Адыгэ Республикэм культурэмкIэ иапэрэ министрэу Хьанэхъу Адам къызыхъугъэр илъэс 75-рэ зэрэхъурэм фэгъэхьыгъэ зэхахьэр Мыекъуапэ щыкIуагъ.

КъокIыпIэм щыпсэухэрэ лъэпкъхэм яискусствэкIэ Къэралыгъо музеим и Темыр-Кавказ къутамэ ипащэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэтрэ Адыгэ Республикэм и Къэралыгъо Камернэ музыкальнэ театрэу Хьанэхъу Адам ыцIэ зыхьырэм ихудожественнэ пащэу, Урысыем, Адыгэ Республикэм искусствэхэмкIэ язаслуженнэ Iофы­шIэшхоу, искусствоведениемкIэ кандидатэу Сулейманов Юнысрэ зэхахьэм кIэщакIо фэхъугъэх. Музеим иIофышIэу Цэй Саидэ пчыхьэзэхахьэр зэрищагъ.

Музеим щырекIокIыгъэ Iоф­тхьабзэм Адыгэ Республикэм культурэмкIэ иминистрэ игуа­дзэу, Адыгэ Республикэм изаслуженнэ журналистэу Кушъу Светланэ, Камернэ музыкальнэ театрэм ихудожественнэ пащэу Сулейманов Юныс къыщыгущыIагъэх.

— Культурэм цIыфхэр нахь куоу щыгъэгъозэгъэнхэм фэшI ШъэуапцIэкъо Аминэт сыригъу­сэу зэIукIэгъур зэхэтщагъ, — къыIуагъ Сулейманов Юныс. — Культурэмрэ искусствэмрэ ныбжь зэфэшъхьаф зиIэхэр,. лъэпкъхэр зэфащэх. Хьанэхъу Адам интернационалистэу щытыгъ. Музыкальнэ искусствэм зиушъомбгъуным иIахьышIу хишIыхьагъ.

Республикэм и Къэралыгъо симфоническэ оркестрэ, оркестрэу «Русская удалыр», ансамблэу «Ошъутенэр», Камер­нэ музыкальнэ театрэр, нэмыкI­хэри зэхэщэгъэнхэм, орэдыIо— къэшъокIо ансамблэу «Ислъамыер» пытэу ылъэ теуцоным афэшI Хьанэхъу Адам Iофыбэ ыгъэцэкIагъ.

ЩыIэныгъэм бэгъашIэ щымыхъугъэми, Хьанэхъу Адам IофшIэгъэшхо къы­гъэнагъ. Ащ ыцIэ Адыгеим и Къэралыгъо Камернэ музыкальнэ театрэ ехьы. Аужырэ илъэсхэм Мые­къуапэ дэт унэу зыщыпсэущтыгъэм мыжъобгъу къыщыфызэ­Iуахыгъ.

Театрэм икъэ­гъэлъэгъон

Камернэ музыкальнэ театрэу А. Хьанэхъум ыцIэ зыхьырэм хьакIэр пчыхьэшъхьашхэм зэрэрагъэблэгъагъэм ехьылIэгъэ спектаклэр КъокIыпIэм щыпсэухэрэ лъэпкъхэм искусствэхэмкIэ я Къэралыгъо музееу Мые­къуапэ дэтым къыщи­гъэлъэ­гъуагъ.

Италием ишэн-хабзэхэм яхьылIэгъэ зэхахьэр зэрэкIуагъэр режиссерэу Виктор Серебрянскэм театрэм щигъэуцугъ. Зиусхьаным ыпхъу унагъо ихьаным фэшI псэлъыхъо дэгъу къыфигъоты шIоигъу. Арэу щытми, пшъашъэр ятэ едэIурэп, шъэфэу музыкантым IокIэ. Му­зыкантыр баеп, тхьамыкIэхэм ащыщ. Пшъашъэм ылъэгъурэр, зэхихырэр къыдилъытэхэзэ, шIулъэгъу къабзэм гукIэ фэкIо.

Артистхэу Александр Сте­пано­вым, Наталья Амельчен­кэм, Александр Мальцевым роль шъхьаIэхэр къашIых. Шъхьэ­гъусэ зэфэхъугъэхэм къафэгушIохэрэм ярольхэр къэшъуа­кIохэм, орэдыIохэм, фэшъхьафхэм къашIых. Ахэр бэ зэрэхъухэрэм къэгъэлъэгъоныр къегъэбаи.

Зиусхьаным ироль къэзышIырэ Александр Степановым шъэбагъэу хэлъымкIэ узыIэпещэ. Пшъашъэм ипсэлъыхъо шъхьангъупчъэмкIэ унэм къехьэ, унагъом зыригъэлъэгъунэу фаегоп. ШIулъэгъум зэлъиштэгъэ пшъа­шъэр псэлъыхъом иорэдхэм ядэIузэ гупшысэу ышIыхэрэр ятэ риIонхэу зегъэхьазыры…

Артистхэм якъашъохэмкIэ, орэдхэмкIэ узыIэпащэ. ЯгущыIэхэр дэгъоу зэхэохых.

Хьанэхъу Адам классикэм къыхэхыгъэхэ произведениехэр, пьесэхэр ыгу рихьыщтыгъэх, лъэпкъ фольклорым мэхьэнэ ин ритыщтыгъ. Музыкальнэ театрэм а­­хэр къыдилъытэхэзэ иIофшIэн лъегъэкIуатэ.

Республикэм культурэмкIэ и Министерствэ иотдел ипащэу Хьанэхъу Адам Iоф дэзышIэгъэ Шэуджэн Бэлэ, А. Хьанэхъум ышнахьыжъэу, шIэныгъэлэжьэу Хьанэхъу Руслъан, ащ ишъхьэгъусэу Аминэт, Хьанэгъу Адам ишъхьэгъусэу Асыят, культурэм Iоф щызышIэхэрэр, искусствэм пылъхэр, нэмыкIхэри пчыхьэзэхахьэм хэлэжьагъэх.

Камернэ музыкальнэ театрэм иоркестрэ идирижерэу, Адыгэ Республикэм изаслуженнэ артистэу Аркадий Хуснияровыр музыкантхэм япащэу орэдышъо­хэр агъэжъынчыгъэх. А. Хьа­нэхъум иIахьылхэр зэхэщакIо­хэм, артистхэм лъэшэу афэразэхэу «тхьашъуегъэпсэу» ара­Iожьыгъ.

ЕмтIылъ Нурбый.