Адыгеим и ЛIышъхьэу КъумпIыл Мурат АР-м и Правительствэ зычIэт унэм зэIукIэгъу щыдыриIагъ хэушъхьа­фыкIыгъэ дзэ операцием иветеранэу, хэушъхьафыкIыгъэ дзэ операцием хэпажьэхэрэм афытегъэпсыхьэгъэ федеральнэ программэм хэлэжьэрэ подполковникэу Сергей Ковалевым.

Урысыем и Президентэу Владимир Путиныр ары кIэщакIо фэхъугъэр программэу «ЛIыхъужъхэм яуахът» зыфи­Iорэм ыкIи къэралыгъо гъэIорышIэнымкIэ Урысыем народнэ хъызмэтымкIэ и Академиерэ Къэралыгъо къулыкъумрэ я Апшъэрэ еджапIэ ар пхырещы. Проектыр зыфэгъэхьыгъэр хэушъхьафыкIыгъэ дзэ операцием хэлажьэхэрэмрэ ащ иветеранхэмрэ къэралыгъо ыкIи муници­пальнэ гъэIорышIэным икъулайныгъэхэм афегъэджэгъэнхэр, а лъэныкъомкIэ Iоф зышIэщтхэр гъэхьазырыгъэнхэр ары.
Шъугу къэтэгъэкIыжьы: Сергей Ковалевыр федеральнэ проектым хэлажьэхэ­рэм ащыщ. 2025-рэ илъэсым бэдзэ­огъум къыщегъэжьагъэу Адыгэ Республикэм стажировкэр щекIу, республикэм и ЛIы­шъхьэу КъумпIыл Мурат ары ащ игъэсакIор. 2016-рэ илъэсым къыщыубла­гъэу 2021-рэ илъэсым нэс Сергей Ковалевым дзэ къулыкъур Адыгеим щи­хьыгъ, ащ нэужым хэушъхьафыкIыгъэ дзэ операцием хэлэжьагъ. ЛIыхъужъныгъэм иордениплI, «Хэгъэгум ыпашъхьэ гъэхъагъэу щыриIэхэм апае» зыфиIорэ орденым имедалэу я II-рэ шъуашэ зиIэр, «ЛIыхъужъныгъэу зэрихьагъэм пае» зыфиIорэ медалыр, Жуковым ыцIэкIэ щыт медалыр, я II-рэ шъуашэ зиIэ медалэу «Блэнагъэу зэрихьагъэм пае» зыфиIорэр ыкIи нэмыкI ведомствэ тынхэр къыфагъэшъошагъэх.
Стажировкэм илъэхъан Сергей Ковалевым гъэцэкIэкIо хабзэм ишъолъыр къулыкъухэм гъэпсыкIэу яIэм, чIыпIэ зыгъэIорышIэжьыным икъулыкъухэм яIофшIэн зэрэгъэпсыгъэм нэIуасэ зафи­шIыгъ, къэралыгъо граждан къулыкъум ылъапсэхэм защигъэгъозагъ. Адыгэ Республикэм и Къэралыгъо Совет — Хасэм и Парламент ыкIи иаппарат, АР-м и ЛIышъхьэрэ иминистрэхэм я Каби­нетрэ я Администрацие, къэралыгъо
фондэу «Хэгъэгум иухъумакIохэр» зыфиIорэм иреспубликэ къутамэ яIофшIэн зэрэзэхэщагъэм апэрэ чэзыуитIум игъэкIотыгъэу защигъэгъозагъ.
Ащ нэмыкIэу Сергей Ковалевыр Адыгэ Республикэм иминистрэхэм я Кабинет изэхэсыгъохэм, Адыгеим и ЛIышъхьэ, АР-м и Къэралыгъо Совет — Хасэм и Тхьаматэ зыхэлэжьэгъэхэ Iофтхьабзэхэм ащыIагъ, республикэм имуниципалитети 9-мэ ячIыпIэ пащэхэм ягъусэу Iоф ышIагъ. Анахьэу ащ ынаIэ зытыригъэтыгъэр кIэлэцIыкIухэмрэ ныбжьыкIэхэмрэ яхэгъэгу шIу алъэгъоу пIу­гъэнхэр ары. Программэу «ЛIыхъужъ­хэм яуахът» зыфиIорэм хэлажьэрэм кIэлэеджакIохэмрэ студентхэмрэ — патриотическэ ыкIи общественнэ зэха­хьэхэм анахь чанэу ахэлэжьэрэ кIэлэ­еджакIохэм ыкIи студентхэм — зэIу­кIэгъу заулэ адыриIагъ.
Программэм иапэрэ чэзыухэр гъэцэ­кIагъэ зэрэхъугъэм икIэуххэм къатегущыIэзэ, Адыгеим и ЛIышъхьэ къызэрэхигъэщыгъэмкIэ, Сергей Ковалевым стажировкэм илъэхъан пшъэрылъэу фагъэуцухэрэр дэгъоу зэшIуихыщтыгъэх, IофшIэным илъэныкъо пэпчъ зэригъэгумэкIырэр къыхэщэу IэпэIэсэныгъэ хэлъэу екIуалIэщтыгъ. Къэралыгъо ыкIи муниципальнэ хабзэм якъулыкъу пстэуми шIуагъэ къэзытырэ зэдэлэжьыныгъэ адыриIагъ, къулыкъухэм яIэшъхьэтетхэми ар хагъэунэфыкIыгъ. Джы мы лъэхъа­ным программэу «ЛIыхъужъхэм яуахът» зыфиIорэм иящэнэрэ чэзыу игъэ­цэкIэн ар фежьагъ.
«Программэу «ЛIыхъужъхэм яуахът» зыфиIорэр проект къодыеп, ушэтынхэр зэпызычыгъэ, чIыпIэ зэжъухэм хэкIыпIэ къафэзыгъотын зылъэкIырэ ыкIи нэ­мыкIхэм афэгъэхьыгъэ пшъэдэкIыжьыр зыплIэIу изылъхьажьын зылъэкIырэ цIыфхэр зэуапIэм имызакъоу, хэгъэгуми ищыкIагъэх. Ащ фэдэ цыхьэшIэгъу цIыф­хэр ары Адыгеими, зэрэхэгъэгоуи мы илъэсипшI благъэхэм гъэIорышIэн Iофым фэгъэзэгъэщтхэр зыфэдэщтхэр», — ­къыхигъэщыгъ КъумпIыл Мурат.
Шъугу къэтэгъэкIыжьы: Урысые Феде­рацием и Президентэу Владимир Путиным пшъэрылъ зэрафишIыгъэм тетэу хэгъэгум ишъолъыр пэпчъ программэу «ЛIыхъужъхэм яуахътэ» ежь къыхихы-
гъэ цIэ фиусыгъ. Адыгэ РеспубликэмкIэ ащ зэрэщеджагъэхэр «Адыгеим и ЛIы­хъужъхэр», 2025-рэ илъэсым мэзаем ащ игъэцэкIэн аублагъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.