Мыекъопэ къэралыгъо технологическэ университетым Iэнэ хъураеу «ШIэныгъэ-гъэсэ­ны­гъэ кластер — къэралыгъомрэ Адыгэ Республикэмрэ яэкономикэ пае амалхэр» зы­фиIорэр щыкIуагъ.

Iофтхьабзэм хэлэжьагъэх хэбзэ къулы­къухэм, гъэсэныгъэ организациехэм ялIыкIохэр, шIэныгъэлэжьхэр ыкIи нэмыкIхэр.
АР-м и ЛIышъхьэу КъумпIыл Мурат ыцIэкIэ къэзэрэугъоигъэхэм шIуфэс къа­рихыгъ АР-м иминистрэхэм я Кабинет и Тхьаматэ игуадзэу, финансхэмкIэ ми­нистрэу Виктор Орловым. Iофтхьабзэр зэрищагъ компаниеу «RUSEED» зыфи­Iорэм илIыкIоу Марк Гехт.
Агробиотехнопаркэу «Кластер Вавилов» зыфиIорэм хэгъэгум иагропромышленнэ комплекс технологическэ шъхьафитныгъэ иIэнымкIэ мэхьанэшхо зэриIэр, шIэныгъэр, гъэсэныгъэр, бизнесыр зэпхыгъэнхэмкIэ ар зэрэамалышIур Iоф­тхьабзэм къыщаIуагъ. Адыгэ Респуб­ли­кэм шIэныгъэ-гъэсэныгъэ кластерыр зэрэщызэхащэрэр ары анахьэу къэзэ­рэугъоигъэхэр зытегущыIагъэхэр. Марк Гехт кластерыр зэрэгъэпсыгъэщтым къытегущыIагъ. Наукэр, гъэсэныгъэр ыкIи къэралыгъор ащ зэрэзэрипхыхэрэр къыIуагъ.
Мэкъу-мэщым хэхъоныгъэ ышIыным фэшI шIэныгъэ куу зиIэ IофышIэхэм ягъэхьазырын зэрэдэлэжьэщтхэм шъхьа­фэу тегущыIагъэх. Мыекъопэ къэралыгъо технологическэ университетым ирек­торэу Къуижъ Саидэ республикэм мэкъумэщ гъэсэныгъэр зэрэщыгъэпсыгъэм ыкIи практикэм тегъэпсыхьагъэу зэрэрагъаджэхэрэ шапхъэхэм ягугъу къышIыгъ. Ащ къыкIигъэтхъыгъ экономикэм илъэныкъо зэфэшъхьафхэмкIэ IофышIэхэм ягъэхьазырын екIолIэкIэ гъэ­нэфагъэ къызэрэфагъотырэр. Ахэм ащыщ цIыф зэрымыс быбырэ пкъыгъохэу непэрэ мафэм жъугъэу агъэфедэхэрэр.
«Кластер Вавилов» зыфиIорэм игъэ­псын мэхьанэу иIэр Iофтхьабзэм къыща­Iуагъ. Ащ ипроект шIэныгъэ-ушэтын ыкIи гъэсэныгъэ экосистемэу ары зэрагъэ­нафэрэр. Ащ хэхьащтых селекционнэ-семеноводческэ гупчэу лъэпкъыкIэхэр ыкIи гибридхэр къызщаугупшысыщтхэр, молекулярнэ лабораториеу генетическэ уплъэкIунхэр ыкIи маркернэ селекциехэр зыщашIыщтхэр, джащ фэдэу ушэтынхэр зыщакIущт шъофхэр яIэщтых. Мэхьанэшхо зэратырэмэ ащыщ гъэсэныгъэ ыкIи социальнэ инфраструктурэр. Лекцие къызыщатыщт гъэсэныгъэ гупчэхэм ахагъэхъощт, кIэлэеджакIохэм апае джыри мэкъумэщ классыкIэхэр атIупщыщтых, IофшIакIомэ апае унэхэр ашIыщтых ыкIи лъэныкъуабэ къызэ­лъызыубытырэ къэгъэлъэгъонхэр, конфе­ренциехэр, форумхэр, Iофтхьабзэхэр зыщырагъэкIокIыщтхэр агъэпсыщтых. Экспертмэ зэралъытэрэмкIэ, Адыгэ Республикэм лъэхъаныкIэм диштэрэ шIэныгъэ гупчэ иIэ хъущт.
ДЕЛЭКЪО Анет.