Адыгеим имэфэкI мафэхэм яхъулIэу гушIуагъо къытфэзыхьыхэрэм япчъагъэ къыхэхъо.

Урысыем кушъхьэфэчъэ спортымкIэ изэнэкъокъу Санкт-Петербург Iоныгъом и 24 – 30-м щыкIуагъ. Адыгэ Республикэм ихэшыпыкIыгъэ бзылъфыгъэ командэ трекым щызэхащэгъэ зэIукIэгъухэм ахэлэ­жьагъ.

Адыгэ Республикэм изаслуженнэ тренерэу Алексей Войновым ыгъэсэрэ пшъашъэхэу Гюнель Мехтиевам, Елизавета Арчибасовам, Алена Рыцевам ятIонэрэ чIыпIэр къыдахыгъ. Тикомандэ хэтыгъэх Москва щыщэу Гульназ Хатунцевар, Омскэ къикIыгъэ Дарья Степановар.

Апэрэ чIыпIэр Санкт-Петербург икомандэ къыдихыгъ, Москва ихэшыпыкIыгъэ командэ джэрзыр фагъэшъошагъ.

— Адыгэ Республикэр илъэс 30 зэрэхъурэм тыжьын медалыр фэтэгъэхьы, — къытиIуагъ Адыгеим кушъхьэ­фэчъэ спортымкIэ и Федерацие ипрезидентэу Анатолий Лелюк.