БлэкIыгъэ илъэсым ныбжьыкIэ политикэм Адыгеим сомэ миллиони 170-рэ щыпэIуагъэхьагъ, мыгъэ ащ сомэ миллиони 197,2-рэ фатIупщыгъ.

Илъэсищым Апэрэхэм я Движение иIофтхьабзэхэм сомэ миллион 26,7-рэ атырагъэкIодагъ. Республикэ мылъкумкIэ шъолъыр, урысые ыкIи дунэе Iоф­тхьабзэхэу кIэлэцIыкIухэмрэ ныбжьыкIэхэмрэ зыхэлажьэхэрэр зэхащэх. Гъэ къэс организацием хэхъоныгъэ ышIыным фытегъэпсыхьэгъэ шъолъыр субсидиер афатIупщы.
«Непэ Апэрэхэм я Движение акъылыгъэ хэлъэу, яшъыпкъэ рахьылIэзэ хэхъоныгъэ зыщишIырэ шъолъырхэм Адыгеир ащыщ. Партиеу «Единэ Россиер» тиIэпыIэгъоу, лъэпкъ про­ектхэу «НыбжьыкIэхэмрэ кIэлэцIыкIухэмрэ» ыкIи «Кадрэхэр» зыфиIорэмэ тадэлажьэзэ тапэ етэгъэхъу», — къыIуагъ АР-м и ЛIышъхьэ.
Лъэныкъуабэ къызэлъызыубытырэ Гупчэу «Адыгеим иныбжьыкIэхэр» зыфиIорэм Iоф ешIэ. Апэрэхэм я Унэ агъэцэкIэжьы ыкIи еджапIэмэ движением пае непэрэ мафэм диштэрэ Iоф­тхьабзэхэр ащызэрахьэх. НыбжьыкIэ форумхэм ыкIи гъэсэныгъэ программэхэм илъэс псаум адэлэжьэщт дизайн-проектыр агъэхьазыры. Адыгеим истудентмэ я Ассоциацие ауж зыкъыригъанэрэп, Iофыбэ егъэцакIэ. 2025-рэ илъэсым шъолъыр къутамэмэ яIофышIэхэм яIэпэIэсэныгъэ зыщыхагъэхъорэ гупчэм иIофшIэн ыублагъ.
Хэгъэгум икъыблэ лъэныкъо щы­лэжьэрэ гъэсакIомэ егъэджэн Iофтхьабзэхэр мы илъэсым афызэхащэнхэу рахъухьэ. Патриотическэ зэхэхьэ зэфэшъхьафыбэ республикэм щырагъэкIокIы: хэушъхьафыкIыгъэ дзэ операцием хэлажьэхэрэм класс зэIукIэхэр адашIы, «Зарница 2.0» зыфиIорэ проектыр Апэ­рэхэм я Движение игукъэкIхэм ащыщ, акциехэр, мастер-классхэр мыма­кIэу зэхащэх. ШышъхьэIу мазэм, хабзэ зэрэхъугъэу, ныбжьыкIэ слетэу «Фыщт» зыфиIорэр щыIэщт, ащ сэнаущыгъэ зыхэлъ ныбжьыкIэхэу тиреспубликэ ыкIи гъунэгъу шъолъырхэм ащыщхэр хэла­жьэх. Урысые программэу «Тэ — Урысыем тырицIыфых!» зыфиIорэм къыды­хэлъытэгъэ IофшIэныр лъагъэкIуатэ.
«Республикэм ищыIэкIэ-псэукIэ ныбжьыкIэмэ агу етыгъэу хэлэжьэнхэм мэхьанэ етэты. Адыгеим ищыкIагъэх ахэм ягу­къэкIхэр, ясэнаущыгъэ, яшIо­игъоныгъэ. Джащ пае тиIоф­тхьабзэмэ нахь ныбжьыкIабэ къазэрахэдгъэлэжьэщтым, зэхъо­кIыныгъэшIухэу тишъо­лъыр ыкIи хэгъэгум ащыкIохэрэм яIахь къызэрэхядгъэлъхьащтым тыпылъ. НыбжьыкIэхэри ягуапэу тиIофмэ къахэлажьэх. Пчъа­гъэмэ зэкIэ къаIуатэ: рес­публикэм гуфэкIо нэбгырэ мин 56-рэ щэпсэу, ахэм янахьыбэр — ныбжьыкIэх», – къыхигъэщыгъ АР-м и ЛIышъхьэу КъумпIыл Мурат.