Журналистхэу ыкIи тхылъ къыдэгъэкIыным пылъхэу икIыгъэ илъэсым зиIофшIэн анахь дэгъоу зыгъэ­цэкIагъэхэм АР-м лъэпкъ IофхэмкIэ, IэкIыб къэ­ралхэм ащыпсэурэ тилъэпкъэ­къэ­гъухэм адыряIэ зэпхы­ныгъэхэмкIэ ыкIи къэбар жъугъэм иамалхэмкIэ и Комитет ищытхъу тхылъхэр аратыжьыгъэх.

Комитетым итхьаматэу Долэ Долэтбый пэублэм къэбар жъугъэм иамалхэм ялIыкIохэм ясэнэхьаткIэ заушэтыжьын амал яIэныр мэхьанэшхо зиIэ лъэны­къохэм зэращыщыр къыхигъэщыгъ. Ар къадэхъуным Адыгеим и ЛIышъхьэу КъумпIыл Мурат ынаIэ тырегъэты, гу­мэкIыгъоу яIэхэм защегъэгъуазэ.
— Шъолъырым ихъугъэ-шIагъэхэр, къэбар шъхьаIэхэр шъоры цIыфхэм алъы­зыгъэIэсырэр. Хабзэмрэ общест­вэмрэ зэпхыныгъэ яIэным, шъхьэихыгъэу зэдэгущыIэнхэм шъуафэгъэзагъ. Гъэхъагъэхэм адакIоу, гумэкIыгъохэри журналистхэм ятхыгъэхэмкIэ, якъэтынхэмкIэ къагъэнэфэнхэр, ахэм ядэгъэзыжьын хэбзэ къулыкъухэм анаIэ тыра­дзэныр мыщ дэжьым анахь шъхьаIэу щыт. Мыхэм афэгъэхьыгъэхэр къэ­барлъыгъэIэс амалхэм къызэрэхаутырэ шIыкIэм елъытыгъ республикэм об­щественнэ ыкIи социальнэ зыпкъитыныгъэу илъыр зыфэдэщтыр, — къыIуагъ Долэ Долэтбый.
Анахь шъхьаIэу ащ ынаIэ зытыридза­гъэр хэушъхьафыкIыгъэ дзэ операцием хэлажьэхэрэр, лIыхъужъхэр, ахэм фэгъэкIотыныгъэу яIэхэр зэрифэшъуашэу къэгъэлъэгъогъэнхэр ыкIи цIыф зэрымыс быбырэ пкъыгъохэм яоператорхэр зэрящыкIагъэхэр къэтхыгъэнхэр ары. Ащ нэмыкIэу социальнэ хъытыухэм къарыхьэрэ къэбар нэпцIхэм тицIыфхэр ащыухъумэгъэнхэр пшъэрылъ шъхьаIэу зэрэщытыр къыхигъэщыгъ. Илъэсыбэ хъугъэу Iоф зышIэрэ журналистхэм, гъэзетым икъыдэгъэкIын хэлажьэхэрэм комитетым ищытхъу тхылъхэр Долэ Долэтбый аритыжьыгъэх.
Ахэм ащыщ «Адыгэ макъэм» ижурналистэу Iэшъынэ Сусанэ. Илъэсыбэ хъугъэу Сусанэ хэушъхьафыкIыгъэ дзэ операцием, социальнэ мэхьанэ зиIэ лъэныкъохэм, медицинэм афэгъэзагъэу матхэ. Къыратыгъэ щытхъу тхылъыр къылэжьыгъэ шъыпкъэу щыт.
Джащ фэдэу къыхагъэщыгъэх гъэзетэу «Советскэ Адыгеим» иобозревателэу Анна Андреевар, Адыгэ республикэ тхылъ тедзапIэм иIофышIэу ХъутIыжъ Щаимэт, гъэзетэу «Теучежские вести» иредактор шъхьаIэу Хьакъуй Юрэ ыкIи Кощхьаблэ дэт зыкI къэбарлъыгъэIэс гупчэм иобозревателэу Сэнащэкъо Заремэ, нэмыкIхэри.
КIарэ Фатим.