Батырхэм акIэлъэкIох
Олимпиадэ джэгунхэм, дунаим, Европэм язэнэкъокъухэм хагъэунэфыкIырэ чIыпIэхэр къащыдэзыхыгъэ тиспортсменхэм щысэшIу къагъэлъэгъуагъ.
Кощхьэблэ нарт батырэу Чыржьын Мухьарбый 1972-рэ илъэсым Олимпиадэ джэгунхэм дышъэ медалыр къащихьыгъ, дунэе зэIукIэгъухэм гъогогъуи 4 рекорд ащигъэуцугъ.
Мыекъуапэ щапIугъэ Владимир Невзоровым 1976-рэ илъэсым Олимпиадэ джэгунхэм дзюдомкIэ дышъэр къащихьыгъ. 1975-рэ илъэсым дунаим, Европэм апэрэ чIыпIэр къащыдихыгъ.
1980-рэ илъэсым аскъэлаехэм янарт шъаоу Емыж Арамбый джэрзыр Олимпиадэ джэгунхэм дзюдомкIэ къащихьыгъ.
Дунаим самбэмкIэ изэнэкъокъухэм Хьэпэе Арамбый гъогогъуитIо дышъэр къащыдихыгъ. Лъэцэр Хьазрэт дунаим ичемпион хъугъэ. Европэм гъогогъуи 4 дышъэр дзюдомкIэ къыщыдихыгъ.
Медаль зэфэшъхьафхэр къыдэзыхыгъэхэм ащыщых Мэрэтыкъо Сахьидэ, Хьэпэе Хьамидэ, Алхъо Сыхьатбый, КIуай Хьазрэт, Бибэ Мурат, Владимир Гуриныр, нэмыкIхэри.
Еджэркъое батырхэм къахэщыгъэх Гостэкъо Хьумэр, Хьасанэкъо Мурат, фэшъхьафхэри. М. Хьасанэкъом дунаим самбэмкIэ дышъэр гъогогъу 11 къыщихьыгъ.
Батырхэм рагъэжьагъэр непэ тиныбжьыкIэхэм лъагъэкIотэнэу ты- фай. ДзюдомкIи, самбэмкIи сэнаущыгъэ зыхэлъ ныбжьыкIэхэр тиIэх. Урысыем иныбжьыкIэхэм атлетикэ онтэгъумкIэ язэнэкъокъу апэрэ чIыпIэр Дзэсэжъ Аслъан къыщихьыгъ.
Кушъхьэфэчъэ спортымкIэ СтIашъу Мамыр, Александр Куликовскэр, Елизавета Ошурковар, нэмыкIхэри хэгъэгум ихэшыпыкIыгъэ командэ хэтых. Баскетбол, волейбол, гандбол, футбол командэхэр Урысыем изэнэкъокъухэм ахэлажьэх. Спорт псэолъэ зэтегъэпсыхьагъэхэр, ясэнэхьат хэшIыкI фызиIэ тренерхэр тиIэх. Нахьыпэрэм фэдэу медальхэр тиспортсменхэм къыдахынэу афэтэIо.