Хэгъэгу зэошхом ихъугъэ-шIагъэхэр ыкIи и ЛIыхъужъхэм якъэбархэр зэрытхэгъэ стендхэр Шэуджэн районым игурыт еджапIэхэм мэфэкI шIыкIэм тетэу аратыгъэх. Адыгеим иветеранхэм я Совет ыгъэхьазырыгъэ проектэу «Нить памяти сплетает времена» зыфиIорэм къыкIэкIогъэ грант мылъкумкIэ ахэр агъэхьазырыгъэх.

ЛIыхъужъ-патриотическэ проектым фэгъэхьыгъэ Iофтхьабзэр Шэуджэн районым лъэпкъ культурэмкIэ и Гупчэ щыкIуагъ. Ащ хэлэжьагъэх АР-м и Къэ­ралыгъо Совет — Хасэм и Тхьаматэ игуадзэу, УФ-м и ЛIыхъужъэу Цэй Эдуард, АР-м иветеранхэм я Совет итхьаматэу, отставкэм щыIэ полковникэу Къоджэ Аслъан, лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ Комитетым итхьаматэ игуадзэу Константин Щербаковыр, Шэуджэн район администрацием ипащэу Аулъэ Рэщыдэ, районым идепутатхэм я Совет итхьаматэу Мэрэтыкъо Аслъан, программэу «Адыгеим и ЛIыхъужъхэр» зыфиIорэм хэлэжьэрэ ветеранхэр, кIэлэегъаджэхэр, кIэлэеджа­кIохэр.
Шъолъыр депутатхэм ацIэкIэ къэзэрэугъоигъэхэм закъыфигъэзагъ УФ-м и ЛIыхъужъэу Цэй Эдуард.
— Тызхэт лъэхъаным ти Хэгъэгу итарихъ ыкIи гушъхьэбайныгъэ кIэнэу иIэр къызэтегъэнэгъэнхэм, лъытэныгъэ афэшIыгъэным фэIорышIэрэ Iофтхьабзэхэр нахьыбэу зэхэтщэнхэм мэхьанэ иI. Сыда пIомэ а тхьамыкIэгъо хъугъэ— шIагъэхэм яшыхьатыгъэхэу къытфэнагъэхэм япчъагъэ мэкIэ дэд. Проектым тыхэлажьэзэ, тарихъым ишъыпкъапIэ чIэзыукъуащэхэрэм тызэрапэуцужьырэм имызакъоу, сыд фэдэрэ лъэхъани хэгъэ­гум ишъхьафитныгъэ къэзыухъумагъэхэм, джыдэдэми хэушъхьафыкIыгъэ дзэ операцием а пшъэрылъыр щызыгъэцакIэ­хэрэми шъхьащэ, лъытэныгъэ зэрафэтшIырэр къегъэлъагъо, — хигъэунэфыкIыгъ Цэй Эдуард.
Адыгеим иветеранхэм я Совет итхьаматэ къызэриIуагъэмкIэ, еджапIэхэм патриотическэ IофшIэныр ащызэхэщэгъэным мэхьанэ иI. Ары анахьэу зыфэIорышIэрэр проектэу «Нить памяти сплетает времена» зыфиIорэр.

— Хэгъэгу зэошхом идзэ тарихъ стендхэм атешъулъагъорэр. НепэкIэ дзэ-политическэ пIуныгъэр ябгъэгъотыным ыкIи патриотизмэм фэпщэнхэмкIэ амалышIоу щыIэр дзэ тарихъыр ары. Къэралыгъо пстэуми зэпэуцужьыкIэу къыфыкъокIырэм фэбэнэшъуным патриотизмэр ылъапс, — къыхигъэщыгъ Къоджэ Аслъан.
Шэуджэн районым ипащэу Аулъэ Рэщы­дэ ветеранхэм я Совет къыткIэхъу­хьэрэ лIэужхэм япатриотическэ пIуныгъэ фэIорышIэрэ IофшIэныр зэпымыоу зэрэзэрихьэрэмкIэ «тхьашъуегъэпсэу» ари­Iуагъ. Хэгъэгу зэошхом, Адыгеир шъхьа­фит зэрашIыжьыгъэм ятарихъ ныбжьыкIэ­хэм зэрагъэшIэнымкIэ мы стендхэм яшIуагъэ къызэрэкIощтыр хигъэунэфыкIыгъ.
Джащ фэдэу мы патриотическэ Iоф­тхьабзэм къекIолIагъэх хэушъхьафыкIыгъэ дзэ операцием иветеранхэу сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм хэлажьэхэрэ Алексей Бардюг ыкIи Илья Донцовыр. Ахэр зэпхыгъэхэу анаIэ къа­тезыгъэтхэрэр хэбзэгъэуцу къулыкъум итхьаматэу Владимир Нарожнэр ыкIи ащ игуадзэу, Урысыем и ЛIыхъужъэу Цэй Эдуард. Районым лъэпкъ культурэмкIэ и Гупчэ икъэгъэлъэгъуапIэ щагъэуцу­гъэ стендхэу Советскэ Сюзым и ЛIы­хъужъ­хэм ясурэтхэр зытетхэр къаплъы­хьагъэх.
— ЗишIэныгъэ хэзыгъэхъорэ ветеранхэм тишъолъыр итарихъ зэрагъэшIэн амал мы Iофтхьабзэм къызэраритырэм дакIоу, чIыпIэ зыгъэIорышIэжьыным икъулыкъухэм узэрадэлэжьэщтымкIэ IэпэIэсэныгъэ зэрагъэгъотын алъэкIыщт, тапэкIэ агъэцэкIэщт IэнатIэм пэрытныгъэ щаIыгъыным фигъэсэщтых, — къы­Iуагъ Цэй Эдуард.
Патриотическэ Iофтхьабзэм къыдыхэлъытагъэу пстэумкIи стенд 11 Шэуджэн районым игурыт еджапIэхэм аратыгъ. Мыщ ыпаIокIэ Пщыжъхьэблэ гурыт еджа­пIэм ащ фэдэ зы пкъыгъо фащагъэу щытыгъ.
Нэужым Къоджэ Аслъан лIыхъужъныгъэм иурок ныбжьыкIэхэм афызэхи­щагъ. Хэгъэгу зэошхом илъэхъан Кавказыр шъхьафит зэрашIыжьыгъэр ащ къафиIотагъ.
Iэшъынэ Сусан.