Зэо зэпэуцужьхэм яветеранэу, ОМОН-м имедицинэ Iофы­шIэщтыгъэу, «Адыгеим и ЛIыхъужъхэр» зыфиIорэ программэм хэлажьэу Сергей Скрыльник Мыекъопэ медицинэ колледжым непэ икIэлэегъадж ыкIи къэралыгъо гъэIорышIэнымкIэ шIэныгъэхэр зэрегъэгъотых. Уихэгъэгу уфэлэжьэныр дзэ къулыкъушIэным къызэрэщымыуцурэр ащ гъогоу къыкIугъэм къегъэлъагъо — ишъуашэ зэблехъу ныIэп.

ЕджакIом къыщегъэжьагъэу дзэ фельдшерым нэсыжьэу
Исэнэхьат гъогу Сергей 1997-рэ илъэ­сым, Мыекъопэ медицинэ училищым зычIэхьэм, ыублагъ. КъызэриIуагъэмкIэ, дзэкъулыкъушIэ хъунэу фэягъ, ау ­ушъхьагъу зэфэшъхьафхэм апкъ къикIэу ар къыдэхъугъэп, училищым Iэзэн Iоф­хэмкIэ икъутамэ щеджэнэу хъугъэ. Ар къызеухым, тIэкIурэ Адыгэ Республикэм ипсихоневрологическэ сымэджэщ щы­лэжьагъ, бжыхьэр къызэсым, къулыкъу ыхьынэу дзэм ащагъ, Ставрополь щыIэ автомобилыдзэм хэфагъ. Мэзищ тешIагъэу, ихэгъэгу фэшъыпкъэнэу тхьэлъанэ зитыгъэ нэуж, Чэчэн Республикэм ащагъ, батальоным ифельдшерэу агъэ­нэфагъ. Къулыкъухьыным ыкIэм апэрэ дзэ тыныр къылэжьыгъ — «За воинскую доблесть» зыфиIорэ бгъэхалъхьэу я II-рэ шъуашэ зиIэр къырагъэтыгъ.
— Мэзаем и 23-м, 2002-рэ илъэсым бгъэхалъхьэр къысатыгъ. А мэфэ дэдэм сержант сыхъугъ ыкIи Апшъэрэ дзэпащэм ыцIэкIэ Рэзэныгъэ тхылъ къысфагъэ­шъошагъ, — еIо Скрыльник.
ИпIалъэ ыухи дзэм къызекIыжьым, IэпыIэгъу псынкIэм икъулыкъу илъэси­тIурэ щылэжьагъ. IофшIэныр ыгу ри­хьыщтыгъ, ау исэнэхьат гъогу хэгъэгу кIоцI IофхэмкIэ Министерствэм зэригъэ­зэкIыгъ — ОМОН-м къулыкъу щихьынэу рагъэблэгъагъ.
Темыр Кавказыр, Олимпиадэр, Къырым, дунаим и Чемпионат, ковидым пэшIуекIогъэныр
Апэм Урысыем хэгъэгу кIоцI IофхэмкIэ и Министерствэ ОМОН-мкIэ икъута­мэу Адыгеим щыIэм Сергей Скрыльник хэтыгъ. Ащ дэжьым IофшIэгъу дэкIыгъо бэдэдэ Темыр Кавказым щыриIэщтыгъ: Налщык, Чэчэныр, Дагъыстаныр. Нэужым епхыгъэ Iофхэм КIымэфэ олимпиадэу 2014-рэ илъэсым Шъачэ щыкIуагъэм щынэгъончъэным афэгъэзэгъагъ, Къырым гъатхэм къыщыхъугъэ хъугъэ-шIагъэхэр ащ къыкIэлъыкIуагъэх, 2018-рэ илъэсым футболымкIэ Дунэе чемпионатым щыIагъ. 2016-рэ илъэсым зыхэтыгъэ подразделениер Росгвардием хагъэ­хьагъ ыкIи АР-м и Росгвардие и ГъэIорышIапIэ и ОМОН хэтэу къулыкъур лъигъэкIотагъ. 2020-рэ илъэсым ковидым пэшIуе­кIогъэнымкIэ пшъэдэкIыжьышхо ыхьыгъ.
— Зэо-зэпэуцужьхэм ахэлэжьэрэ къулы­къудзэм хэтхэм япсауныгъэ сы­фэгъэзэгъагъ. Ахэм азыныкъо мэсымаджэмэ, тиIофшIэн тыфэхьазырэп. Ащ пае зыми «пшъхьэ Iэ къыщифэщтэп». Ковидым илъэхъан къулыкъудзэм ипшъэ­рылъхэр ыгъэцэкIэнхэм ренэу зэрэфэ­хьазырыгъэм фэшI капи­таныцIэр къысфагъэшъошагъ. Къысте­фэщтыгъэ IэнатIэм ар зы лъэоянэкIэ нахь лъэгагъ, — еIо дзэкIолIым.
2022 — 2023-рэ илъэсхэм Сергей джыри зэуапIэм Iуфагъ — мызыгъэгум хэушъхьафыкIыгъэ дзэ операциер зыщыкIорэм.
— 2022-рэ илъэсым апэрэ мафэм къыщегъэжьагъэу ащ тыщыIагъ, етIанэ тызэблахъугъ, тызэIэзэжьыгъ, ащ ыуж, 2023-рэ илъэсым, дгъэзэжьыгъ, — а лъэхъаным фэгъэхьыгъэу кIэкIэу ащ къеIо.
Зичэзыу IофшIэгъу дзэ дэщыгъом къызекIыжьым, Сергей зыгъэпсэфыгъом кIуагъэ.
Проектнэ IофшIэныр
ХэушъхьафыкIыгъэ дзэ операцием хэлэжьагъэхэм апае проектхэр Сергей ищыIэныгъэкIэ лъэоенакIэ хъугъэ. Апэрэу зызщиушэтыгъэр «ЛIыхъужъхэм яуахът» зыфиIорэ къэралыгъо программэр ары. ПэIудзыгъэ егъэджэнхэм ахэфэгъагъ.
— Егъэджэн бэдэдэ тиIагъ, анахьэу ахэр зыфэгъэхьыгъагъэхэр лъэныкъуитIу зэдэгущыIэныр ары. ЗишIуагъэ къэкIорэ екIолIакIэхэр, хэбзэ къулыкъушIэнымкIэ шIыкIэхэр щызэдгъэшIагъэх, — ыгу къэкIыжьы ветераным.
2025-рэ илъэсым шъолъыр проектэу «Адыгеим и ЛIыхъужъхэр» зыфиIорэм иIофшIэн ыублагъ.
— ЧIыпIэ проектым зыщысыушэтынэу исхъухьагъ. Тхьапэхэр зысэгъэхьыхэм, сыпхырыкIыгъ. Шъыпкъэр пIощтмэ, си­къулыкъушIэгъухэм якъэгъэлъэгъонхэр сэщ нахьи нахь дэгъухэу слъытэщтыгъ. Апэрэу нэбгырэ 18-м зэкIэри тызау­гъоим, ахэм азыныкъо нахьыбэм са­дэлэжьагъэу е сицIыкIугъом къыщегъэ­жьагъэу сшIэщтыгъэхэу къычIэкIыгъ, — къыхегъэщы Сергей Скрыльник.
Непэ Сергей АР-м псауныгъэр къэу­хъумэгъэнымкIэ и Министерствэ егъэ­джэнхэр щекIух. ИIэшъхьэтетхэр — псау­ныгъэр къэухъумэгъэнымкIэ министрэу Мэрэтыкъо Рустемрэ ащ иапэрэ гуадзэу Максим Коробкорэ.
— Ахэр пэщэ губзыгъэх. ЗэдэгущыIэгъухэр зэрэрагъэкIокIыхэрэм, яIофшIэгъухэм зэрадэгущыIэхэрэм салъэплъэ. А пстэур зэхэсэфы, сэтхы. Лъэшэу сигуап ахэм сафэгъэзагъэ зэрэхъугъэр, — еIо Сергей Скрыльник.
Илъэс 25-рэ хъугъэу псауныгъэр къэу­хъумэгъэным ылъэныкъокIэ ыкIи хэ­бзэухъумакIохэм ахэтэу мэлажьэми, «Адыгеим и ЛIыхъужъхэр» зыфиIорэ программэм Сергей шIэныгъакIэхэр къыфихьыгъэх. Джырэ нэс Iофэу ышIэщтыгъэр зэрэзэхэпщэщтым, зэрэбгъэ­псыщтым идунай къыфызэIуихыгъ.
— Псауныгъэр къэухъумэгъэнымкIэ къулыкъум Iоф зэришIэрэр дэгъоу къыз­гурыIоу къысшIошIыщтыгъ. Ау сэ сишIэныгъэхэр врачым иIофшIэн фэгъэхьыгъэ къодыехэу къычIэкIыгъ. Ащ игъэIорышIэн, изэхэщэн — зэкIэ фэшъхьаф шъыпкъ, нэмыкI дунаим фэд. Ар медицинэ за­къоп — экономикэри, щэфэнри, политикэри къыхеубытэх. ЗэкIэри икIэрыкIэу зэзгъэшIэжьын фае мэхъу. ЗэкIэлъыкIокIэ гъэнэфагъэ иIэу сиIэшъхьэтетхэр сиегъэджэн къекIуалIэ, — еIо ащ.
Сергей къызэриIуагъэмкIэ, дзэ къулы­къум зыхэтыгъэ илъэсхэм лэжьэкIэ шап­хъэу иIэ хъугъэхэр цIыф къызэрыкIом ищыIэныгъэ екIухэрэп. Ары нахь мышIэми, ащ ишIуагъэкIэ бэщэчэу щыт. Вете­раныр «Адыгеим и ЛIыхъужъхэр» зыфиIорэ программэм зэрэхэлажьэрэм дакIоу Мыекъопэ медицинэ колледжми щырегъаджэх. Еджэнымрэ кIэлэегъэджэнымрэ зэдэпхьыныр, ежь къызэриIорэмкIэ, IэшIэхэп.
— ПрограммэмкIэ анахь къиныр Iоф­шIэным еджэныр зэрэдэпхьырэр ары. Мафэм сыкIэлэегъадж, пчыхьэм унэм сыкъызыкIожьыкIэ, сэ седжэ. ПэIудзыгъэ зэдэгущыIэгъухэр сиIофшIэн уахътэ тефэ хъумэ, зэкIасхьэхэуи къы­хэкIы, — къыддэгуащэ ар.
Ары нахь мышIэми, мыщ дэжьми ар зэрыгъуазэрэр илъэс пчъагъэхэм зыдиIыгъ екIолIакIэр ары — «ПфэмыгъэцэкIэн пшъэрылъ щыIэп».
ШъхьаIэр бгъэнэфэныр
Сергей бэрэ къызфигъэзэжьырэ гу­пшысэхэм ащыщ уахътэм фэгъэхьыгъэр.
— Уахътэм нахь лъапIэ цIыфым зэри­мыIэр къызгурыIуагъ. Джыри илъэсыбэ апэ илъэу цIыфхэм къащэхъу. Илъэс 20 — 30-р икъущтэу алъытэ, ау укъызызэплъэкIыжькIэ, а щэкIыри щыIэжьэп, — еIо ащ.
Ныбжьым зэрэхахъорэм дакIоу, шъхьэ­ихыгъэу къэгущыIэ Сергей, а зэхашIэр нахь мэлъэшы. Ащ къызэриIорэмкIэ, игъо уифэным, уеджэным, уичIыпIэ щыIэныгъэм щыбгъотыным амалыр зэкIэ епхьылIэн фае.
«Адыгеим и ЛIыхъужъхэр» зыфиIорэ программэм иIофшIэн мы илъэсым ишышъхьэIу мазэ ыкIэм фэкIо. А сэнэхьатымкIэ инеущырэ мафэ епхыгъэ гупшысэхэмкIэ Сергей иIэшъхьэтетхэм адэгуащэ, ау ымакъэ Iоу рыгущыIэгорэп. Ары нахь мышIэми, иIофшIэн зыдигъэзэщт лъэныкъор зыфигъэунэфыгъ — псауныгъэм икъэухъумэн. ЦIыфхэм ящыIэныгъэ нахь кIыхьэ шIыгъэныр ащ ипшъэрылъ шъхьаIэу елъытэ.
— Псауныгъэр къэухъумэгъэным ылъэ­ныкъокIэ сэлажьэ. Ар сыгу рехьы. Зы чIыпIэм уикIэу адырэм укIомэ, тIэкIу-тIэкIоу зэкIэми ахэошIыкIы, ау сэнаущыгъэшхо пхэлъыщтэп. ТичIыгу бэгъа­шIэхэмкIэ цIэрыIу. ЩыIэныгъэм икIыхьагъэ имызакъоу, ащ идэгъугъи игугъу пшIын фае. ЦIыфхэр бэгъэшIэнхэм, зыфэгумэкIыжьынхэм тыдэлажьэ. Тапэ Iофыбэ илъ, — еIо Сергей Скрыльник.
Гъогоу къыкIугъэм къытегущыIэ зы­хъукIэ, Сергей шъхьэихыгъэ къешIы: зэхэт IофшIэным зыфегъэсэ къодый.
— ОМОН-м сыхэт зэхъум, зизэкъо IофышIэу сыщытыгъ пIоми хъущт. Си­IофшIэнкIэ сшIэн фаемкIэ зыми сеуп­чIыжьыщтыгъэп. Ау дзэ унашъохэр зы­хэмыт щыIэныгъэ къызэрыкIом купэу ущызэдэлэжьэн фае. Ари егъэджэным изы Iахь, — еIо ащ.
Къиныгъохэр, охътэ имыкъур, зыгъэ­псэфыгъо уахътэр зэрэфэмакIэр ищыIэныгъэ изы уахътэ горэу Сергей елъытэ. ДзэкъулыкъушIэм инэкIубгъо ащ зэфи­шIыжьыгъ, ау рихьыжьэгъэ Iофыр ыкIэм нигъэсэу зэресагъэр къыхэнагъ. Джы а Iофхэр зыфэгъэхьыгъэхэр еджакIохэр, медицинэр ыкIи псауныгъэр къэухъумэгъэнымкIэ Адыгеим иIофхэр ары.
Шэртэнэ Мурат.