Мыекъопэ къэралыгъо технологическэ университетым къэгъэлъэгъонэу «ОхътакIэм диштэрэ пилотхэр» зыфиIорэр мы мафэхэм щыкIуагъ. Iофтхьабзэр Дунэе форумэу «ЦIыф зэрымыс быбырэ пкъыгъохэр: лъэныкъуитIукIэ агъэфедэрэ технологиехэр» зыфиIорэм къыдыхэлъытагъэу зэхащагъ. Къыблэ дзэ шъолъырым и ГъэIорышIапIэ яIэпыIэгъоу ар рагъэкIокIыгъ.

Iофтхьабзэм студентхэр, кIэлэеджа­кIохэр ыкIи мы лъэныкъомкIэ экспертхэр хэлэжьагъэх. ЦIыф зэрымыс быбырэ пкъыгъохэмкIэ гъэхъагъэу щыIэхэр къызщагъэлъэгъогъэ чIыпIэ мыр хъугъэ. Къэгъэлъэгъоным къекIолIагъэхэм БПЛА-м епхыгъэ IофшIэнэу зэшIуахыгъэхэм нэIуасэ афэхъунхэ амал яIагъ, мыщ епхыгъэу Iоф зышIэхэрэм гущыIэгъу афэхъугъэх ыкIи цIыф зэрымыс быбырэ пкъыгъохэм адэлэжьэгъэнымкIэ практическэ опыт агъотыгъ.
Къэзэрэугъоигъэхэм апае тематическэ площадки 5 къызэIуахыгъагъ. Ана­хьэу ашIогъэшIэгъоныгъэр «БПЛА-м иоператорхэр зыщагъэхьазырхэрэ штабыр» зыфиIорэр ары, ащ дронхэр зэрагъэIорышIэхэрэм епхыгъэу къащафаIотагъэх, джащ фэдэу агу рихьыгъэх «ЦIыф зэрымыс быбырэ авиацием исалон» ыкIи «Дронхэр зыщызэпагъэчъэрэ полигоныр» зыфиIохэрэр.
КIэлэеджакIомэ апае площадкэу «Уигъэхъагъэмэ ягъунапкъэхэр» зыфиIорэм Iоф ышIагъ. МКъТУ-м ифакультетхэм мастер-классхэр къащатыгъэх, университетым игъэсэныгъэ амалхэм кIэлэ­еджакIохэр нэIуасэ афашIыгъэх, инженернэ ыкIи техническэ сэнэхьатхэр зыфэдэхэр арагъэлъэгъугъэх.
Шъугу къэдгъэкIыжьын джырэкIэ цIыф зэрымыс быбырэ пкъыгъохэм ядзэхэр Урысыем иIэхэ зэрэхъугъэр. УФ-м зыкъэухъумэжьынымкIэ и Министерствэ мы лъэныкъомкIэ операторхэм яугъоин ыублагъ. Ащ фэдэ шIоигъоныгъэ зиIэхэм зыщыпсэухэрэм ащыIэ дзэ комиссариатхэм защарагъэтхышъущт. УпчIэ зиIэхэм зыздагъэзэшъущтыр: къ. Мыекъуапэ, ур. Комсомольскэр, 217-рэ, я 119-рэ, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28.
ДЕЛЭКЪО Анет.