«ЦIыф зэрымыс быбырэ пкъыгъохэр: лъэныкъуитIукIэ агъэфедэрэ технологиехэр» зыфиIорэ Дунэе форумыр Мыекъопэ къэралыгъо технологическэ университетым щэкIо.

Форумыр мэфэкI шIыкIэм те­тэу апшъэрэ еджапIэм и Дзэ егъэджэн гупчэ къыщызэIуа­хыгъ. Адыгеим и ЛIышъхьэу КъумпIыл Мурат ыкIи АР-м и Парламент идепутатхэм ацIэкIэ къэзэрэугъоигъэхэм закъыфигъэзагъ Урысыем и ЛIыхъужъэу Цэй Эдуард. ЦIыф зэрымыс быбырэ пкъыгъохэм япхыгъэ Iофыгъохэм УФ-м и Президент ынаIэ лъэшэу зэратетыр ащ къыхи­гъэщыгъ, къэралыгъом ишъо­лъыр зэфэшъхьафхэм дзэ егъэ­джэн гупчэхэр къазэращы­зэIуа­хыхэрэр ыкIи Адыгеим ар зэрэщагъэпсыгъэм мэхьанэшхо зэри­Iэр къыIуагъ. Фо­румым ишIуа­гъэкIэ цIыф зэ­рымыс быбырэ пкъыгъохэр зыфэдэхэр ныбжьыкIэхэм ашIэн амал зэрэщыIэр, дронхэр зэ­рэзебгъэкIощтхэм фэгъэхьыгъэ шIэныгъэхэр зэрагъотыщтхэр къыIуагъ.

Адыгеим къэкIогъэ Урысыем и ЛIыхъужъэу, Апэрэхэм я Дви­жение и Правление итхьаматэу Артур Орловым нэужым гущыIэ ратыгъ. НыбжьыкIэхэм лъэныкъо зэфэшъхьафхэмкIэ шIэныгъэ зэрагъэгъотынымкIэ къэралыгъом амалыкIэхэр къызэраритырэр ащ къариIуагъ.
— ЦIыф зэрымыс быбырэ пкъыгъохэм афэгъэхьыгъэ фору­мым мэхьанэ­шхо иI, ащ ишIуа­гъэкIэ сэнэхьатыкIэу щыIэны­гъэм къыхэхьагъэм ныбжьыкIэ­хэм хэшIыкI фыряIэщт. БПЛА-р дзэ закъор арэп зы­щагъэфе­дэрэр, арышъ, нэбгырэ пэпчъ ащ ищыIэныгъэ рипхын ылъэ­кIыщт. Мыщ епхыгъэу Адыге­им Iофыгъо гъэнэфагъэхэр зэрэзэшIуихырэм осэшIу фэпшIын фае. Тызэрэзэкъотым ишIуагъэкIэ тихэгъэгу нахь лъэш ыкIи шъхьа­фит мэхъу. Тыфай тидзэкIолIхэм текIоныгъэр псын­кIэу къыда­хынэу. Дзэ шъуашэ­хэр шъущыгъэу шъузэрэщытым уимыгъэгушхон плъэкIырэп, неущырэ мафэр шъоры зэ­лъытыгъэр, — къыIуагъ Артур Ор­ловым курсантхэм закъы­фи­гъазэзэ.
Мыекъопэ къэралыгъо технологическэ университетым иректорэу Къуижъ Саидэ къызэри­IуагъэмкIэ, АР-м и ЛIышъхьэ, УФ-м шIэныгъэмкIэ ыкIи апшъэ­рэ гъэсэныгъэмкIэ и Минис­терствэ, УФ-м зыкъэухъумэжьынымкIэ и Министерствэ яшIуагъэкIэ форумыр ятIонэрэу зэхащагъ.
— Форумым хэлажьэхэрэм япчъагъэ зэрэхэхъуагъэм къегъэлъагъо ащ мэхьанэу иIэр. Дзэм ыкIи щыIэныгъэм ащыб­гъэфедэщт пкъыгъохэм япхыгъэ лъэныкъохэр ныбжьыкIэхэм ашIогъэшIэгъоных. Мыгъэ Урысыем ишъолъыр 19-мэ къарыкIыгъэ лIыкIохэр форумым хэлажьэх. Пыим ебэныгъэнымкIэ цIыф зэрымыс быбырэ пкъы­гъохэр зэрэтищыкIагъэхэр хэу­шъхьафыкIыгъэ дзэ операцием къыгъэлъэгъуагъ. Мыекъопэ къэралыгъо технологическэ уни­верситетым истудент 260-рэ фэдиз хэушъхьафыкIыгъэ дзэ операцием джырэкIэ щыIэх, ахэм ащыщэу нэбгырэ 40-м ехъумэ гъэхъагъэхэр ашIыгъэх, гухэкI нахь мышIэми, лIыхъужъныгъэ зэрахьэзэ хэкIодагъэхэри ахэтых, — къыIуагъ ректорым.
Мы мафэхэм зидунай зы­хъожьыгъэ Хэгъэгу зэошхом иветеранэу Николай Бурдун­рэ, хэушъхьафыкIыгъэ дзэ операцием хэкIодэгъэ студентхэмрэ яшIэжь агъэлъапIэзэ зы такъикъэ афэшъыгъуагъэх.
Нэужым Iофтхьабзэм къе­кIолIагъэхэр дзэ егъэджэн гуп­чэм рагъэблэгъагъэх, ащ иIоф­шIэн зэрэзэхэщагъэр арагъэ­лъэгъугъ, цIыф зэрымыс быбырэ пкъыгъохэм якъэгъэлъэгъон рагъэкIокIыгъ. Мы мэфэ дэдэм Дунэе шIэныгъэ-практическэ конференцие апшъэрэ еджапIэм щыкIуагъ. Джащ фэдэу кIэлэ­еджакIохэм апае интерактивнэ программэу «ЦIыф зэрымыс бы­бырэ пкъыгъохэм ядунай иапэрэ лъэбэкъухэр ыкIи АI тех­нологиехэр» зыфиIорэр зэхащагъ.
Форумым иятIонэрэ мафэ Урысыем ит Дзэ егъэджэн гупчэхэм якурсантхэр дронхэм ягъэIорышIэнкIэ зэнэкъо­къущтых. Анахь дэгъоу зыкъэзы­гъэлъэгъуагъэхэр агъэ­шIощтых.
Шъугу къэдгъэкIыжьын джырэкIэ цIыф зэрымыс быбырэ пкъыгъохэм ядзэхэр Урысыем иIэхэ зэрэхъугъэр. УФ-м зыкъэу­хъумэжьынымкIэ и Министерст­вэ мы лъэныкъомкIэ операторхэм яугъоин ыублагъ. Фэдэ шIоигъоныгъэ зиIэхэм зыщы­псэухэрэм ащыIэ дзэ комиссариатхэм защарагъэтхышъущт. УпчIэ зиIэхэм зыздагъэзэшъущтыр: къ. Мыекъуапэ, ур. Ком­сомольскэр, 217-рэ, я 119-рэ, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28.
ДЕЛЭКЪО Анет.