Хабзэ зэрэхъугъэу, НэкI­мэзэ мазэм къыриубытэу АР-м ыкIи Пшызэ шъолъыр ащыпсэурэ быслъымэнхэм я ДиндэлэжьапIэ гъот ма­кIэ зиIэ унагъохэм апае шIушIэ Iофтхьабзэхэр ре­гъэкIокIых.

Мыщ фэдэ унагъохэм гъомылапхъэхэр афащэнхэмкIэ шIоигъоныгъэ зиIэхэр ахэм къахэлажьэх. Ащ пае счет къызэIуахыгъэу псапэ зышIэнэу фаехэм ахъщэ рагъахьэ. НэкIмэзэ мазэм къыкIоцI шIушIэ Iофтхьабзэр рекIокIыщт.
Ащ нэмыкIэу шIушIэ Iофтхьабзэм хахьэу «Титаным» итучанитIоу Мые­къуапэ дэтхэм, зыр Черемушкэм щыI, адрэр урамэу Жуковскэм тет, «Куриная лавка» зыфиIорэм итучаниплIым гъучI матэхэр ачIэтхэу псапэ зышIэнэу фаехэм гъомылапхъэхэр аралъхьэх. Нэужым ахэр зищыкIагъэхэм афащэх.
Адыгеим щыпсэухэу гъот зиIэхэм шIушIэным, псэпэшIэным алъэныкъокIэ Iофыгъоу зэрахьэхэрэм уарыгушхонэу щыт. Тхьэм хэти псапэу ышIагъэр IукIэжьынэу фэтэIо.
КIАРЭ Фатим.