Адыгэ Республикэр зызэхащагъэр илъэс 30 зэрэхъурэм фэгъэхьыгъэ мэфэкI концертыр Мыекъуапэ ипчэгу шъхьаIэу В. И. Лениным ыцIэ зыхьырэм щыкIуагъ.

Урысые Федерацием илъэпкъ гвардие икъутамэу Къыблэ шъо­лъырым щыIэм иартистхэм кон­цертыр къызэIуахыгъ. Классикэм хэхьэгъэ произведениехэр, лIыхъужъныгъэм, зэкъо­шныгъэм, дзэ къулыкъум, шIу­лъэгъум афэгъэхьыгъэ орэдхэр къаIуагъэх, оркестрэм мэкъа­мэхэр ыгъэжъынчыгъэх.

Пчэгум щагъэпсыгъэ экранхэм дзэм къулыкъур зэрэщахьырэм ехьылIагъэхэр къыщагъэлъэгъуагъэх. МэфэкIым фэгъэ­хьыгъэу Адыгеим къыфэгушIуа­гъэх.

Концертыр лъагъэкIуатэ

Тиреспубликэ иансамблэ цIэрыIохэм, артистхэм мэфэкI зэхахьэр лъагъэкIотагъ. Адыгеим и Къэралыгъо филармоние и Къэралыгъо оркестрэу «Русская удалым» орэдхэр къыIуагъэх. Анастасия Истамуловам урыс орэдхэр къыхидзагъэх, оркестрэр ащ къыдежъыугъ.

Адыгэ Республикэм и Къэралыгъо академическэ къэшъо­кIо ансамблэу «Налмэсым» «Адыгеим иныбжьыкIэ къашъу» зыфиIоу къышIыгъэр узыIэпищэу къыгъэлъэгъуагъ. Пшъашъэхэри, кIалэхэри мэуджых, пхъэкIыч­хэмкIэ орэды­шъом кIалэхэр дежъыух. Артистхэри гум рихьэу фэпагъэх, ныбжьыкIэхэм агу къегущыIыкIых.

«Налмэсым» ихудожественнэ пащэу, ибалетмейстер шъхьаIэу Хъоджэе Ас­-лъан тизэдэгущыIэгъу къыщыхигъэщыгъ ансамблэм республикэм илъэпкъ искусствэ къыгъэлъагъозэ цIыфхэм зэра­лъыIэсырэр.

Республикэм и Къэралыгъо орэдыIо-къэшъокIо ансамблэу «Ислъамыем» Адыгэ хэкум ехьылIэгъэ орэдэу къыIуа­гъэр лъэпкъ шIэжьым, къэралыгъо гъэ­псыкIэ иIэу республикэр зэ­рэпсэурэм къапкъырэкIы.

Ансамблэу «Ошъутенэм» иартистхэм адыгабзэкIи, уры­сыб­зэкIи къаIогъэ орэдхэри щыIэныгъэм къыхэхыгъэх. Адыгеир республикэ хъугъэу зыщыпсэурэ Урысыем ехьылIэгъэ орэдыр Даутэ Сусанэрэ Юрий Конжинымрэ мэфэкIым диштэу агъэжъынчыгъ.

Адыгэхэм яшэн-хабзэ фэгъэ­хьыгъэ орэдыр «Ошъутенэм» къызыхедзэм, пчэгум итхэр де­жъыугъэх, хъураеу уцухи къэшъуагъэх. Купым урысхэр, адыгэхэр, ермэлхэр, нэмыкIхэри зэрэщыуджыхэрэр тлъэгъугъэ.

Орэдым зеIэты

Пщынаохэу ЛIыбзыу Аслъан, Мышъэ Андзаур, орэдыIохэу Цэй Эркан, Наталья Омельченкэм, Виктор Марковым, Сергей Трутневым, Дзыбэ Фатимэ, Еутых Вячеслав, нэмыкI­хэм мэфэкI концертыр къагъэ­дэхагъ, Еутых Вячеслав орэд зэфэшъхьафхэр узыIэпищэу къыIуагъэх. Ащ ыуж зэлъашIэрэ артистэу Быщтэкъо Азэмат Мые­къуапэ, Адыгеим афэгъэ­хьыгъэ орэдхэр мэкъэ Iэтыгъэ­кIэ къыхидзагъэх, нэбгырабэ ащ дежъыугъ.

Адыгэ Республикэм и Премьер-министрэ игуадзэу Наталья Широковар, республикэм культурэмкIэ иминистрэу Аулъэ Юрэ, ащ иапэрэ гуадзэу Ольга Гавшинар, министерствэм иотдел ипащэу Шэуджэн Бэлэ, АР-м и Къэралыгъо филармоние ипащэу Къулэ Мыхьамэт, фэшъхьафхэу концертым еплъыгъэхэм искусствэм зызэриушъом­бгъурэм, пчыхьэзэхахьэм зыныбжь хэкIотагъэхэр, ныбжьыкIэхэр бэ хъухэу зэреплъыгъэ­хэм мэхьэнэ ин ратыгъ. Искусствэм лIэужхэр зэрэзэфищэ­хэрэр, республикэм икъэралыгъо гъэпсыкIэ зэрэпытагъэр мэфэкI зэхахьэм къыгъэлъэ­гъуагъ.

ЕмтIылъ Нурбый.