Зэнэкъокъоу «Хэгъэгум иухъумакIохэм я Кубок» зыфиIорэр Адыгеим икъэлэ шъхьаIэ щыкIуагъ.

ХэушъхьафыкIыгъэ дзэ операцием, Iэшэ зэIуупIэныгъэхэм ыкIи дзэ къулыкъум яветеранхэр спорт комплексэу «Ошъутенэм», С.Г. Алифиренкэм ыцIэ зыхьырэ щэрыопIэ еджапIэм ащызэнэ­къокъугъэх. Республикэм имуниципалитетхэм къарыкIыгъэ нэбгырэ 30 фэдизмэ армреслингымкIэ, пауэрлифтингымкIэ, теннис цIыкIумкIэ, дартсымкIэ, щэрыонымкIэ заушэтын амал яIагъ.
Iофтхьабзэм кIэщакIо фэхъугъэх Къэ­ралыгъо фондэу «Хэгъэгум иухъумакIо­хэр» зыфиIорэм ишъолъыр къутамэрэ АР-м физическэ культурэмкIэ ыкIи спортымкIэ и Комитетрэ.
Пшъэрылъ шъхьаIэу ащ иIэр физическэ культурэм, спортым ыкIи адаптивнэ спорт лъэпкъхэм республикэм зыщаушъомбгъуныр, ветеранхэм социальнэу щыIэныгъэм зыкъыхагъотэныр.
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат, АР-м и Парламент идепутатхэм ацIэкIэ къэзэрэугъоигъэхэм шIуфэс къарихыгъ Къэралыгъо Советым — Хасэм и Тхьаматэ игуадзэу, хэушъхьафыкIыгъэ дзэ операцием иветеранхэм я Ассоциацие итхьаматэу, УФ-м и ЛIыхъужъэу Цэй Эдуард. Ащ зэрэхигъэунэфыкIыгъэмкIэ, мы спорт зэнэкъокъум хэлэжьэгъэ ветеранхэр лIыхъужъныгъэм ыкIи лIыгъэм ищысэх. Ахэм ящыкIэгъэ IэпыIэгъур агъотынымкIэ республикэм ихэбзэ къу­лыкъухэм алъэкI къагъанэрэп. ЗэуапIэм Iутхэу Хэгъэгур къызэраухъумагъэм дакIоу, ахэм непэ щыIэныгъэм чанэу зыкъыхагъуатэ, общественнэ щыIакIэм хэлажьэх, спортым гъэхъагъэхэр щашIых.
Шъолъыр фондым ипащэу ПIатIыкъо Аслъан зэнэкъокъум хэлажьэхэрэм закъыфигъэзагъ:
— Фондэу «Хэгъэгум иухъумакIохэм», тисоциальнэ координаторхэу непэ къы­шъуфэгумэкIыхэрэм ацIэкIэ шIуфэс шъосэхы ыкIи Iофтхьабзэм шъузэрэхэлажьэрэмкIэ «тхьашъуегъэпсэу» шъо­сэIо. ГъэхъэгъэшIухэр шъушIынхэу ыкIи текIоныгъэр къыдэшъухынэу шъуфэсэIо. Спорт зэнэкъокъум шъузэрэхэлэжьэгъэ закъор текIоныгъэу плъытэ хъущт.
Зэо зэфэшъхьафхэм апхырыкIыгъэ ветеранхэр апэрэу зэзыпхыгъэхэ хъугъэ-шIагъэу мыр зэрэщытыр Iофтхьабзэм къыщыхагъэщыгъ. СпортымкIэ зэрэзэ­нэкъокъугъэхэм дакIоу, гущыIэгъу зэфэхъунхэ амал яIагъ. Мыщ хэлэжьэгъэ пстэуми кIэух дэгъухэр къагъэлъэгъуагъэх, бгъэхалъхьэхэр, дипломхэр аратыгъэх, анахьэу къахэщыгъэхэр нэпэеплъ шIухьафтынхэмкIэ агъэшIуагъэх.
ХэушъхьафыкIыгъэ дзэ операцием сэкъатныгъэ хэзыхыгъэ Игорь Гилевыр лъэныкъуищкIэ зэнэкъокъум хэлэжьагъ: пауэрлифтингыр, армреслингыр ыкIи дартсыр. АужыритIумкIэ апэрэ чIыпIэр къыдихыгъ. Игорь 2023-рэ илъэсым имэкъуогъу мазэ къыщегъэжьагъэу адаптивнэ спортымкIэ республикэ еджа­пIэм зыщегъасэ. Охътэ кIэкIым къы­кIоцI ипсауныгъэ зыпкъ ригъэуцожьын ылъэ­кIыгъ ыкIи нэмыкI шъолъырхэм ащызэхащэрэ спорт зэнэкъокъухэм Адыгеир къащегъэлъагъо.
— УIэгъэ ужым сIэхэр есымыушхо­хэу, сыгу сымыгъэкIодэу щыIэныгъэм зыкъы­зэрэхэзгъотагъэр фронтым щыIэ дзэкIолI сикъошхэм, нэмыкI ветеранхэу къэзгъэ­зэжьыгъэхэм язгъэлъэгъуным, щысэшIу сафэхъуным пае слъэкI къэзгъанэрэп. ИкIыгъэ илъэс закъом зэнэкъокъу 12-мэ сахэлэжьагъ, бгъэхэлъхьэ 11 къысфагъэшъошагъ, — къыIуагъ Игорь Гилевым.
ХэушъхьафыкIыгъэ дзэ операцием иветеранэу Ибрагим Гасратовыр иеплъыкIэкIэ къыддэгощагъ:
«Iофтхьабзэр дэгъоу рагъэкIокIыгъ, сыгу рихьыгъ. ЗэхэщакIохэм ыкIи фондым ащ сыхэлэжьэн амал къызэрэсатыгъэмкIэ сафэраз. ТIэкIу сыгукIэ сыгумэкIыгъэми, кIалэхэм сызэраIукIагъэр сигуапэ, зэкъошныгъэр зэхэтшIагъ. Джащ фэдэ зэIукIэгъухэр нахьыбэнхэу тыфай».
Спорт зэнэкъокъум икъызэIухын фэбагъэ къыхилъхьагъ творческэ кIэлэцIыкIу купэу «Шпаргалкэм» ыкIи дзэ хорым къагъэхьазырыгъэ концертым.
Iэшъынэ Сусан.