Адыгэ шъуашэм и Мафэ фэгъэхьыгъэ мэфэкI зэхахьэр Адыгэ Республикэм и Къэралыгъо филармоние щыкIуагъ.

Илъэси 10 хъугъэу адыгэ шъуашэм и Мафэ тэгъэмэфэкIы. Адыгэ Республикэр загъэпсыгъэр илъэс 30 зэрэхъурэм тыпэгъокIызэ, адыгэ шъуашэм и Мафэ хэдгъэунэфыкIыгъ.

Пчыхьэзэхахьэр зезыщагъэхэ артистхэу Долэ Миланэрэ Къонэ Мыхьамэтрэ зэфэхьысыжьхэр ашIыхэзэ, къэралыгъо гъэпсыкIэ иIэу Адыгэ Республикэр псэузэ, тимэфэкIхэм япчъагъэ зэрэхэ­хъуа­гъэр къаIуагъ. Адыгабзэмрэ тхыбзэмрэ я Мафэ, ИлъэсыкIэ мэфэкI, Хэкужъым къэзыгъэзэ­жьыгъэм и Мафэ, адыгэ быра­къым и Мафэ, адыгэ шъуашэм и Мафэ, нэмыкIхэри къахэхъуа­гъэх.

Адыгэ Республикэм и Къэра­лыгъо академическэ къэшъокIо ансамблэу «Налмэсым» адыгэ шъуашэм и Мафэ фэгъэхьыгъэ пчыхьэзэхахьэр къызэIуихыгъ.

МэфэкI зэхахьэм хэлэжьа­гъэх ансамблэхэу «Ислъамыер», «Мыекъуапэ инэфылъэхэр», «Ащэмэзыр», «Ошъутенэр», «Зэрдахэр», «Абрекхэр». Лъэпкъ къашъохэр къашIыгъэх, адыгэ орэдхэр къаIуагъэх.

Дунэе фестиваль-зэнэкъо­къум илауреатэу Хъурэнэ Азэ адыгэ пшъашъэм ехьылIэгъэ орэдыр ыгъэжъынчыгъ. Адыгэ Респуб­ликэм, Къэрэщэе-Щэрджэсым язаслуженнэ артистэу ЛIыбзыу Аслъан пщынэмкIэ орэдышъохэм таригъэдэIугъ.

Республикэм и Къэралыгъо орэдыIо-къэшъокIо ансамблэу «Ислъамыем» нарт Шэбатныкъо фэгъэхьыгъэ орэдыр къыIуагъ.

Дунаим щызэлъашIэрэ сурэтышI-модельерэу СтIашъу Юрэ имэфэкI адыгэ шъуашэм и Мафэ тефэу хигъэунэфыкIыгъ. Искусствэм бзэ гъэнэфагъэ щыриIэу иIэшIагъэхэмкIэ цIыфхэм адэгущыIэрэ СтIашъу Юрэ пчыхьэзэхахьэм хэлэжьагъ. Юбилярыр илъэс 90-рэ зэрэхъугъэм фэшI фэгушIуагъэх. Псауныгъэ пытэ иIэнэу, иIэшIагъэхэмкIэ нахьыбэрэ тигъэгушIонэу зэхахьэм щыфаIуагъ.

«Налмэсыр», нэмыкI къэшъо­кIо купхэр пчыхьэзэхахьэм зыхэлажьэхэм, адыгэ шъуашэм идэхагъэ къагъэлъэгъуагъ, тагъэгушIуагъ.

Адыгэ шъуашэр адыгэ лъэпкъым къызэрэхэкIыгъэр, Кавказ илъэпкъхэм зэраштагъэр, дунаим щашIэ зэрэхъугъэр зэхахьэр зезыщагъэхэм къаIуагъ, шъуашэм фэгъэхьыгъэ усэмэ къяджагъэх.

Лъэпкъ IэпэIасэхэу Цурмыт Рузанэ, Боджэкъо Бэлэ, Мые­къопэ къэралыгъо технологическэ университетым икупэу театрэм имодэ пылъхэм яIофшIагъэхэр мэфэкI зэхахьэм къыщагъэлъэгъуагъэх. Адыгэ шъуа­шэм идэхагъэ, лъэпкъ шъуашэр зэрэзепхьащтым яхьылIэгъэ къэгъэлъэгъоным уегъэгъуазэ, уегъэгушхо.

Пчыхьэзэхахьэм урысхэр, адыгэхэр, къэзэкъхэр, къэндзал­хэр, нэмыкI лъэпкъхэр зэфищагъэх. Кавказ илъэпкъхэм къякIоу зэрахьэрэ адыгэ шъуашэм идэхагъэ тапэкIи зэрэхэхъощтым тицыхьэ телъ. Краснодар краим, Санкт-Петербург, фэшъхьафхэм къарыкIыгъэхэр мэфэкIым зэфищагъэх.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр иеплъыкIэхэм къащыхигъэщыгъ мэфэкIым лIэужхэм, унагъохэм язэфыщытыкIэхэр зэригъэпытэхэрэр. Ны-тыхэм ясабыйхэр ягъусэхэу мэфэкIым хэлажьэх, адыгэ шъуашэр зезыхьэхэрэм япчъагъэ хэпшIыкIэу хэхъуагъ. Шъуашэр щыгъын къодыеу алъытэрэп. Лъэпкъ шъуашэм цIыфыр епIу, щыIэныгъэм фегъасэ.

Къэралыгъо гъэпсыкIэ иIэу Адыгеир зэрэпсэурэм ишIуагъэ­кIэ титарихъ, шэн-хабзэхэр нахьышIоу зэтэгъашIэх, тинеущрэ мафэ нахьышIу зэрэхъущтым тицыхьэ телъэу къыкIэлъыкIощт мэфэкIхэм зафэтэгъэхьазыры.

Адыгэ шъуашэм и Мафэ Правительствэм, Парламентым якъулыкъушIэхэр, культурэм, гъэсэныгъэм, спортым яIофы­шIэхэр, IэкIыб къэралыгъохэм къарыкIыжьыгъэхэ тилъэпкъэгъухэр, республикэ общественнэ движениеу «Адыгэ Хасэм» хэтхэр, ныбжьыкIэхэр бэ хъу­хэу хэлэжьагъэх.

Сахьидэкъо Нурбый.