэм Рэщыд Калимуллиным. — Ащ фэдэ музыкэр зыгу рихьыхэрэр зэхэзыхы зышIоигъохэр филармонием щызэIукIагъэхэу сэлъытэ. ГъэпсыкIэу фестивалым иIэм узыIэпещэ, Урысыем ифестиваль зызэхатщэкIэ, музыкальнэ искусствэм хэхъоныгъэ инхэр фэхъущтых.
ЕплъыкIэхэр
Адыгэ Республикэм икомпозиторхэм я Союз итхьаматэу Нэхэе Аслъан, нэмыкIхэм фестивалым зызэриушъомбгъугъэр хагъэунэфыкIыгъ. Урысыем ифестиваль зызэхащэкIэ академическэ музыкэм нахь зыкъиIэтыщт.
Музыкальнэ искусствэм ипроизведение дэгъухэм анахь дэгъужьхэр ары академическэ музыкэм хэхьагъэхэу тлъытэхэрэр. Ащ фэдэ IофшIагъэхэм уядэIуныр зымыуасэ щыIэп.
Тигуапэу тядэIугъ
«Музыкальнэ Адыгеим» Москва, Санкт-Петербург, Къэбэртэе-Бэлъкъарым, Къэрэщэе-Щэрджэсым, Дагъыстан, Темыр Осетием — Аланием, Чэчэным, Башкортостан, Татарстан, Астрахань ыкIи Ростов хэкухэм, Краснодар краим, Адыгеим якомпозиторхэм аусыгъэхэр щыIугъэх.
Тигушъхьэ кIуачIэ къэзыIэтыгъэхэм ащыщ дунэе музыкальнэ искусствэм хэхьэгъэ произведениехэм ягъусэу къош республикэхэм, Адыгеим якомпозиторхэм япроизведениехэр фестивалым зэрэщызэхэтхыгъэхэр.
Даур Аслъан Къэрэщэе-Щэрджэсым и Къэралыгъо гимн ыусыгъ, ащ ипроизведениеу къушъхьэчIэсхэм яхьылIагъэр симфоническэ оркестрэм къыригъэIуагъ, дирижерыр Адыгэ Республикэм изаслуженнэ артистэу Аркадий Хуснияров.
Адыгэ Республикэм искусствэхэмкIэ изаслуженнэ IофышIэшхоу, Къэбэртэе-Бэлъкъарым икомпозитор цIэрыIоу ХьаIупэ Джэбраил «Къэбэртэе ныбжьыкIэ увертюр» зыфиIоу ыусыгъэр фестивалым щызэхэтхыгъ. Композитор ныбжьыкIэу Анзорыкъо Долэт ыусыгъэми тигуапэу тедэIугъ.
Композитор ныбжьыкIэу Артем Пысь Мыекъуапэ щапIугъ, Москва консерваторием Iоф щешIэ. Адыгэмэ яшэн-хабзэхэм афэгъэхьыгъэу «шыблэ-уджыр» ащ ыусыгъ. Симфоническэ оркестрэм идирижерэу СтIашъу Къэплъан музыкантхэм япащэу лъэпкъ орэдышъор къырагъэIуагъ.
Урысыем, Адыгеим янароднэ артистэу, композиторэу Дмитрий Шостакович ыцIэкIэ агъэнэфэгъэ шIухьафтыныр къызыфагъэшъошэгъэ Нэхэе Аслъан ипроизведениеу фестивалым щызэхэтхыгъэхэр гум къегущыIыкIых, псэм фэIорышIэх.
Татарстан икомпозиторхэм я Союз итхьаматэу, Урысыем, дунаим ащызэлъашIэрэ композиторэу Рэщыд Калимуллиным зэхахьэм къыщытиIуагъ Урысыем, Европэм ячIыпIэ хэхыгъэхэм ащ фэдэ произведениехэр къащебгъэIонхэр яфэшъуашэу зэрэщытыр.
Нэхэе Аслъан икъэшъо мэкъамэу «Уджыр» рапсодием къыпкъырыкIыгъ. Симфоническэ оркестрэм произведениер къыригъэIуагъ. Дирижерыр СтIашъу Къэплъан, орэдышъор пщынэмкIэ къыхезыгъадзэрэр Адыгэ Республикэм инароднэ артистэу Мышъэ Андзаур. Произведениер лъэпкъ гупшысэм хэгъэщагъ. Гур зэредзэ, егъэгупшысэ, щыIэныгъэм фещэ.
Адыгэ Республикэм инароднэ артисткэу Ольга Мамикян скрипкэмкIэ, АР-м изаслуженнэ артистэу Василий Причепэ флейтэмкIэ, дунэе зэнэкъокъухэм ялауреатэу, профессорэу Санкт-Петербург къикIыгъэ Александр Яковлевым фортепианэмкIэ, нэмыкIхэр концертхэм ахэлэжьагъэх, орэдышъохэр агъэжъынчыгъэх.
Темыр Осетием — Аланием, Астрахань хэкум, Адыгеим, Москва, фэшъхьафхэм якомпозиторхэм япроизведениеу фестивалым щыIугъэхэр гум шIукIэ къинэжьыщтых. Куфэнэ Щамсэт, Сулейманов Юныс, Хьакъуй Аслъан, нэмыкIхэу творческэ купхэм япащэхэм фестивалым щызэхахы-гъэр, щалъэгъугъэр щыIэныгъэм шIукIэ къыщятэжьыщт.
Фестивалым студентхэр, еджэкIо ныбжьыкIэхэр, музыкэр зышIогъэшIэгъонхэр еплъыгъэх. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ фестивалым нахь зиушъомбгъунэу фэтэIо. Хъупэ Мурат Адыгеим фэгъэхьыгъэу ыусыгъэр оркестрэм къыригъэIуагъ.
Фестивалым чанэу хэлэжьагъэхэм шIухьафтынхэр афашIыгъэх.
ЕмтIылъ Нурбый.