Республикэм апэрэу щагъэпсыгъэ индустриальнэ паркэу «Инэм» зыфиIорэм УФ-м къы­дэгъэкIыжьынымкIэ ыкIи сатыумкIэ и Министерствэ федеральнэ шапхъэхэм зэради­штэ­рэм фэгъэхьыгъэ тхылъ къыратыгъ. 2026-рэ илъэсым имэзэе мазэ и 24-м министерствэм унашъор къыдигъэкIыгъ.

«Мыр мэхьанэшхо зиIэ зичэзыу лъэ­бэ­къушху промышленнэ чIынэлъэ инэу гектар 200 хъоу дгъэпсырэмкIэ. ИщыкIэгъэ инфраструктурэр ащ щыдгъэпсыгъах, программищым къадыхэлъытагъэу федеральнэ ыкIи республикэ мылъкоу сомэ миллиарди 4 пэIухьагъ. Индустриальнэ паркым изэтегъэпсыхьагъэ аужырэ шапхъэхэм адештэ. Административнэ унэм­рэ промышленнэ псэуалъэу квадрат метрэ мини 4,6-рэ зиинагъэмрэ ашIыгъэх.
КъыдэгъэкIыжьыным зэхапшIэу хахъо зэришIыгъэр проектым етэпхы. Паркэу «Инэмыр» аккредитацие зэратыгъэ къыдэгъэкIыжьын паркхэм яреестрэ зэрэхэхьагъэм къеушыхьаты типромышленнэ чIыналъэ изэхэщэн шэпхъэ лъагэ­хэм зэратетыр ыкIи ащ Iоф щызышIэнэу къыдахьэхэрэм къыдэгъэкIыжьыным ылъэныкъокIэ хахъохэр ашIышъущт», — къыIуагъ Адыгеим ипащэ.

ГущыIэм пае, индустриальнэ паркым ирезидентхэм ямылъку тефэрэ хэбзэ­Iахьыр илъэси 7-рэ амытыным ифитыныгъэ яIэ мэхъу. Промпаркым игъэIорышIэкIо компание къэралыгъо IэпыIэгъоу щыIэхэр егъэфедэх инфраструктурэм ишIынрэ игъэкIэжьынрэ апэIуигъэхьагъэм икъегъэгъэзэжьын ылъэныкъокIэ.
«ЗэкIэмкIи промышленнэ чIыналъэм хъызмэт зехьакIоу 50-м нэс дэдгъэхьан ыкIи инвестициеу сомэ миллиард 55-рэ фэдиз къетщэлIэн тыгу хэлъ. IофшIэпIэ чIыпIэ 8000-м ехъу ащ къытыщт. Сатыум пылъхэм промпаркыр ашIогъэшIэгъон зэрэхъугъэр тэлъэгъу. Резидентхэр ягуапэу проектым къыхэхьэх, промышленнэ ыкIи хъызмэт псэуалъэхэр дашIыхьэх. Непэрэ мафэм ехъулIэу резидентихмэ япроектхэу зэкIэмкIи ин­вестицие сомэ миллиарди 4,5-рэ зытефэхэрэр ыкIи IофшIэпIэ чIыпIэ 578-рэ къыздыхэлъытагъэхэр щагъэцакIэх. Ахэм ащыщ инженернэ гупчэу «Апрель»
зыцIэр. Ар гъэстыныпхъэ шхъуантIэкIэ Iоф зышIэрэ котелхэу дэпкъым палъэ­хэрэр къэзышIыхэрэ хъызмэтшIэпIэ анахь инхэу къэралыгъом итхэм ащыщ. Ащ нэмыкIэу пкъыгъо зэфэшъхьафхэр зэрэзэращэхэрэ полимернэ псэуалъэхэу бжъэм хэшIыкIыгъэхэм, ЭВА-м хэшIыкIыгъэ цуакъэхэм, спортивнэ шхыны­гъохэм, жьыфын системэхэм, шоколад IэшIу-IушIухэм якъыдэгъэкIын апылъ хъызмэтшIапIэхэм хэхъоныгъэ ашIы. Мы чIыпIэм сомэ миллиард 13 зытефэрэ логистическэ гупчэ инитIу къыщашIы.
Къыхэзгъэхъожьын, логистическэ гуп­чэхэр шIуагъэ къэзытыщт лъэныкъохэу тэлъытэх. Ар зэлъытыгъэр чIыпIэу шъо­лъырыр зыдэщысымрэ транспортымкIэ Iэрыфэгъоу зэрэщытымрэ. АщкIэ къахэщы паркэу «Инэмыр» зыдэщыт чIыпIэри — сыд фэдэ лъэныкъо телъытэгъэ къыдэгъэкIынри мыщ щыбгъэпсыныр Iэрыфэгъу», — къыкIигъэтхъыгъ ­КъумпIыл Мурат.