УФ-м культурэмкlэ и Министерствэ ипрограммэу «Куль­турэм икъоджэ lофышl» зыфиlорэм Адыгэ Республикэр хэлажьэ. Ащ ишIуагъэкIэ культурэм иIофышIэхэу къуа­джэхэм афимыкъухэрэр арагъэгъотынхэр къэралыгъом имурад. Шэуджэн районым ит псэупIэу Пщыжъхьаблэ щыщэу Датхъужъ Ислъам мы программэм хэлэжьагъ.

ИскусствэхэмкӀэ колледжэу Тхьабысымэ Умарэ ыцӀэ зыхьырэр ащ къыу­хыгъ. Къуаджэу Мамхыгъэ и Гупчэ клуб системэ Iоф щишIэнэу ыублагъ.
Программэм хэлажьэхэрэм хэушъхьа­фыкIыгъэ сэнэхьат иIэн фае. Орэд­къэIонымкIэ, лъэпкъ Iэмэ-псымэхэм къя­гъэIогъэнымкIэ, къэшъонымкIэ музыкальнэ сэнэхьатхэр зиIэ ныбжьыкIэ-
хэр ары IэпыIэгъур къызфэзыгъэфедэн зылъэкIыхэрэр.

— «Культурэм икъоджэ lофышl» зыфиlорэ программэм сыхэлэжьагъ, сомэ миллион къысатыгъ. Шапхъэхэм къызэрэдалъытэу, сомэ миллионым хьа­къулахьыр хагъэкIыгъэп ыкIи узэрэфаеу бгъэфедэн плъэкIыщтыгъ, ахъщэм хэзгъахъуи, псэупIэ зэзгъэгъотыгъ. Программэм къыдилъытэрэ шапхъэхэр згъэ­цэкIагъэх ыкIи Iоныгъо мазэм Iоф­шIэныр езгъэжьагъ. Къуаджэу Мамхы-
гъэ дэт Гупчэ клуб системэм Iоф щысшIэнэу сагъэкIуагъ, Iоныгъо мазэм ар езгъэжьагъ. Ар сищыӀэныгъэ гъогукӀэ лъэбэкъушхоу хъугъэ, сичӀыгу гупсэ сыщылэжьэнэу зэрэхъугъэм нахь сы­къыгъэгушхуагъ. Сыкъызщыхъугъэ районым сыфэшъыпкъэу, икультурнэ щыIа-
кIэ хэхъоныгъэ езгъэшӀыныр, къыткӀэ­хъухьэрэ лӀэужым сыдэлэжьэныр сэркIэ насыпыгъ, — еIо тигущыIэгъу.
КIэлэ ныбжьыкIэм къызэриIуагъэмкIэ, ицIыкIугъом къыщегъэжьагъэу орэд­къэIоныр икIас. Лъэпкъ фольклор ансамблэу «Нартшъау» зыфиIорэми иорэдыIу. ИIофшIэн гухахъо хигъуатэу Ислъам мэлажьэ. Къуаджэм икультурнэ щыIакIэ чанэу хэлажьэ, къыхихыгъэ сэ­нэхьатым фэшъыпкъ. Уисэнэхьат шIу умылъэгъоу, кIэлэцIыкIухэм уафэмыщагъэу IофшIэныр бгъэцэкIэн зэрымылъэ­кIыщтыр къыгурэIо. КIэлэеджакIо пэпчъ ащ екIолIэкIэ гъэнэфагъэ къыфегъоты. ХэушъхьафыкIыгъэ программэм тетэу орэдкъэIонымкIэ егъэджэнхэр зэхещэх.
— Нэбгырэ пэпчъ сэнаущыгъэ горэ хэлъэу, зыгорэм фэкъулаеу къэхъу. Сэ сицIыкIугъом къыщыублагъэу орэдкъэ­Iоныр сикIас, Хьакурынэхьаблэ дэт музыкальнэ еджапIэм сыщеджагъ. КIэлэегъаджэу Хъымыщэкъо Эммэ орэдкъэIонымкIэ Iоф къыздишIагъ. Искусст­вэхэмкӀэ колледжыр къызысыухыгъэм ыуж Шэуджэн районымкIэ лъэпкъ куль­турэм и Гупчэ ипащэу Iэшъхьэмэфэ Сусаннэ ансамблэу «Нартшъау» зыфиIорэм сыригъэблэгъагъ ыкIи программэм икъэбар къысфиIотагъ. СыгукIэ сызфэщэгъэ вокалым ныбжьыкIэхэр фезгъэджэнхэ, шIэныгъэу сIэкIэлъымкIэ садэгощэн амал зэрэсиIэщтым сигъэгушIуагъ. Шъыпкъэ, укIэлэегъэджэ ныбжьыкIэу джырэ кIэлэеджакIохэм уахэтыныр, зыкъябгъэштэныр IэшIэхэп. Сиегъэджэн сыхьатхэр гъэшIэгъонэу зэрэзэхэсщэщтхэм сыпылъ. Сэнаущыгъэ зыхэлъ кIэлэцIыкIухэм хэушъхьафыкIыгъэ екIолIакIэхэр згъэфедэзэ садэлажьэ. Мамхыгъэ орэдыIо куп щызэ­хасщэ сшӏоигъу. Музыкэм кӀалэхэр зэ­рэпылъхэр сигуап, творчествэм куоу зэрэхэсщэщтхэм сыпылъ. Ащ нэмыкIэу Пщыжъхьаблэ дэт культурэм и Унэ тхьамафэм тӀо сэкIо. Эстраднэ адыгэ орэдхэр къаӀонхэу кӀэлэцӀыкӀухэм ясэгъашӀэ, — къеIуатэ Ислъам.
ТигущыIэгъу къызэриIотагъэмкIэ, Дат­хъужъхэм яунагъо искусствэр якIас. Янэ ылъэныкъокӀэ янэжъэу Быщтэкъо Римэ ицӀыкӀугъом къыщегъэжьагъэу сэнаущыгъэшхо хэлъыгъ: къашъощтыгъ, къоджэ спектаклэхэм ахэлажьэщтыгъ, пщынэ къеощтыгъ, орэдкъэӏоныр икӏэсагъ. Ыныбжь хэкӀотагъэу усэхэр, орэдхэр ытхыщтыгъэх. Ятэ ылъэныкъокӀэ ятэжъ ышэу Датхъужъ Борис мэкъэ дахэ ­иӀагъ, зэхахьэхэм орэд къащиӀоу бэрэ къы­хэ­кӀыщтыгъэу къаIотэжьы.
— Шэуджэн районым ыцIэ дахэкIэ рязыгъэIорэ ансамблэу «Нартшъаом» сыщылэжьэныр сэркIэ насыпыгъ. Лъэпкъым ыгъэлъэпIэрэ ижъырэ орэдхэр къэтэIох. Адыгэ лъэпкъым итарихъ къэу­хъумэгъэным тапэкIи тыпылъыщт. Купыр зызэхащагъэр мыгъэ илъэс 70-рэ хъугъэ. Ащ фэгъэхьыгъэу концерт гъэшIэгъонхэр тэгъэхьазырых, — еIо тигущыIэгъу.
— Къалэм сыкъыдэкIыжьи къуаджэм сыкъызэрэкIожьыгъэм зы мафи сырыкIэгъожьыгъэп. ЩыIэныгъэм сыщэгушIукIы, ащ дакIоу сиунагъо кIуачIэ къысеты, тамэ къызгуегъакIэ. Сянэрэ сятэрэ ягукIэгъу гъунэ иIэп. Сыныб­жьыкIэ дэдэу сиунэе унэ сиIэ зэрэ­хъугъэм къарыурэ гушхуагъэрэ къысхелъхьэ, — еIо Ислъам.
Культурэм епхыгъэ апшъэрэ еджапIэхэм ачIахьэрэр макIэ. Сэнэхьат зэз­гъэгъотыгъэхэми къуаджэм агъэзэ­жьынэу фаехэп, ныбжьыкIэхэм Iоф адэзышIэн щыIэп. Режиссерхэм, хореографхэм, музыкантхэм районхэм арыт культурэм иунэхэр ащэкIэх. А гумэкIыгъор дэгъэзыжьыгъэнымкIэ мы программэм ишIуагъэ къэкIощт.
Лъэпшъыкъо Фатим.