Адыгэ Республикэм и ЛIышъхьэу КъумпIыл Мурат IофшIэгъу дэкIыгъо АдыгеякIэм щыриIагъ, пыим ыгъэфы­къогъэ унэхэр зыпкъ зэрэрагъэуцожьхэрэм зыщигъэгъозагъ. Оперативнэ штабым иIофшIэн псэупIэ комплексым нахь зыщыригъэушъомбгъугъ. Зичэзыу дэкIыгъо зэхэсыгъори ащ щыкIуагъ. Тэхъутэмыкъое районым ипащэу Шъэо Аскэррэ псэолъэшI организацие заулэмэ яIэшъхьэтетхэмрэ ащ хэлэжьагъэх.

Шъугу къэтэгъэкIыжьы фэтэрыбэу зэ­хэт унэ 30-мэ, унэе унэ заулэмэ зэ­рар зэрарахыгъагъэр. Анахьэу чIэнэгъэ­шхо зышIыгъэр унэу N 15-р ары. Рес­пуб­ликэм ипсэолъэшIхэм акIуачIэкIэ унэхэр зэкIэ зыпкъ рагъэуцожьых. Къум­пIыл Мурат пшъэрылъ зэрафишIыгъэм тетэу псэолъэшI компание заулэмэ акIо­чIэ шъхьаIэхэр АдыгеякIэм рагъэо­лIагъэх.

Республикэм ипащэ чIыпIэр къызэпи­плъыхьагъ, фэтэрхэм арыхьагъ, гъэцэ­кIэ­жьын IофшIэнхэр зэрэкIорэм, Iофэу зэшIуахыгъэхэм, подряднэ организа­циехэм пIалъэхэр къызэрэдалъытэрэм уасэ къафишIыгъ. КъапэIулъ чIыпIэхэр щынэгъончъэнхэм ыкIи ахэм язэтегъэ­псыхьажьын япхыгъэ Iофыгъохэм ынаIэ атыригъэтыгъ.

Тэхъутэмыкъое районым ипащэу Шъэо Аскэр къызэриIуагъэмкIэ, планым диштэу гъэцэкIэжьынхэр, зыпкъ игъэуцо­жьын IофшIэнхэр макIох. Зэпыу имыIэу техникэр агъэлажьэ. Подряднэ, гъэIоры­шIэкIо организациехэр чIыпIэм игъэ­къэ­бзэн ыуж итых, хэкI кубометрэ 1718-рэ Iуащыгъах. Штабым иIофшIэн нахь зырегъэушъомбгъу: район администрациемрэ Следственнэ комитетымрэ яIофы­шIэхэр зыгъэгумэкIырэ IофыгъохэмкIэ цIыфхэм упчIэжьэгъу афэхъух. Экс­перт­хэр ягъусэхэу автомобильхэм язытет уплъэкIугъэнымкIэ Iофышхо ашIагъ. Ав­томобиль 213-рэ фыкъуагъэу, 27-р бгъэцэкIэжьынэу щымытэу агъэунэфыгъ. Мы охътэ благъэм ахэр зиехэм ялъэIу тхылъхэр штабым щаIахыхэу рагъэ­жьэщт. Мылъку IэпыIэгъу ахэм зэраратыщт шIыкIэм икъоу дегупшысэнхэу АР-м и ЛIышъхьэ пшъэрылъ афишIыгъ. Ахэм апэIухьащт ахъщэр республикэ бюджетым къыхагъэкIыщт.
Джащ фэдэу оперативнэ штабым изэ­хэсыгъо зэрэщыхагъэунэфыкIыгъэмкIэ, зэщыкъогъэ фэтэрхэм ягъэцэкIэ­жьынкIэ лъэIу тхылъхэм яштэн мы тхьа­мафэм аухыщт. ТхьамыкIагъор къызыхъугъэм къыщегъэжьагъэу мыщ фэдэ Iофыр зэпагъэугъэп. Щылэ мазэм тхылъхэм азыныкъо нахьыбэмэ Iоф адашIэгъагъ. Фэтэр 1136-рэ гъэцэкIэжьыгъэн фаеу агъэунэфыгъагъ. НепэкIэ унэхэм азыны­къо нахьыбэмэ апчхэр ахалъхьажьы­гъэх, фэтэр 728-рэ агъэцэкIэжьыгъах.

Анахьэу зэщыкъогъэгъэ унэу N 15-м зэрэкIорэм изэтегъэпсыхьажьын лъэшэу гъунэ лъафы. Мы унэм ыгупэ ­зыпкъ ра­гъэуцожьыгъах, шъхьаныгъупчъэхэмрэ балконхэмрэ апчхэр ахалъхьажьэу рагъэжьагъ. Къихьащт тхьаумафэм мыщ фэдэ IофшIэнхэр аухын мурад яI. Унэ кIоцIхэм ягъэдэхэн лъагъэкIуатэ. Зифэтэрхэр зыпкъ рамыгъэуцожьыгъэхэм апае пIалъэ горэкIэ зыдэщыIэнхэ алъэ­кIыщт чIыпIэ къызэIуахыгъ. Апэрэ ма­фэхэм ащ фэдэ чIыпIэм нэбгырэ 56-мэ шъхьэегъэзыпIэ щагъотыгъагъ, джыдэдэм нэбгыри 6 ащ къычIэнэжьыгъэр — кIэлэ­цIыкIуитIурэ зыныбжь хэкIотэгъэ нэбгыритIурэ ахэт. ЯщыкIэгъэ пстэури ахэм зэрагъотылIэжьы. УIагъэхэр зытещэгъэ­гъэ цIыфхэм япсауныгъэ изытет укъытегущыIэн хъумэ, къэIогъэн фае нэбгыри 9-ри сымэджэщхэм зэрачIатхыкIы­жьыгъэхэр.
АР-м и ЛIышъхьэ пыим зэщигъэкъогъэ унэхэм ащыпсэухэрэм адэгущыIагъ, ахэм ягумэкIыгъохэм защигъэгъозагъ, Iофыгъоу къэтэджыхэрэр псынкIэу зэшIуахынэу къулыкъу гъэнэфагъэхэм пшъэрылъ афишIыгъ. АдыгеякIэм дэсхэм унэхэр зыпкъ игъэуцожьыгъэнхэмкIэ IэпыIэгъу къызэрафэхъугъэм фэшI Къум­пIыл Мурат зэрэфэразэхэр раIуагъ. Джащ фэдэу гъэцэкIэжьын IофшIэнхэр ыпкIэ хэмылъэу афызэхэзыщэрэ псэо­лъэшIхэми «тхьашъуегъэпсэу» араIуагъ. Муниципалитет пстэуми яволонтерхэм, «Единэ Россием», Народнэ фронтым ялIыкIохэм, депутатхэм, ныбжьыкIэ организациехэм адэтхэм IэпыIэгъушхо ахэм араты.

«Тэ пшъэрылъэу тиIэр унэхэр псынкIэу зыпкъ идгъэуцожьынхэр, щынэгъон­чъэу псэунхэмкIэ цIыфхэм амал ядгъэ­гъотыныр ары. АщкIэ ищыкIагъэхэр зэкIэ тиI», — къыIуагъ КъумпIыл Мурат.
ГъэцэкIэжьын IофшIэнхэр джыри АдыгеякIэм щылъагъэкIуатэх. ГъэцэкIэ­жьынхэр аухыфэ, зэсэгъэхэ щыIакIэм цIыфхэм къыфагъэзэжьыфэ Адыгеим и ЛIышъхьэ Iофхэм язытет гъунэ лъи­фыщт.
АР-м и ЛIышъхьэ ипресс-къулыкъу къытырэ къэбархэмкIэ ЛIышэ Саныет.