Академическэ музыкэм ифестиваль
Хэгъэгум зыщеушъомбгъу
Шъолъырхэм академическэ музыкэмкIэ яфестивалэу «Музыкальнэ Адыгеир» яплIэнэрэу Мыекъуапэ щыкIуагъ.
Фестивалым икъызэIухын къыщыгущыIагъэх Адыгэ Республикэм культурэмкIэ иминистрэу Аулъэ Юрэ, Урысые Федерацием икомпозиторхэм я Союз и ГъэIорышIапIэ итхьаматэу, Татарстан икомпозиторхэм я Союз ипащэу Рэщыд Калимуллиныр, Адыгэ Республикэм икомпозиторхэм я Союз итхьаматэу Нэхэе Аслъан.
Фестивалым изэхэщэкIо куп итхьаматэу Аулъэ Юрэ Iофтхьабзэм хэлажьэхэрэм ти ЛIышъхьэу КъумпIыл Мурат ыцIэкIэ къафэгушIуагъ, фестивалым зызэриушъомбгъурэм мэхьэнэ ин ритыгъ.
Композиторэу Нэхэе Аслъан ыусыгъэу «Нартхэм ярапсодие», Рэщыд Калимуллиным ипроизведениеу «Къушъхьэм инэфынэр», ХьаIупэ Джэбраил ыусыгъэу «Къэбэртэе ныбжьыкIэ увертюрэр», Даур Аслъан имузыкэу къушъхьэчIэсхэм афэгъэхьыгъэ рапсодиеу оркестрэм скрипкэр игъусэу къыригъаIорэр, нэмыкIхэри пчыхьэзэхахьэм щыIугъэх. Филармонием и Къэралыгъо симфоническэ оркестрэ произведениехэр ыгъэжъынчыгъэх. Адыгэ Республикэм изаслуженнэ артистэу, дирижер шъхьаIэу Аркадий Хуснияровым оркестрэм пэщэныгъэ дызэрихьагъ. Адыгэ Республикэм инароднэ артистхэу Ольга Мамикьян скрипкэмкIэ, Мышъэ Андзаур пщынэмкIэ орэдышъохэр къырагъэIуагъэх. Пчыхьэзэхахьэр, зэIукIэгъухэр гъэшIэгъонэу кIуагъэх. Фестивалыр тыгъуасэ зэфашIыжьыгъ.
ЕмтIылъ Нурбый.