Республикэм икъэралыгъо гъэпсыкIэ къыпкъырыкIыгъэ творческэ купхэм искусствэм хэхъоныгъэ фашIы.

Адыгэ Республикэм и Къэралыгъо орэдыIо-къэшъокIо ансамблэу «Ислъамыер» республикэм илэгъу, илъэс 30 зэрэхъугъэр бжыхьэм хигъэунэфыкIыщт.

Филармонием ипащэу щытыгъэ Хъот Заур, Адыгеим иапэрэ профессиональнэ композиторэу Нэхэе Аслъан кIэщакIо фэхъухи, «Ислъамыер» зэхащагъ. Егъэжьэгъум Правительствэр, Парламентыр IэпыIэгъу къафэхъухэзэ, щыIэныгъэм щылъыкIотагъэх.

Орэд къэзыIощтхэри, къэшъощтхэри къагъотыгъэх, оркестрэ яIэ хъугъэ. Апэрэ концертхэр Мыекъуапэ щыкIуагъэх, тилъэпкъэгъухэр анахьыбэу зыщыпсэухэрэ хэгъэгоу Тыркуем рагъэб­лэгъагъ. Краснодар, Налщык, Щэрджэскъалэ, нэмыкIхэм ащыкIогъэ пчыхьэзэхахьэхэр гум шIукIэ къинэжьыгъэх.

Краснодар краим икIэрыкIэу Адыгеир хагъэхьажьынэу къэбархэр къекIокIыхэ зэхъум, «Ислъамыер» общественнэ-политикэ щыIакIэм чанэу хэлажьэрэмэ ащыщыгъ. Ансамблэм ихудожественнэ пащэу, композиторэу Нэхэе Аслъан апэ ит зэхэщакIохэм ахэтэу цIыфхэр зыгъэгъозэрэ пчыхьэзэхахьэхэр Адыгеим щызэхищагъэх.

Бзэр, культурэр къэтыухъумэн­хэм, тарихъыр нахьышIоу тшIэ-ным афэшI къэралыгъо гъэпсыкIэ зиIэ республикэм тыщыпсэун зэрэфаер зэхахьэхэм къащытIуа­тэщтыгъ. Адыгеим ис лъэпкъхэм язэпхыныгъэ гъэпытэгъэным ты­пылъыгъ, — къытиIуагъ Урысы- ем, Адыгеим янароднэ артистэу, композиторэу Дмитрий Шостакович ыцIэкIэ агъэнэфэгъэ шIухьафтыныр къызыфагъэшъошэгъэ Нэхэе Аслъан.

Адыгэ Республикэр пытэу ылъэ теуцуагъ, «Ислъамыер» дунэе фестивальхэм лауреат ащыхъугъ, Урысыем и Правительствэ ипремие къыфагъэшъошагъ. Ижъырэ адыгэ орэдхэу кIодыжьыпэнхэм нэсыгъагъэхэм псэ къапигъэкIэжьыгъ. ТиорэдхэмкIэ, къашъохэмкIэ республикэр лъагэу зыIэтыгъэ «Ислъамыем» артист цIэрыIуабэ щагъэсагъ.

Адыгэ Республикэм къыдэхъу­гъэх симфоническэ оркестрэр, «Русская удалыр», «Ошъутенэр». КIэлэцIыкIу ансамблэхэр, филармонием итворческэ купхэр, рес­публикэм и Къэралыгъо Камернэ музыкальнэ театрэу Хьанэхъу Адамэ ыцIэ зыхьырэр.

Республикэм итеатрэхэм заушъомбгъугъ, спектаклэ гъэшIэгъонхэр къагъэлъагъох.

Сурэтым итыр: «Ислъамыем» орэдыр егъэжъынчы.