Бжыхьэ дзэ дэщыгъор зэрэрекIокIыгъэм ыкIи къэблэ­гъэ­рэ гъэтхэ дзэ дэщыгъом изэхэщэн Адыгеим зэрэщы­лъыкIуатэрэм, федеральнэ гупчэм къыгъэуцурэ пшъэ­рылъхэр гъэцэкIэгъэнхэмкIэ шIэгъэн фаехэм зыщатегу­щыIэгъэхэ зэхэсыгъо АР-м и Правительствэ зычIэт унэм щыкIуагъ.

Iофтхьабзэм хэлэжьагъэх АР-м и ЛIы­шъхьэрэ министрэхэм я Кабинетрэ я Администрацие ипащэу Владимир Свеженец, министрэхэр, муниципальнэ образованиехэм япащэхэр, хэгъэгу кIоцI IофхэмкIэ, ошIэ-дэмышIэ IофхэмкIэ министерствэхэм, прокуратурэм, ДОСААФ-м ялIыкIохэр, республикэ ыкIи район дзэ комиссариатхэм якъулы­къушIэхэр.
Владимир Свеженец зэхэсыгъор къы­зэIуихызэ бжыхьэ дзэ дэщыгъо кампаниер зэрифэшъуашэу зэрэрекIокIыгъэр, къэралыгъом ищынэгъончъагъэ гъэпытэгъэнымкIэ ащ мэхьанэшхо зэриIэр хигъэунэфыкIыгъ. Ащ фэгъэзэгъэ къулыкъу пстэуми акIуачIэ зэрэзэхэлъыгъэм ар икIэухэу хъугъэ.
— УФ-м и УIэшыгъэ КIуачIэхэм къулы­къур ащызыхьыщт ныбжьыкIэ 400 фэдиз бжыхьэм Адыгеим икIыгъ. Дзэ комиссариатхэм, гъэцэкIэкIо хабзэм ифедеральнэ ыкIи ичIыпIэ къулыкъухэм акIуачIэ зэхэлъэу дэгъоу Iоф зэрашIагъэм ишIуагъэкIэ бжыхьэ дэщыгъор зэрифэшъуашэу рекIокIыгъ, пшъэрылъэу республикэмкIэ къытфагъэуцугъэр игъом дгъэцэкIагъэ. А Iофтхьабзэм епхыгъэ IофшIэныр дэгъоу зэхащагъ Мыекъуапэ, Адыгэкъалэ, Тэхъутэмыкъое, Теуцожь ыкIи Красногвардейскэ районхэм ядзэ комиссариатхэм. Джыри мы къэблэгъэрэ гъэтхэ дзэ дэщыгъом къытфагъэуцугъэ пшъэрылъыр зэрэдгъэцэкIэщтым ыуж титын фае, — къыхигъэщыгъ Владимир Свеженец.
2025-рэ илъэсым ибжыхьэ дзэ дэ­щыгъо зэрэкIуагъэм фэгъэхьыгъэу АР-м идзэ комиссариат ипащэу Александр Авериныр къэгущыIагъ. Ащ къызэриIуа­гъэмкIэ, бжыхьэ дзэ дэщыгъом аныбжьыкIэ къулыкъу ахьынэу зытефэрэ нэбгырэ 3000 фэдиз чIыпIэ комиссариат­хэм къякIолIагъ. АщкIэ Адыгеим пшъэ­рылъыр ыгъэцэкIагъ. Медицинэ уплъэ­кIунхэр зыкIугъэхэм ащыщэу зипсауныгъэ изытеткIэ процент 27,2-м къулы­къур амыхьышъущтэу алъытагъ. БлэкIыгъэ илъэ­сым егъэпшагъэмэ, мы пчъагъэр проценти 6,7-кIэ нахьыб. Процент 50,1-м зэреджэхэрэм елъытыгъэу пIа­лъэр афызэкIахьагъ.
Джащ фэдэу Александр Авериным къызэриIуагъэмкIэ, дзэ-учетнэ сэнэхьатхэмкIэ Урысыем и ДОСААФ игъэсэныгъэ организациехэм нэбгырэ 65-рэ къа­гъэ­хьазырыгъ. АщкIэ Къыблэ дзэ округым къафигъэуцугъэ пшъэрылъыр проценти 100-м нэсэу гъэцэкIагъэ хъугъэ.
— Дзэ дэщыгъор комиссариатым иIофшIэн анахь шъхьаIэхэм ащыщ. Арышъ, цIыфхэмрэ военкоматымрэ азы­фагу зэгурымыIоныгъэ къимытаджэу, хэбзэукъоныгъэхэр хэмыхъухьэхэу а Iоф­тхьабзэр зэхэщэгъэным мэхьанэ иI. Районхэм ащыIэ комиссиехэм бжыхьэ дзэ дэщыгъом дэгъоу Iоф ашIагъ, — хи­гъэунэфыкIыгъ дзэ комиссар шъхьаIэм.
Полковникыр гъэтхэ дзэ дэщыгъом къытегущыIэзэ, гъэтхэ дзэ дэщыгъор гъэтхапэм и 1-м зэраублэщтыр ыкIи ар бэдзэогъум и 15-м нэс зэрэкIощтыр къыхигъэщыгъ. НыбжьыкIэхэм дзэ къулы­къур зэрахьыщт пIалъэр зэхъокIыгъэп — мэзэ 12. Гъэтхэ дзэ дэщыгъом къы­ды­хэлъытагъэу нэбгырэ 500 фэдиз къулы­къум ащэнэу агъэнэфагъ.
— Мы илъэс зэкIэлъыкIохэм дзэм къулыкъур щызыхьы зышIоигъо ныбжьыкIэхэм япчъагъэ къыщыкIэрэп ыкIи адрэ илъэсхэм афэдэу федеральнэ гупчэм къытфигъэуцугъэ пшъэрылъыр зэрэд­гъэ­цэкIэщтым сицыхьэ телъ. Ахэм къулыкъур зыщахьыщт чIыпIэхэр мыгъи зэбла­хъугъэхэп: лъэсыдзэхэм, мэшIокудзэхэм, ошъогу десантыдзэхэм, стратегическэ мэхьанэ зиIэ ракетыдзэхэм, хыдзэ флотым ыкIи Урысые Федерацием и Лъэпкъ гвардие идзэхэм, — хигъэунэфыкIыгъ Александр Авериным.
Адыгеим идзэ комиссар шъхьаIэ къы­зэрэхигъэщыгъэмкIэ, дзэ комиссариатыр гъэтхэ дэщыгъом сыд фэдэрэ лъэны­къокIи фэхьазыр, шъуашэхэри, гъомылапхъэхэри къыIэкIэхьагъэх. Гъэтхэ дзэ дэщыгъоу рагъэжьагъэм епхыгъэ зэхъо­кIыныгъакIэхэм ар кIэкIэу къащыуцугъ. Анахьэу ар зыфэгъэхьыгъэр повесткэхэр зэраIэкIагъэхьащтхэр ары.
— Джы повесткэр электроннэ шъуа­шэм илъэу афатIупщыщт. КъагурыIоным фэшI нахь игъэкIотыгъэу къэсIон: къэра­лыгъо къэбарлъыгъэIэс системэу «Дзэ учетым и ЗыкI реестрэ» повесткэр ра­гъахьэ ыкIи ар зэритымкIэ ­къэралыгъо фэIо-фашIэхэм япорталкIэ къулыкъум ащэщтым макъэ рагъэIу. Реестрэм зыра­гъэхьэгъэ мафэм къыщыублагъэу ­мэфибл зытешIэкIэ повесткэр цIыфым IукIагъэу алъытэ. Ушъхьагъу имыIэу мэфэ 20-м къыкIоцI ар дзэ комиссариатым земыкIуалIэкIэ, хэбзэгъэуцугъэу щыIэм диштэу дэзекIох. Нэужым ар комиссариатым зекIуалIэкIэ, зэкIэ тыралъхьагъэр тырахыжьы, — къыIуагъ А. Авериным.
А. Авериныр къызыщыуцугъэхэм ащыщ дзэ-патриотическэ пIуныгъэм изэхэщэн республикэм зэрэщылъагъэкIуатэрэр. Мы лъэныкъом Адыгеим и ЛIышъхьэу КъумпIыл Мурат лъэшэу ынаIэ зэрэтыригъэтырэр зэхэсыгъом щыхагъэунэфыкIыгъ. Юнармейцэ 9660-рэ мы уахътэм республикэм щатхыгъ. Юнармием ­игъогу картэ къыдыхэлъытагъэу 2025-рэ илъэ­сым ащ нэбгырэ 1620-рэ ­аштагъ.
Зэхэсыгъом кIэух зэфэхьысыжьхэр фашIызэ, дзэ дэщыгъоу къэблагъэрэм ипшъэрылъ шъхьаIэхэм язэшIохынкIэ анахьэу анаIэ зытырагъэтын фаехэр Владимир Свеженец къыгъэнэфагъэх. АР-м хэгъэгу кIоцI IофхэмкIэ и Минис­терствэ илIыкIохэм муниципальнэ обра­зованиехэм япащэхэр ягъусэхэу къулы­къум зыщызыдзыехэрэм нахь пхъашэу алъыхъунхэу афигъэпытагъ.
— Ыпэрэ илъэсхэм афэдэу къэблэгъэрэ гъэтхэ дзэ дэщыгъор зэрифэ­шъуашэу редгъэкIокIын фае. Мыщ ти­къэралыгъо изыкъэухъумэжьын гъэ­пы­тэгъэнымкIэ мэхьанэшхо зэриIэр, граж­дан пшъэдэкIыжьэу ащкIэ ныб­жьыкIэхэм яIэр къагурыIон фае, — ­къы­Iуагъ Владимир Свеженец.
КIАРЭ Фатим.