Яблоновскэм паркыр щызэтырагъэпсыхьажьыщт
Партиеу «Единэ Россием» илъэпкъ программэ игъэцэкIэн Адыгеим щылъагъэкIуатэ, псэупIэхэр зэтырагъэпсыхьажьых.
Мы илъэсми а IофшIэныр къагъэуцущтэп. Поселкэу Яблоновскэм 2026-рэ илъэсым телъытагъэу лъэпкъ проектэу «ЩыIэныгъэм пае инфраструктурэр» зыфиIорэм иапэрэ едзыгъо щатIупщыщт, ащ елъытыгъэу общественнэ шъолъырэу «Зэкъошныгъэм ипарк» зыфаIорэр зэтырагъэпсыхьажьыщт. Тарихъ псэупIэхэм ыкIи къэлэ цIыкIухэм Iэрыфэгъу щыIакIэр ащызэхэщэгъэным фэгъэхьыгъэ проектхэр зыхэлэжьэгъэхэ Урысые зэнэкъокъоу гъэрекIо рагъэкIокIыгъагъэм «Зэкъошныгъэм ипарк» епхыгъэ проектыр щатекIогъагъ.
ПсэолъэшIынымкIэ АР-м и Министерствэ къызэрэщытаIуагъэмкIэ, апэрэ едзыгъом къыдыхэлъытагъэу машинэ 94-рэ зытефэщт гъэуцупIэ ашIыщт, къэзыгъэгъунэщтхэм апае унэ агъэуцущт, пыдзафэхэр зэрахьылIэщт чIыпIэр агъэнэфэщт, нэпкъ пытапIэу щыIэр агъэцэкIэжьыщт, тIысыпIэхэр дагъэуцощтых, остыгъэхэр зыпылъэгъэщт пкъэухэр агъэуцущтых, камерэхэр пкъэумэ апашIэщтых, чъыгхэр агъэтIысхьащтых, уц шхъуантIэр рапхъыщт, ащ автомат шIыкIэм тетэу псыр тезыкIэщт Iэмэ-псымэр хагъэуцощт, плиткэкIэ лъэсгъогухэр агъэпкIэщтых. ПэшIорыгъэшъэу а IофшIэнхэм сомэ миллиони 135-рэ апэIухьащтэу къалъытэ.
Шъугу къэдгъэкIыжьын, поселкэу Яблоновскэм ипроект имызакъоу, икIыгъэ илъэсым Урысые зэнэкъокъум шъолъырым игукъэкI заулэ щатекIуагъ: «Мэздахэ» изэтегъэпсыхьан иящэнэрэ едзыгъо; Инэм иобщественнэ шъолъырэу «Зэкъошныгъэм ипчэгу» урамэу Сединым ыцIэ зыхьырэм тет унэу N 42-м ылъэныкъокIэ зэтегъэпсыхьажьыгъэныр.